«Nur Otan» پارتياسى پرايمەريزى قوعامدىق-ساياسي ومىرگە ۇلكەن وزگەرىستەر الىپ كەلدى. ازاماتتاردىڭ بەلسەندىلىگى ارتىپ، ەل نازارى پارتياىشىلىك سايلاۋعا اۋدى.

پرايمەريزگە قاتىسىپ، باق سىناپ جاتقان ۇمىتكەرلەر ۇگىت-ناسيحات كەزەڭىنە قىزۋ كىرىسىپ كەتتى. جەر-جەردە ءوتىپ جاتقان پىكىرتالاستار بارىسىندا كانديداتتار ءوز باعدارلاماسىن تانىستىرىپ،  تولعاندىرعان ماسەلەلەرىن ورتاعا سالۋدا.

ساياسي دوداعا ءتۇسىپ جاتقاندار اراسىندا وزەكتى ماسەلەلەر كوتەرىپ جۇرگەن قوعام بەلسەندىلەرى مەن ءار سالاداعى ەسىمى ەلگە تانىس ازاماتتار بار. قوعام بەلسەندىلەرى ەلدىك مۇددەگە كەلگەندە تىزە قوسىپ، بىرلەسە قىزمەت ەتۋدى ماقسات تۇتىپ وتىر. ولار پرايمەريزدىڭ ۇلكەن مۇمكىندىك ەكەنىن ايتىپ وتىر.

ماسەلەن، بەلگىلى عالىم، قوعام قايراتكەرى، تاريحشى، ساياسي عىلىمدارىنىڭ كانديداتى، بۇگىندە ۇلىتاۋ اۋدانى اكىمى بولىپ قىزمەت ەتىپ جۇرگەن بەرىك ابدىعالي پرايمەريزگە قاتىسۋعا بەل بۋىپ وتىر.

«بارشاڭىزعا ايان مەملەكەتتىك باسقارۋ جۇيەسى تالابىندا اكىمدەر پارتيا فيليالدارىنىڭ توراعاسى قىزمەتىن قوسا اتقارىپ كەلەدى. مەن وسى ەرەكشەلىكتى ەسكەرە وتىرىپ، پرايمەريزگە قاتىسۋ تۋرالى ارنايى شەشىم قابىلدادىم»، - دەيدى ول.

ونىڭ ايتۋىنشا، بۇل شەشىمنىڭ نەگىزدەمەسى – پرايمەريز بارىسىندا پارتيا مۇشەلەرىنىڭ، ال سايلاۋ ناتيجەسىندە جالپى اۋدان تۇرعىندارىنىڭ اۋدان اكىمى ءارى «Nur Otan» پارتياسى اۋداندىق فيليالىنىڭ توراعاسى رەتىندە ماعان سەنىم ارتۋ دەڭگەيىن انىقتاۋ.

بۇگىندە پارتيانىڭ اۋداندىق فيليالى اۋدان جۇرتشىلىعى ءۇشىن ماڭىزى زور – سايلاۋالدى باعدارلاما قابىلداعان. بۇل باعدارلاما بەرىك ابدىعاليدىڭ اۋدان اكىمى رەتىندەگى كەشەندى ءىس-قيمىلدار جوسپارىنىڭ جيىنتىعى سانالادى.

«پرايمەريز، سايلاۋ كەزىندە اۋدان حالقىنىڭ كوپشىلىگى قولداۋ كورسەتسە –« Nur Otan» پارتياسىن جانە اۋداندىق باعدارلاماسىن قوشتاعانى. دەمەك، اۋدان اكىمى – پارتيا فيليالىنىڭ توراعاسى رەتىندە ماعان سەنىم كورسەتكەنى. ال كەرىسىنشە بولسا، ياعني، پرايمەريز، سايلاۋ قورىتىندىسىنىڭ كورسەتكىشى تومەن بولىپ، اۋدان تۇرعىندارىنىڭ جارتىسىنان كوبى قاجەتتى قولداۋ كورسەتپەسە، اۋدان اكىمى قىزمەتىنەن كەتۋىم كەرەك»، - دەيدى بەرىك ابدىعاليۇلى.

قوعام قايراتكەرى مەملەكەت باسشىسىنىڭ «كەلەسى جىلى بىرقاتار اۋىلدىق وكرۋگ اكىمدەرىنىڭ تىكەلەي سايلاۋىن وتكىزۋگە بولادى دەپ ويلايمىن» دەگەن تۇجىرىمىن تىلگە تيەك ەتتى. «وسى ۇستانىم نەگىزىندە كەلەشەكتە اۋداندار مەن قالا اكىمدەرىندە تىكەلەي سايلاۋ كەزەڭى كەلەر. مەنىڭ پرايمەريزگە قاتىسىپ، سول ارقىلى حالىقتىڭ كوزقاراسى مەن پىكىرىن انىقتاۋ باعىتىندا قابىلداعان شەشىمىم – سول قادامنىڭ العىشارتى»، - دەيدى ول.

ساياساتتانۋشى-عالىمنىڭ 2003-2004 جىلدارى «اق جول» قدپ-نىڭ سايلاۋالدى شتابىنا جەتەكشىلىك ەتكەنىن كوپشىلىك جاقسى بىلەدى. ودان كەيىن بىرقاتار لاۋازىمدى قىزمەتتە ابرويلى ەڭبەك ەتىپ، ۇلتتىق قوعامدىق سەنىم كەڭەسىنە دە مۇشە بولدى. قانداي قىزمەتتە جۇرسە دە، وزەكتى ماسەلەلەردى كوتەرىپ، ەل دامۋى جولىندا ايانباي ەڭبەك ەتىپ كەلەدى.

بەرىك ابدىعاليۇلى سەكىلدى مەملەكەتشىل، ۇلتشىل ازاماتتاردىڭ «Nur Otan» پارتياسىنىڭ پرايمەريزىندە بوي كورسەتۋى ساياسي باسەكەلەستىكتى ودان سايىن ارتتىرا تۇسەرى ءسوزسىز.

پارتياىشىلىك سايلاۋعا بۇرىن «اق جول» پارتياسىنىڭ مۇشەسى بولعان قوعام بەلسەندىسى عالىم بايتوق تا قاتىسىپ جاتىر.

«پرايمەريز مۇمكىندىكتەر تەرەزەسى جانە پاندورا جاشىگى. اكىمشىلىك رەسۋرستار قولىندا بار اكىمدەر ءتۇرلى قۇرىلىمدارعا ءوز ادامدارىن وتكىزۋى مۇمكىن. سول «Nur Otan» پارتياسىنىڭ جاقتاستار ليگاسى پرايمەريزدىڭ ءادىل ءوتۋىن ءوز باقىلاۋىنا الادى»، - دەيدى ول.

ءيا، «Nur Otan» پارتياسىنىڭ جاقتاستار ليگاسى پرايمەريزدىڭ اشىق ءارى ءادىل ءوتۋىن باقىلاۋدا ۇستاماق. وعان ەۋرازيالىق ينتەگراتسيا ينستيتۋتىنىڭ ديرەكتورى، ۇلتتىق قوعامدىق سەنىم كەڭەسىنىڭ مۇشەسى ەرلان سايروۆ باستاعان توپ مۇددەلى بولىپ وتىر.

جاقتاستار ليگاسىنا مۇشەسى قاتارىندا «سەرپىن» ۇلتتىق ءبىلىم بەرۋ جانە يننوۆاتسيا پالاتاسىنىڭ پرەزيدەنتى، ۇلتتىق قوعامدىق سەنىم كەڭەسىنىڭ مۇشەسى مۇرات ابەنوۆ، ساياساتتانۋشى، ۇلتتىق قوعامدىق سەنىم كەڭەسىنىڭ مۇشەسى مارات شيبۇتوۆ، پۋبليتسيست بيبىگۇل داۋلەتبەكقىزى، «انا ءتىلى» گازەتىنىڭ باس رەداكتورى، پۋبليتسيست جاناربەك ءاشىمجان، بەلگىلى بلوگەر ياكوۆ فەدوروۆ سەكىلدى ازماتتار بار.

ايتا كەتسەك، پارتيا ليدەرى نۇرسۇلتان نازارباەۆتىڭ تاپسىرماسىمەن «Nur Otan» پرايمەريزى ەلىمىزدىڭ پارتيالىق-ساياسي دامۋ تاريحىندا تۇڭعىش رەت رەسپۋبليكالىق پارتياىشىلىك سايلاۋ اۋقىمىندا وتەدى.

پارتيا توراعاسىنىڭ ءبىرىنشى ورىنباسارى باۋىرجان بايبەك پرايمەريز – ەلباسى جاريالاعان «Nur Otan» پارتياسىن «قايتا جانداندىرۋدىڭ» ماڭىزدى بولىگى بولىپ تابىلاتىن پارتياىشىلىك دەموكراتيانىڭ زاماناۋي تەتىكتەرىنىڭ ءبىرى ەكەنىن اتاپ ءوتتى.

Abai.kz