سەنبى, 8 مامىر 2021
دات 2741 1 پىكىر 31 شىلدە, 2020 ساعات 15:25

مىڭ ادام تۇراتىن اۋىلدا دارىگەر جوق...

قر پرەزيدەنتى
ق. ك. توقاەۆتىڭ نازارىنا

الەمگە تاراعان Covid-19 پاندەمياسى ەلىمىزدىڭ جالپى ەكونوميكالىق-الەۋمەتتىك جاعدايىنىڭ قانشالىقتى قاۋقارلى ەكەنىن كورسەتىپ بەردى. اسىرەسە مەديتسينا سالاسى مۇلدە تۇرالاپ جاتقانى ايقىن كورىنىپ وتىر. قازىرگى تاڭدا ەلىمىزدىڭ بارلىق دەرلىك ايماقتارى قالالاردى ايتپاعاندا اۋدان ورتالىقتارى مەن اۋىلدىق جەرلەردە مۇلدە قيىن جاعداي ورىن الدى. قولدانىستاعى اۋرۋحانالار اۋرۋلاردى قابىلداي المايتىنداي تولىپ، قاراپايىم ءدارى-دارمەك پەن ءشپريتستىڭ ءوزىن تابا المايتىن دارەجەگە جەتتى. 

حالىق قازىر اپاتتى جاعدايمەن وزدەرى بەتپە-بەت قالدى. ءار اۋىل ءوز تۇرعىندارى بولىپ قارجى جيناپ ءدارى-دارمەكتەرىن، تىنىس الۋ اپاراتتارىن الدىرىپ جاتىر. باسقا امال دا جوق. مەملەكەتتىڭ نەگىزى بولىپ وتىرعان حالىقتىڭ دەنساۋلىق ساقتاۋ سالاسى مەن عىلىم-بىلىمىنەن اقشا ۇنەمدەۋ ەلدىڭ دامۋىنا قانشالىقتى كەسىرىن تيگىزىپ وتىرعانى ەلدەگى ورىن الىپ وتىرعان قازىرگى جاعداي دالەل ەمەس پە!

ءبىر عانا مىسال شىعىس قازاقستان وبلىسى، اباي اۋدانى، كەڭگىرباي بي اۋىلدىق وكرۋگىنىڭ دارىگەرلىك امبۋلاتورياسى 2019 جىلدان باستاپ قىسقارتىلىپ قازىرگى تاڭدا كوكباي اۋىلدىق وكرۋگىنىڭ دارگەرلىك امبۋلاتورياسىنا قاراتىلعان. كوكباي اۋىلى كەڭگىرباي اۋىلىنان 25 كم قاشىقتىقتا ورنالاسقان. تۇرعىنداردىڭ ول جاققا بارىپ دەنساۋلىقتارىن قاراتۋى، جەدەل جاردەم قاجەت جاعدايدا ۋاقىتىلى كومەك الا الماۋى ۇلكەن ماسەلە تۋدىرادى. 

مىڭعا تارتا حالىق تۇراتىن اۋىلدىڭ جان سانى از دەپ تەك ءبىر مەدبيكەنى عانا قالدىرعانى قانشالىقتى اقىلعا سيىمدا. جەدەل-جاردەم كولىگى بولماعاندىقتان مەيىربيكە سىرقاتتاردىڭ ۇيلەرىنە بارىپ كومەك كورسەتۋگە ۇلگەرە الماي وتىر. ونى ايتاسىز، ءتىپتى، ءدارى-دارمەك تە جوق. وسى قىسقارتۋلاردان ۇنەمدەلگەن قارجى جەمقورلاردىڭ جەمساۋىنا ءتۇسىپ جاتقانىن بارىمىزدە كورىپ وتىرمىز. «الەۋمەتتىك مەديتسينالىق ساقتاندىرۋ قورى» مەن «سك-فارماتسيا» باسشىلىعىنىڭ جاساپ وتىرعان تىرلىكتەرى زاڭ تۇگىلى ادامگەرشىلىك تۇسىنىگىنە دە كەلە بەرمەيدى-اۋ.  

اۋىلدىق جەرلەردىڭ مەديتسينالىق مەكەمەلەرىنە كوزقاراس وزگەرمەي حالىقتىڭ دەنساۋلىعىن ساقتاۋ قالاي ىسكە اسپاق؟

سوندىقتان قازاقستان رەسپۋبليكاسى بويىنشا بۇرىن قىزمەت كورسەتىپ، كەيىنگى جىلدارى اۋىلدىق جەرلەردە قىسقارتىلعان بارلىق دارگەرلىك امبۋلاتوريالار قالپىنا كەلتىرىلسىن. ءتىپتى 100-50 ادام تۇراتىن شاعىن ەلدى-مەكەندەردە مەديتسينا قىزمەتكەرلەرى بولۋى ءتيىس. 

ۇلتتىڭ ساۋلىعى مەملەكەتتىڭ بولاشاعى. ەگەر ءبىز «ماڭگىلىك ەل» بولامىز دەسەك دەنساۋلىق ساقتاۋ مەن عىلىم-ءبىلىم سالاسىن بارىنشا قارجىلاندىرۋىمىز كەرەك. جالپى ىشكى ءونىمنىڭ كەم دەگەندە 20-30 پايىزى وسى سالالارعا جۇمسالۋى كەرەك.  دەنى ساۋ، عىلىمى دامىعان، ءبىلىمدى حالىق ارقىلى عانا قۋاتتى ەكونوميكا قۇرا الامىز. ال ەكونوميكالىق تۇرعىدان تاۋەلسىز بولمايىنشا ءبىز تولىق تاۋەلسىز مەملەكەتپىز دەپ ايتا المايمىز. وعان قازىرگى ۋاقىتتا تولىق كوزىمىز جەتتى. 

2014 جىلعى دەرەكتەر بويىنشا:

كەڭگىرباي بي دارىگەرلىك امبۋلاتورياسى شقو دەنساۋلىق ساقتاۋ باسقارماسى اكىمدىگىنىڭ «اباي اۋداندىق ورتالىق اۋرۋحاناسى» شجق كمك-نىڭ كەڭگىرباي بي دارىگەرلىك امبۋلاتورياسى.

عيمارات 1990 جىلى سالىنعان، عيمارات ءتۇرى - بەيىمدى، جىلىتۋ جۇيەسى – پەشتىك، سۋمەن قامتاماسىز ەتىلۋى – قۇدىقتى.
ەمدەۋ مەكەمەسى: دارىگەرلىك امبۋلاتوريا – 1
كادرلارى: دارىگەرى – 1
ورتا بۋىن مەديتسينا قىزمەتكەرلەرى – 2
باسقالارى – 2
كۆاليفيكاتسيالىق كاتەگورياسى دارىگەردە – 1, كاتەگوريا – 1;
جان باسىنا شاققاندا تاريف 1306 تەڭگە.
جىلدىق بيۋدجەت 1024 ادام ح 1306 تەڭگە ح 12 اي = 16048,1 مىڭ تەڭگە.
جالپى حالىق سانى – 1024 ادام، سونىمەن قاتار بۇل ەلدى مەكەنگە 80 تۇرعىنى بار جيدەباي مەديتسينالىق پۋنكتى قارايدى.

ارداق بەركىمباي

Abai.kz

1 پىكىر