رەسەي پرەزيدەنتى ۆلاديمير ءپۋتيننىڭ كورشىلەس، وداقتاس ەلدەرمەن ورتاق اقشا ەنگىزسەك دەگەن ارمانى بار. ءارىسى تمد، بەرىسى ەاەو ەلدەرىندە ورتاق ۆاليۋتا بولسا دەيدى. رەسەي باسشىسىنىڭ بۇل ءسوزدى ايتىپ جۇرگەنىنە از ۋاقىت بولعان جوق. جاقىندا ءپۋتيننىڭ سول ارمانى جارتىلاي جۇزەگە اسا باستاعانى بەلگىلى بولدى.

ناقتىراق ايتقاندا، رەسەي مەن بەلارۋس «وداقتاس ەل» جوباسى اياسىندا ورتاق ۆاليۋتا ەنگىزۋگە دايىندالىپ جاتقان كورىنەدى. بۇل تۋرالى تمد ىستەرى بويىنشا كوميتەت باسشىسى لەونيد كالاشنيكوۆ مالىمدەگەن.

«ورتاق ۆاليۋتا بولادى، ويتكەنى بۇل جولداعى جۇمىس جۇرگىزىلىپ، ورتالىقتار دا قۇرىلدى. قازىرگى تاڭدا بەلارۋس ەلى ورتاق ۆاليۋتاعا كەلىسەدى دەپ ويلايمىن», - دەيدى كالاشنيكوۆ.

ونىڭ ايتۋىنشا، پۋتين مەن بەلارۋس پرەزيدەنتى الەكساندر لۋكاشەنكو جاقىن ارادا ماسكەۋدە كەزدەسىپ، وسى ماسەلەنى تالقىلايدى. ساراپشىلاردىڭ ويىنشا، باۋىرلاس ەكى ەلدى جاقىندىققا جەتەلەيتىن «وداقتاس ەل» جوباسى بەلارۋستى رەسەيدىڭ قولتىعىنا تۇپكىلىكتى كىرگىزۋى مۇمكىن. سونىڭ العاشقى باسپالداعى ورتاق ۆاليۋتا بولىپ وتىر.

رەسەي ەۋرازيالىق ەكونوميكالىق وداق قۇرىلعاننان بەرى بىرىڭعاي ۆاليۋتاعا كوشۋدى ۇسىنىپ كەلە جاتىر. ماسكەۋدىڭ بۇل ۇسىنىسىن قولدايتىندار جوق ەمەس. وتكەن جىلى بەلارۋس پرەزيدەنتى الەكساندر لۋكاشەنكو رەسەيمەن ارادا ورتاق ۆاليۋتا ەنگىزۋدى قولدايتىنىن ايتقان.

«قازىر بىزگە ورتاق ۆاليۋتا ەنگىزۋ تۋرالى ۇسىنىس ءتۇسىپ جاتىر. ءبىز مۇنى قولدايمىز! جانە بۇل ۆاليۋتا – رۋبل بولادى», - دەگەن ەدى بەلارۋس باسشىسى.

دەمەك، رەسەيمەن ورتاق اقشا ەنگىزۋگە بەلارۋستىڭ ءوزى ىڭعاي ءبىلدىرىپ وتىر. وسىدان-اق، ءپۋتيننىڭ ارمانى ورىندالا باستاعانىن بايقاۋعا بولادى.

ءبىزدى الاڭداتاتىنى، بۇگىن بەلارۋس رەسەيمەن ورتاق اقشا ەنگىزسە، ەرتەڭ قازاق بيلىگى دە وسى قادامدى قولداپ شىعا ما دەگەن قاۋىپ. رەسەيدىڭ جەر بەتىندەگى جاقىنى بەلارۋس پەن قازاقستان ەكەنى بەلگىلى. ەندەشە ءبىزدىڭ بيلىك بەلارۋس سالعان جولعا ءتۇسىپ كەتپەسىنە كىم كەپىل؟

ويتكەنى، ورتاق ۆاليۋتانى قولدايتىن ساياساتكەرلەر ءبىزدىڭ ەلدەن دە تابىلادى. ەاەو ەلدەرىمەن بىردەي اقشا پايدالانساق شەكەمىز شىلقىپ ءومىر سۇرەر ەدىك دەگەن تۇسىنىك قالىپتاسىپ تا ۇلگەرگەن. ءتىپتى كەيبىر دەپۋتاتتارىمىز اشىق ايتىپ تا ءجۇردى. قازاقستان پارلامەنتى ءماجىلىسىنىڭ دەپۋتاتى، كوممۋنيست ايقىن قوڭىروۆ «ءبىزدىڭ دەپۋتاتتار دا ورتاق ۆاليۋتا ەنگىزۋدى قولدايدى» دەپ سويلەگەن.

«بۇل ماسەلەنى ەۋرازيالىق ەكونوميكالىق وداق اياسىندا، وڭىرلىك دەڭگەيدە شەشۋ كەرەك.  ءبىر كەزدەرى مەملەكەت باسشىسى ەۋرازيالىق وداق شەڭبەرىندە ءوزارا ەسەپتەسەتىن "التىن" دەگەن  دەربەس ۆاليۋتا ەنزىزۋدى ايتقان. بىزگە تاۋەلسىز اقشا-قارجى ساياساتى قاجەت»، - دەگەن ەدى قوڭىروۆ.

ورتاق ۆاليۋتا تاۋەلسىزدىككە قاۋىپتى ەكەنى ايتىلعانىمەن، بۇل ۇسىنىستىڭ تامىرىنا ءالى تولىق بالتا شابىلعان جوق. سول ءۇشىن تمد-عا، ەاەو-قا مۇشە ەلدەر وسى باستان قاتاڭ تۇردە قارسىلىق تانىتپاسا، رەسەي ەرتە مە، كەش پە ورتاق ۆاليۋتا ەنگىزۋ ماقساتىنا جەتۋى مۇمكىن...

Abai.kz