قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ جۇمىس ساپارىمەن الماتى قالاسىنا كەلدى. ول قالا اكىمى باقىتجان ساعىنتاەۆپەن بىرگە الماتىنىڭ عىلىمي جانە شىعارماشىلىق زيالى قاۋىم وكىلدەرىمەن كەزدەستى. كەزدەسۋدە مەملەكەت باسشىسى قاسىم-جومارت توقاەۆتىڭ بيىلعى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا جاريا ەتىلگەن باسىم مىندەتتەر تالقىلاندى.

كەزدەسۋدى اشقان مەملەكەتتىك حاتشى قازاقستان پرەزيدەنتىنىڭ بيىلعى جولداۋى پاندەميا مەن جاھاندىق ەكونوميكالىق داعدارىس جاعدايىنداعى قازاقستاننىڭ جاڭا الەۋمەتتىك-ەكونوميكالىق دامۋ باعىتى ەكەنىن اتاپ ءوتتى. الداعى بارلىق وزگەرىستەر مەملەكەتتىڭ جۇمىس ىستەۋ تيىمدىلىگىن ارتتىرۋعا، وزەكتى الەۋمەتتىك-ەكونوميكالىق پروبلەمالاردى شەشۋگە  باعىتتالعان.

قىرىمبەك كوشەرباەۆ قازىرگىدەي كۇردەلى كەزەڭدە زيالى قاۋىم داعدارىستىق جاعدايلاردىڭ الدىن الۋدا، حالىقتىڭ جاڭا بىرەگەيلىگىن قالىپتاستىرۋدا وزىندىك ءرول اتقارۋى ءتيىس ەكەنىن اتاپ ءوتتى.

بۇل رەتتە جاڭا كەزەڭنىڭ سىن-قاتەرلەرىن ەسكەرە وتىرىپ، ءبىرىنشى كەزەكتە،  ۇلى ابايدىڭ باعا جەتپەس مۇراسىن قايتا زەردەلەپ، زيالى قاۋىمنىڭ ۇلتتىڭ جاڭا رۋحاني قاسيەتتەرىن قالىپتاستىرۋداعى ميسسياسىن تەرەڭ ءتۇسىنۋ قاجەت.

تۇڭعىش پرەزيدەنت – ەلباسى نۇرسۇلتان نازارباەۆ ۇسىنعان "رۋحاني جاڭعىرۋ" باعدارلاماسىن ىسكە اسىرۋدا ونىڭ مازمۇنىن بايىتىپ، سەرپىن بەرۋ كەرەك. مىسالى، حالىق داستۇرلەرى مەن ادەت-عۇرىپتارىن ساقتاۋ جانە قورعاۋ ماسەلەلەرىن قۇقىقتىق رەتتەۋ بويىنشا عالىمدار مەن قوعام قايراتكەرلەرىنەن تۇراتىن جۇمىس توبىن قۇرۋ قاجەت.

داعدارىس كەزىندەگى  جانە بولاشاقتا ۇلتتىڭ دامۋىنىڭ نەگىزى ەڭ الدىمەن وتباسى مەن وتباسىلىق تاربيە بولۋى كەرەك. ورتا مەكتەپتەردە وتباسىلىق قۇندىلىقتارعا باعدارلانعان ارنايى پاندەردى ەنگىزۋدى قاراستىرۋدىڭ، جاستاردى وتباسىلىق تاربيەلەۋدىڭ جالپىۇلتتىق ادىستەمەسىن ازىرلەۋدىڭ ۋاقىتى كەلدى.

اشىق پىكىر الماسۋ جاعدايىندا وتكەن كەزدەسۋدە بەلگىلى مادەنيەت جانە عىلىم قايراتكەرلەرى ورازالى سابدەن، سماعۇل ەلۋباي، مۇرات اۋەزوۆ، تورەگەلدى شارمانوۆ، مۇرات جۇرىنوۆ، راحمان الشانوۆ، ءاسانالى ءاشىموۆ جانە باسقا دا ازاماتتار ۇلتتىڭ رۋحاني جاڭارۋى تۋرالى ءوز ۇسىنىستارىمەن ءبولىستى.

Abai.kz