جەكسەنبى, 17 قاڭتار 2021
46 - ءسوز 1708 3 پىكىر 13 قازان, 2020 ساعات 14:16

قازاق قوعامى قانداي قورىتىندى جاسايدى؟

سوڭعى كەزدەگى ساياسي وقيعالار جايلى كوپ تولعانام. سوناۋ بەلارۋستاعى ءبىر اي قارسىلىق. اناۋ تاۋلى قاراباق ءۇشىن ءازىربايجان-ارميان سوعىسى. مىناۋ قىرعىزداعى رەۆوليۋتسيادان گورى توڭكەرىس دەپ اتاۋعا كوبىرەك كەلىڭكىرەيتىن قارادۇرسىن وقيعا.

شىن مانىندە باجايلاپ قاراساق، بۇل وقيعانىڭ ءبارى دە قازاق مەملەكەتتىگىنە تونگەن قاۋىپتىڭ سيگنالدارى دەۋگە بولادى. قازاق قوعامى بۇدان وزىنە قانداي قورىتىندى جاساي الار؟!

ەلدىڭ جاپپاي ساياسيلانۋ ءۇردىسى قوعامدى دەموكراتيالاندىرۋ ءۇشىن جاقسى قۇبىلىس. ايتسە دە، ساياسي كوزقاراس ءۇشىن اعا ءىنىنى، بالا اكەنى قۇربانعا شىعارعان كۇنى كەشەگى تاريحىمىزدى قايتالاماۋعا ەستىلەردىڭ اقىلى جەتەر دەيمىن. ليۋستراتسيا، ونىڭ ار جاعىنان باسى قىلتيىپ تۇرعان ەكسپروپراتسيا، ونىڭ ار جاعىنان باسى قىلتيىپ تۇرعان رەپرەسسيا دەگەندەر كۇنى كەشە باستان كەشكەن زوبالاڭ. ءتىپتى ويلاۋدىڭ ءوزى قورقىنىشتى زات.

ءار ادام قىمبات بىزدە. ءار اقىماقتىڭ بەلىندەگى ۇرقى قىمبات حالدەمىز، پايىمداپ قاراساق. بەس كۇن قارىن تويعانعا ءماز بولىپ، وتكەندى ۇمىتۋعا بولمايدى.

ءار ەلدىڭ تاۋلى قاراباعى بولۋى مۇمكىن. اينالاسىنداعى ەلدەرمەن شەكارا ماسەلەسىن كونفليكتىسىز رەتتەگەنىمىزبەن، قاۋىپ سەيىلدى دەۋگە استە بولمايدى. وزگە ۇلت وكىلدەرى كوپ شوعىرلانعان جەرلەردەگى سەپاراتيزم قاۋپىن بىلتىر ايقىن سەزىنگەنىمىزدى ۇمىتپايىق. تىعىرىقتان شىعارار جول — ۇلتارالىق قاتىناستاردى قايتا قاراۋ مەن دەموگرافيالىق ءوسىم عانا.

كورشى قىرعىز ەلى تاۋەلسىزدىك العان تۇستاردا، 90-جىلدار باسىندا قازاقستانمەن سالىستىرعاندا ساياسي جاعىنان الدەقايدا تۇراقتى دەپ ەسەپتەلگەن ەدى. الايدا، ارادا وتكەن وتىز جىل بۇل ارا قاتىناستى 180°-قا وزگەرتتى. ءبىز قالاساق تا، قالاماساق تا، شىندىق — وسى. الايدا، بۇعان قاراپ توقمەيىلسۋگە مۇلدە بولمايدى. ارتىنان جارىلاتىن بومبا ءبىزدىڭ مەملەكەتتە دە جەتەرلىك. وسىعان جول بەرسەك، قىرعىز وقيعالارى ويىنشىق بولىپ قالۋى مۇمكىن. بۇنى اۋەلى بيلىك ويلانسا كەرەك-ءتى.

ەرتەڭىمىز ويران بولماسقا بۇگىن ويلان، قازاق!

ۋايس ەرسايىنۇلىنىڭ جازباسى

Abai.kz

3 پىكىر