قازاقستاندا بەتپەردە رەجيمىن بۇزعانى ءۇشىن 83 340 تەڭگە مولشەرىندەگى ايىپپۇل ۇزىن-ىرعاسى 3467 ادامعا سالىنىپتى. ال، ايىپپۇلدىڭ جالپى مولشەرى 288,9 ميلليون تەڭگەنى قۇراعان. بۇل تۋرالى قر باس پروكۋراتۋراسى مالىمدەدى. 

«بەلگىلەنگەن كارانتيندىك شەكتەۋلەردى، ونىڭ ىشىندە بەتپەردە رەجيمىن بۇزعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 425-بابىنىڭ 1-بولىگى بويىنشا جەكە تۇلعالارعا 30 اەك مولشەرىندە ايىپپۇل سالۋعا اكەپ سوعاتىن جاۋاپكەرشىلىك كوزدەلگەن. وسى باپ بويىنشا 3467 ادام جاۋاپكەرشىلىككە تارتىلدى»،- دەلىنگەن  حابارلامادا.

سونىمەن قاتار، پروكۋراتۋرا جۇرگىزگەن رەيد ناتيجەسىندە 650 ءدارىحانانىڭ ءدارى-دارمەكتى كوتەرمە باعامەن ساتۋ فاكتىسى تىركەلگەن.

ال، الماتى قالاسىندا كوروناۆيرۋستىق ينفەكتسيادان ەمدەۋدە قولدانىلاتىن 60 مىڭ دانا جاساندى ءدارى-دارمەك («تسەفامەد»، «تسەراكسون»، «تسەفتازيدين»، «فيزيوتەنس») دايىنداۋ تسەحى انىقتالعان.

ءدارى-دارمەك تاپشىلىعىن قولدان جاساۋ ارقىلى (تسەفترياكسون، ازيتروميتسين، پاراتسەتامول جانە ت.ب. بار بولا تۇرا) ەلوردالىق ءدارىحانالاردىڭ ءبىرى ولاردى (سەرتيفيكاتسىز جانە فيسكالدى چەكتەرسىز) جوعارى باعامەن ساتىپ وتىرعان.

اتالعان ءدارىحانادان جالپى سوماسى 1,7 ملن. تەڭگەگە 2811 قاپتاماداعى ءدارى-دارمەك تاركىلەنگەن.

باتىس قازاقستان وبلىسىندا رەسەي فەدەراتسياسىمەن شەكارادا ءتيىستى قۇجاتتارسىز 5342 قاپتاما ءدارى-دارمەك پەن 3160 امپۋلانى، سونداي-اق 10 ملن.تەڭگەدەن استام سوماعا 2 مىڭ مەديتسينالىق بۇيىمدى زاڭسىز اكەلگەندەر ۇستالعان. ولارعا 277 مىڭ تەڭگە كولەمىندە ايىپپۇل سالىنعان. ءدارى - دارمەكتەر مەن مەديتسينالىق بۇيىمدار دەنساۋلىق ساقتاۋ باسقارماسىنا بەرىلدى.

جالپى تەكسەرۋ شارالارىنىڭ قورىتىندىسى بويىنشا 694 ادام اكىمشىلىك جاۋاپكەرشىلىككە تارتىلىپ، زاڭسىز اينالىمنان جالپى سوماسى 770 ملن.تەڭگەگە 400 مىڭنان استام مەديتسينالىق ءدارى-دارمەكتەر مەن مەديتسينالىق ماقساتتاعى بۇيىمدار الىنعان.

Abai.kz