«COVID-19 پاندەمياسىنىڭ ساباقتارىن ەسكەرە وتىرىپ، بۇكىل الەم ەلدەرى حالىقتىڭ دەنساۋلىعىن قورعاۋعا قاراجات سالۋى كەرەك. الەم جاڭا پاندەميا وشاقتارىنا الدىن-الا دايىندالۋى قاجەت». 

بۇل دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋستىڭ 7 قىركۇيەكتە وتكەن بريفينگتە ايتقان ءسوزى. ونىڭ ءسوزىن ددسۇ سايتى جاريالادى.

«بۇل سوڭعى پاندەميا ەمەس. تاريح بىزگە ەپيدەميا مەن پاندەميا ءومىر شىندىعى ەكەنىن ۇيرەتتى. بىراق كەلەسى پاندەميا ورىن العاندا، الەم وسى ۋاقىتقا قاراعاندا جاقسى دايىن بولۋى كەرەك. سوڭعى جىلدارى كوپتەگەن ەلدەر مەديتسينادا ۇلكەن جەتىستىكتەرگە جەتتى. بىراق جۇقپالى اۋرۋلاردىڭ ورشۋىنە جاۋاپ بەرۋ ءۇشىن نەگىز بولاتىن دەنساۋلىق ساقتاۋدىڭ نەگىزگى جۇيەلەرىن ەلەمەدى»، - دەدى گەبرەيەسۋس.

ونىڭ ايتۋىنشا، COVID-19 پاندەمياسىنىڭ زاردابىنان قۇتىلىپ، ەكونوميكا قالپىنا كەلگەن سوڭ دەنساۋلىق ساقتاۋ جۇيەسىن جاقسارتۋعا قاراجات سالۋ كەرەك. گەبرەيەسۋس گەرمانيانىڭ وسى سالاعا 2026 جىلعا قاراي 4 ميلليارد ەۋرو ينۆەستيتسيالاۋ نيەتىن مىسال رەتىندە كەلتىردى.

COVID-19 ەپيدەمياسى 2019 جىلدىڭ سوڭىندا قىتايدا باستالدى. 2020 جىلى 11 ناۋرىزدا ددسۇ كوروناۆيرۋستىڭ تارالۋىن پاندەميا دەپ جاريالادى. گەبرەيەسۋس قازىرگى دەنساۋلىق داعدارىسىنىڭ اسەرى ونداعان جىلدار بويى سەزىلەتىنىن ايتتى.

كەرىمسال جۇباتقانوۆ

Abai.kz