ۆاشينگتون يراننىڭ بىرقاتار مەكەمەلەرى مەن ادامدارىنا قارسى جاڭا سانكتسيالار ەنگىزدى. ولاردىڭ اراسىندا يران بالۋانى ناۆيد افكاريدى ءولىم جازاسىنا كەسكەن سۋديا دا بار.

بەيسەنبى كۇنى اقش-تىڭ يران جانە ۆەنەسۋەلا بويىنشا ارنايى وكىلى ەلليوتت ابرامس سەناتتىڭ سىرتقى ىستەر بويىنشا كوميتەتىندەگى وتىرىستا سويلەپ، تەگەرانعا قارسى ساكنتسيالاردى كەڭەيتۋ تۋرالى ايتقان.

ناۆيد افكاري ەكى جىل بۇرىن ۇكىمەتكە قارسى وتكەن نارازىلىق اكتسيالار كەزىندە كۇش قۇرىلىمدارى قىزمەتكەرلەرىنە پىشاق سالىپ ءولتىردى دەگەن ايىپپەن بيىل قىركۇيەك ايىندا ءولىم جازاسىنا كەسىلگەن. بۇل ءىس الەمدە رەزونانس تۋعىزىپ، ترامپ تەگەراندى سپورتشى ءومىرىن ساقتاپ قالۋعا شاقىرعان.

سەناتتاعى تىڭداۋ كەزىندە بىرقاتار دەموكراتتار ترامپتىڭ يرانعا قارسى جاساپ جاتقان ءىس-ارەكەتىن سىنادى. ولار تەگەرانمەن 2015 جىلى كەلىسىلگەن كەلىسىمنەن شىعۋ تۋرالى اق ءۇيدىڭ شەشىمى دۇرىس ەمەس بولعانىن بىلدىرگەن.

دەموكرات- سەناتور تيم كەين بۇل كەلىسىمنەن باس تارتۋ — سولتۇستىك كورەيامەن وسىعان ۇقساعان كەلىسىمگە كەلۋدى قيىنداتادى دەدى.

ۆاشينگتون تەگەرانمەن قۋاتتى التى دەرجاۆانىڭ (اقش، فرانتسيا، ۇلىبريتانيا، قىتاي، رەسەي جانە گەرمانيا) ورتاسىندا قۇرىلعان كەلىسىمنەن 2018 جىلى شىعىپ كەتكەن. ترامپ كەلىسىم يراندا يادرولىق قارۋدىڭ پايدا بولۋىنىڭ الدىن الماي وتىرعانىن مالىمدەپ، تەگەرانعا قارسى جاڭا سانكتسيالار ەنگىزگەن.

Abai.kz