سارسەنبى, 28 قازان 2020
COVID-19 قازاقستاندا. جۇقتىرعاندار — 110832. جازىلعاندار — 105883. قايتىس بولعاندار — 1825
مادەنيەت 659 0 پىكىر 30 قىركۇيەك, 2020 ساعات 17:57

سىر ساحناسىنىڭ ساڭلاقتارى

 

 

 

قىزىلوردا قالاسىنداعى «ادەمى» بالالار مۋزىكالىق تەاتر-ستۋدياسىنىڭ «تاۋسىلماسىن ەرتەگىم» قويىلىمى جۋىقتا «شىعارماشىل جاستاردى قولداۋ جونىندەگى ءىس-شارالاردى ۇيىمداستىرۋ» الەۋمەتتىك جوباسىنىڭ گرانتىن ۇتىپ الدى. قۇرىلعانىنا نەبارى 4 جىل بولعان بۇل ۇجىم مىڭداعان كورەرمەننىڭ كوزايىمىنا اينالدى. بۇگىن وسىعان بايلانىستى تەاتردىڭ رەجيسسەرى ەرعازى ابجاليەۆتى اڭگىمەگە تارتقان ەدىك.

- اۋەلى «ادەمى» بالالار مۋزىكالىق تەاتر-ستۋدياسىنىڭ تاريحىنا توقتالا كەتسەڭىز.

- جالپى تەاتر مەكتەپ وقۋشىلارى مەن بۇلدىرشىندەر ءۇشىن 2016 جىلدىڭ ناۋرىز ايىندا قىزىلوردا وبلىستىق فيلارمونياسىندا اشىلدى. كوركەمدىك جەتەكشىسى «مادەنيەت سالاسىنىڭ ۇزدىگى» توسبەلگىسىنىڭ يەگەرى قۇرمانبەك بورانباەۆ، رەجيسسەرى مەن - ەرعازى ابجاليەۆ. العاش قۋىرشاق تەاترىنىڭ شىمىلدىعى گريگوري وستەردىڭ «مازاسىز ءتيىن» اتتى قويىلىمىمەن اشىلدى. سپەكتاكل جەلىسىندە جان-جانۋارلار وبرازى ارقىلى دوستىق پەن قامقورلىق دارىپتەلەدى. ۇلكەنگە قۇرمەت، كىشىگە ىزەت جانە السىزگە كومەك كورسەتۋ سىندى ادامي قۇندى قاسيەتتەر بەينەلەندى. ونەر ۇجىمىنىڭ قويىلىمى تەگىن كورسەتىلدى. قىزىقتى ەرتەگى كەيىپكەرلەرىمەن قاۋىشقان بالالارعا بۇل تاماشا تارتۋ بولدى. ارتىستەردىڭ بارلىعى ارنايى كوركەمدىك ىرىكتەۋ بايقاۋىنان وتكەن جەرگىلىكتى جاس ونەرپازدار.

- تەاتردىڭ قالىپتاسۋ كەزەڭىندە قيىندىقتار بولدى ما؟ قازىر قانداي قويىلىمدارىڭىز بار؟

- شىنىن ايتۋ كەرەك، تەاتردى نولدەن قۇرۋ وڭايعا سوققان جوق. قىزىلوردا وبلىستىق فيلارمونيا باسشىلىعى بىزگە جان-جاقتى قولداۋ كورسەتتى، سەنىم ءبىلدىردى. كاستينگتەن وتكەن جاستارمەن بار كۇش-جىگەرىمىزدى سالىپ جۇمىس ىستەدىك. ولار ستۋدەنت بولدى. سوندىقتان، بارلىعىن باسىنان باستادىق. ءبىز جاستاردى تاڭداعاندا، ەڭ ءبىرىنشى، ميميكاسىنا اسا ءمان بەردىك. ارتىستەر ساحنادا قويىلىم قويعاندا بالالار ولارمەن بىرگە ەرتەگىلەر ەلىنە ساياحات جاساپ، كەرەمەت اسەر الۋى كەرەك. سونىمەن بىرگە ساحنا مادەنيەتىن، ءتىلى مەن كوركەمدىلىگىن بارىنشا ۇعىندىرۋعا تىرىستىق. قازىر جامان ەمەس. جاستار ءبىراز تاجىريبە جيناقتادى. قازىرگى تاڭدا ۇجىمنىڭ قورجىنىندا 7 مۋزىكالىق قويىلىم بار. اتاپ ايتقاندا، ورىس اقىنى ن.گەرنەتتىڭ «بالاپان قاز»، گ.وستەردىڭ «مازاسىز ءتيىن»، ناۋرىز مەيرامىنا ارنالعان «ناۋرىز-ارۋ»، «كەرعۇلا اتتى كەندەباي» اتتى قازاق ەرتەگىسىنىڭ جەلىسىمەن قويىلعان «كەندەباي» قويىلىمى، «عالامشار شىرشاسى» جاڭا جىلدىق بالالار ەرتەڭگىلىگى، تسيرك-تريۋكتەرىمەن قويىلعان «كلوۋنادا» ويىن-ساۋىق قويىلىمى بار.

- تەاتردىڭ جۋىقتا «شىعارماشىل جاستاردى قولداۋ جونىندەگى ءىس-شارالاردى ۇيىمداستىرۋ» الەۋمەتتىك جوباسىنىڭ گرانتىن ۇتىپ العانىن ەستىدىك. جالپى مۇنداي كومەكتەردىڭ سىزدەر ءۇشىن ماڭىزدىلىعى قانداي؟

- شىعارماشىل جاستاردى قولداۋ جونىندەگى الەۋمەتتىك جوبانى قر اقپارات جانە قوعامدىق دامۋ مينيسترلىگىنىڭ قولداۋىمەن «ازاماتتىق باستامالاردى قولداۋ ورتالىعى» كەاق مەملەكەتتىك گرانتىنىڭ شەڭبەرىندە «لوگوس-قاراعاندى» مۇگەدەكتەردى وڭالتۋ ورتالىعى جۇزەگە اسىردى. جالپى «ادەمى» سياقتى جاس ونەر ۇجىمدارى ءۇشىن مۇنداي قولداۋدىڭ ماڭىزى زور. ول شىعارماشىلىق تۇرعىدا دامۋعا، العا ۇمتىلۋعا ىنتالاندىرادى. ءبىز قازىر بۇعان قوسا، ماسكەۋدە وتەتىن تەاتر ۇجىمدارىنا ارنالعان تتت فەستيۆالىنە دە قاتىسقالى جاتىرمىز. ءوتىنىش بەرىپ قويدىق، دايىندىق ءجۇرىپ جاتىر.

- اڭگىمەڭىزگە راحمەت! شىعارماشىلىق تابىس تىلەيمىن.

0 پىكىر