قازاقستان پرەزيدەنتى قاسىم-جومارت توقاەۆ كورشى قىرعىز ەلىندەگى ساياسي وقيعالارعا قاتىستى پىكىر ءبىلدىرىپ، پرەزيدەنت جەەنبەكوۆتى «قىرعىزستاننىڭ زاڭدى پرەزيدەنتى» دەپ تانيتىنىن ايتقان. بۇل تۋرالى پرەزيدەنت توقاەۆ ءوزىنىڭ «تۆيتتەردەگى» پاراقشاسىندا جازدى.

«پرەزيدەنت س.جەەنبەكوۆ – مەملەكەتتىڭ لەگيتيمدى باسشىسى. سوندىقتان ونىڭ قاقتىعىستاردى توقتاتىپ، ەلدەگى احۋالدى قالىپقا كەلتىرۋگە باعىتتالعان ارەكەتتەرىن قولدايمىن. قازاقستان ءۇشىن قىرعىزستانداعى تۇراقتىلىق ستراتەگيالىق سەرىكتەس ءارى وداقتاس رەتىندە ماڭىزدى», - دەگەن قازاقستان پرەزيدەنتى.

ول سونداي-اق، جەەنبەكوۆتىڭ ەلدەگى جاعدايدى تۇراقتاندىرۋ ءۇشىن جاساپ جاتقان جۇمىستارىن قولدايتىنىن بىلدىرگەن.

«باۋىرلاس قىرعىز ەلىندەگى جاعدايدىڭ بىرتىندەپ كونستيتۋتسيالىق جولعا قايتقانى قۋانتادى. ءبىز بارلىق ساياسي كۇشتەردى قاقتىعىستاردىڭ العاشقى ساتىنەن اق سابىرعا شاقىردىق»، - دەيدى توقاەۆ.

ايتا كەتەيىك، 4 قازاندا قىرعىزستاندا پارلامەنت سايلاۋى وتكەن. وعان ۇزىن-ىرعاسى 16 ساياسي پارتيا قاتىسقان. سايلاۋدىڭ قورىتىندى ەسەپتەرى جاريالانعاننان باستاپ، ساياسي كۇشتەر بىشكەكتىڭ «الا-توو» الاڭىندا نارازىلىق اكتسيالارىن باستاعان. ونىڭ ارتى توڭكەرىسكە ۇلاسقان.

بىرنەشە كۇنگە سوزىلعان ساياسي توڭكەرىستەن سوڭ، قىرعىزستاننىڭ پرەمەر-ءمينيسترى، پارلامەنت سپيكەرلەرى مەن بىرنەشە قالانىڭ مەرلەرى ءوز ەرىكتەرىمەن دوعارىسقا كەتتى. سايلاۋدىڭ ناتيجەلەرى جويىلىپ، قايتا سايلاۋ وتكىزۋ تۋرالى شەشىم قابىلداندى. پارلامەنتكە وتپەي قالعان وپپوزيتسيا جەڭگەن پارتيالاردى «اكىمشىلىك رەسۋرستاردى پايدالاندى، داۋىستى ساتىپ الدى»، دەپ ايىپتاعان.

6 قازاندا، تۇندە نارازى حالىق «اق ءۇي» مەن پارلامەنتتى باسىپ العان. سول كۇنى نارازىلار تۇرمەدە وتىرعان بىرنەشە ساياساتكەردى قاماۋدان بوساتقان. ولاردىڭ اراسىندا ەكس-پرەزيدەنت المازبەك اتامباەۆ پەن ەكس-دەپۋتات سادىر جاپاروۆ تا بولدى.

10 قازاندا سادىر جاپاروۆ پرەمەر-مينيستر قىزمەتىنە بەكىتىلگەن. كەيبىر دەپۋتاتتار ونىڭ قىزمەتكە تاعايىندالۋىنىڭ زاڭدىلىعىنا كۇمان كەلتىرەدى.

بۇعان دەيىن سوورونباي جەەنبەكوۆ «مەملەكەت قۇقىقتىق جولعا ورالعان سوڭ پرەزيدەنت قىزمەتىنەن كەتۋگە دايارمىن»، دەگەن.

ەستەرىڭىزگە سالا كەتەيىك، وسىعان دەيىن بىرىككەن ۇلتتار ۇيىمى سوورونباي جەەنبەكوۆتى قىرعىزستاننىڭ لەگيتيمدى پرەزيدەنتى دەپ ساينايتىنىن مالىمدەگەن.

Abai.kz