2013 جىلى توعىزىنشى تامىز قازاق ەلىنە (شەتەلدەگى اعايىن وسىلاي اتاۋعا نيەتتى، جۇرەكتەرىنە جىلى تيەدى، ول كۇندەردىڭ اۋىلى دا الىستا ەمەس بولار) ەل اعاسى جاكەڭ اقساقال، ءجانابىل سىماعۇلۇلى كەلەدى ەكەن ، - دەگەن سىبىس ەمىس-ەمىس ەستىلىپ، ەلەڭدەپ جۇردىك. بۇل ۋاقىت الماتىداعى اعايىنداردىڭ اسىرەسە كەرەي اتا بالالارىنىڭ ابىلايحان زامانىنىڭ ايتۋلى باتىرلارىنىڭ ءبىرى، داڭىقتى قولباسشى، التايعا ەل قوندىرعان ەر جانىبەك بەرداۋلەتۇلىنىڭ 300 جىلدىق مەرەيتويىنا قىزۋ كىرىسكەن كەزى ەدى. كۇندە جيىن، كۇندە توي. مەن قوسىمشا «ەر جانىبەك» حالىقارالىق قوعامدىق قورىنىڭ اتقارۋشى ديرەكتورى قىزمەتىن اتقاراتىندىقتان، جالپى قوردىڭ شاۋىپ كەل، بارىپ كەلى مەنىڭ موينىمدا بولاتىن، سوندىقتان ۇلكەن كىسىنى كۇتىپ الۋ شاراسىن ۇيىمداستىرۋ دا ماعان جۇكتەلدى.

اسەرلى كەزدەسۋدىڭ القيساسىن باستاماس بۇرىن، شەتەلدەگى قانداستارىمىزعا ەسىمى ەتەنە تانىس بولعانىمەن قازاق ەلىندەگى اعايىننىڭ كوبىسى ءجانابىل ەسىمىنەن بەيحابار ەكەنى انىق. سوندىقتان، الاشتان اتى وزعان اسىل ازاماتى تۋرالى قىسقاشا توقتالا كەتسەم ارتىق بولماسى انىق.

ءجانابىل سىماعۇلۇلى قىتايداعى قازاقتاردىڭ اراسىنان شىعىپ،  «قارادان تۋىپ حان بولعان» وسى زامانىمىزدىڭ زاڭعار تۇلعالارىنىڭ ءبىرى. قىتاي جاڭا ۇكىمەتى قۇرىلعان 70 جىلدىق تاريحىندا ءجانابىلدىڭ دەڭگەيىنە جەتىپ قىزمەت جاساپ، بيلىك جۇرگىزگەن قازاق بولعان جوق. سەكسەنگە كەلگەن زەينەت جاسىنداعى اقساقالعا شەتەلدىڭ ءار ەلىنەن كەلگەن اتامەكەندەگى اعايىننىڭ تايلى-تۇياعى قالماي قۇراق ۇشا الدىنان شىعىپ، ايىرىقشا قۇرمەت-قوشامەت كورسەتۋى سونداي بيىك ابروي-بەدەلىنىڭ كورىنىسى ەدى.

ءجانابىل سىماعۇلۇلى - 1934 جىلى ماۋسىمدا التاي ايماعىنا قاراستى قابا اۋدانىندا دۇنيەگە كەلگەن. قىتاي مەملەكەتتىك باسقارۋ ورگانىندا ەڭ جوعارعى لاۋازىمعا تاعايىندالىپ، ابرويلى قىزىمەت اتقارعان تاريحي تۇلعا. ول  قحر شينجياڭ ۇيعىر اۆتونوميالى رايوندىق ساياسي كەڭەس كوميتەتىنىڭ بۇرىنعى توراعاسى، قادىرمەندى ەل اعاسى جاكەڭ قىتاي كوممۋنيستىك پارتياسى (ككپ) بۇكىل مەملەكەتتىك پارتيا مۇشەلەرى قۇرىلتايىنىڭ ىلگەرى-كەيىندى التى كەزەك ۋاكىلى (دەپۋتات), بەس كەزەك قكپ ورتالىق كوميتەتىنىڭ كانديدات مۇشەسى بولىپ، پارتيا مەن مەملەكەتتىڭ زور ىستەرىن تالقىلاۋعا قاتىناسقان بىردەن-ءبىر قازاق.

جۇبايى ءزۇپيرا ىبىرايقىزى شينجياڭ حالىق راديو ستانتسياسىنىڭ قازاق تىلىندەگى ادەبيەت-كوركەمونەر ءبولىمنىڭ شاڭىراعىن كوتەرىسكەن، قىتاي قازاقتارىنىڭ العاشقى بۋىن اقپارات قارلىعاشتارىنىڭ ءبىرى. قازاقتىڭ قادىرلى شاڭىراعىنا اينالعان ءجانابىل اۋلەتى بۇگىندە جىگەر، ءمارينا، ءاليا، جارقىن ەسىمدى ۇل-قىزدارىن ءوسىرىپ، نەمەرەلىرىن الديلەپ وتىرعان قۇتتى وردا.

ءسوز ىرەتى كەلگەندە ايتا كەتەيىن، ۇلكەن ۇلى جىگەر اقش-تىڭ گارۆارد ۋنيۆەرسيتەتىنەن دوكتورلىق اتاعىن قورعاپ، ەلىمىز تاۋەلسىزدىگىن العان جىلدارى ەلگە ورالعان العاشقى ازاماتتاردىڭ ءبىرى. اتاعىن ات كوتەرە الماس اتانىڭ بالاسى بولا تۇرا، قاراپايىم ەلدىڭ قاتارىندا، اعارتۋشىلىق سالاسىندا قىزمەت اتقارىپ جۇرگەن، كوپ بالالى وتباسىنىڭ وتاعاسى. ەگەر جىگەر وسىنداي اتاق، بىلىمىمەن قىتاي ەلىندە تۇراقتاعاندا قالاعان جەرىنە قىزمەتكە ورنالاسىپ، «ۇرتتاپ ءىشىپ، شايقاپ توگىپ»، دەگەنىن ىستەپ جۇرەتىن حانزادالاردىڭ ءبىرى بولاتىنىنا ەشكىمنىڭ كۇمانى بولماس. بىراق، اڭعارلى اكە-شەشە، كورەگەندى ۇرپاق تاعدىرىن تۋعان ەلى، اتاجۇرتىمەن توعىستىردى. ابىرويلى اتاق، شالقىعان داۋلەتتىڭ ورتاسىندا وتىرىپ مۇنداي شەشىم جاساۋ بەيبىت كۇندەگى وتانسۇيگىشتىكتىڭ، ۇلتجاندىلىقتىڭ شىنايى كورىنىسى بولار، تالاي ەلگە وي سالار تاعىلىمدى مىسالدىڭ ءبىرى بولاتىن.

الىستان كەلگەن جولاۋشىنىڭ الدىنان شىعىپ، اتىن بايلاپ وسكەن اتا بالاسىمىز عوي، بۇل جولى دا سولاي بولدى. قادىرلى ەل اعاسى جاكەڭ استانا ساپارىن اياقتاپ، الماتىعا كەلگەن كۇننىڭ ەرتەسىندە مەدەۋ شاتقالىنداعى «سامال» رەستورانىنا، اق سارباسىمىزدى اتاپ سويىپ قونالقى ورنالاستىردىق. ون نەشە جىگىت ۇلكەن كىسىنىڭ اتىنىڭ شىلبىرىن ۇستاپ، قولتىعىنان دەمەپ، تورگە جايعاستىردىق. قاسىندا جۇبايى ءزۇپيرا ىبىرايقىزى، قىز-كۇيەۋى ءاليا مەن سىزدىق، كەلىنى نۇرعانىم، كومەكشىسى مەن دارىگەرى بىرگە كەلدى. 

كۇتىپ الۋشى ازاماتتاردىڭ قاتارىندا ساياساتكەر مارات ۋاتحانۇلى جۇبايى ايگۇل تۇركياقىزى، شىعىستانۋشى عالىم جانىمحان وشانۇلى، ءانشى-سازگەر وكەن تاڭسىحانۇلى، جۇباي انشىلەر قۇرمانبەك پەن ريزا، اقىن داۋلەتكەرەي كاپۇلى، كاسىپكەرلەر مەرەي ءسىلامۇلى، ەرجان شارىپحانۇلى، وقان ابدىراقۇلى (بۇگىندە مارقۇم) ءدىلداحان دالەلۇلى، جەڭىس تۇركياۇلى، ايبىن اۋباكىرۇلى، عىلىمحان قاليۇلى، قاماتاي جاكەنۇلى، نۇرمان ديارۇلى، ورازبەك بازاربايۇلى قاتارلى ازاماتتار بىرگە بولىپ، ۇلكەن كىسىگە دەگەن اقجارما تىلەكتەرىن ايتىپ، امان-ساۋلىق تىلەسىپ، ارنايى العان قۇندىز شاپان، وقالى توندى ارقالارىنا جاپتى. جانىمحان اعا ءوز كەزەگىندە شىعىستانۋ ينستيتۋتىنان شىققان «قىتاي جازبالارىنداعى قازاققا قاتىستى دەرەكتەر» دەگەن ەكى تومدىق عىلىمي ەڭبەگىن ۇسىندى. بۇل ازاماتتاردىڭ بارلىعى تاۋەلسىزدىكتىڭ العاشقى جىلدارى ەلگە ورالىپ، ءار سالادا قىزمەت اتقارىپ جەتىستىككە جەتكەن تانىمال تۇلعالار ەدى.

داستارحاننىڭ اسابالىق مىندەتى ماعان جۇكتەلگەندىكتەن جاسىنا قاراي ءسوز بەرىپ، جاقسى وتىرىسىمىزدى جالعاستىرىپ وتىردىم. تورىمىزدە تورەدەي بولىپ جاكەڭ اقساقال وتىرعاندىقتان داستارحانىمىزدىڭ دۋمانى ارتا ءتۇستى. وكەن، قۇرمانبەك، ريزالاردىڭ سالعان اندەرىن سۇيىنە تىڭداپ، قايتا-قايتا ايتتىرىپ، جۇبايى ەكەۋى قوسىلا ايتىپ، ەمەن-جارقىن كوڭىلدى وتىردى. اقىن داۋلەتكەرەيدىڭ كوشكەن ەلدىڭ كەرۋەندى كەشىرمەسىمەن ورىلگەن «تامىر» تولعاۋىن ىجداعاتتىقپەن تىڭداپ بولعاسىن «جارايدى، ءبارىن قامتىعان ەكەنسىڭ عوي»، - دەپ ريزاشىلىعىن ءبىلدىردى. ۇلكەن كىسى ولەڭنىڭ ىشكى ءمانىن ءبىر كىسىدەي تۇسىنەتىن، ۇلت رۋحانياتىنىڭ شىنايى جاناشىرى بولعان تۇلعا. قىتايداعى قازاق ايتىس ونەرىنىڭ بۇگىنگىدەي جارقىراپ تاريح ساقىناسىنا كوتەرىلۋىنە، ايتىسكەرلەردىڭ جان-جاقتىلى جاعدايىنىڭ جاقسارۋىنا ءبىر كىسىدەي ىقپال جاساعان قايراتكەر، بۇل ءسوزىمدى ارعى-بەرگى بەتتەگى ايتىسكەر اقىندار دا قۇپتايتىنى ەش كۇمان تۋدىرمايدى.

ءسوزىمنىڭ دالەلى ىرەتىندە، ەل اراسىندا ايتىلىپ جۇرگەن، اسىرەسە ەل اعاسى جاكەڭ تۋىپ وسكەن التاي بەتىندە، قابا توپىراعىندا شەجىرەدەي شەرتىلىپ بۇگىنگە جەتىپ، سانامىزعا ساقتالعان كونە كوزدەردىڭ مىنا ءبىر اڭگىمەسىن ايتا كەتۋدىڭ دە قيسىنى كەلىپ تۇر. ول ايتپاعىم قىتاي قازاقتارى اراسىندا ءومىر سۇرگەن حالىق اقىنى باتەش  داعىستانقىزىنىڭ (1909-1976 ج.ج.) ءبىر شۋماق ولەڭمەن ءبىر ات العان وقيعاسى ەدى. باتەشتىڭ كۇيەۋى التاي بەتىنە اڭىز بولعان اتاقتى باتىر، جورتۋىلشى اتىك جاپارۇلى (1899_1988 ج.ج.)  

1975 جىلى شىلدە ايىندا، سول كەزدە ىلە قازاق اۆتونوميالى وبىلىستىق پارتكومنىڭ حاتشىسى، وبىلىس باستىعى بولعان ءجانابىل سىماعۇلۇلى قابا  اۋدانى كولباي اۋىلدىعىنداعى اتىك پەن باتەشتىڭ كورشىسى، سول كەزدەگى كولباي كومۋناسىنىڭ ورىنباسار حاتشىسى شاعىبان دەگەن كىسىنىڭ ۇيىنە قوناققا كەلەدى، شاعىبان ارنايى باتەشتى شاقىرىپ، ءتۇن ورتاسىنا دەيىن ولەڭ ايتقىزادى. باتەش كۇيەۋى اتىكتىڭ جورتۋىلعا شىعىپ، قولدى بولعانىن، جەرگىلىكتى ۇلىقتاردىڭ الدىنا ولەڭمەن ارىز ايتىپ بارعان باتەشتىڭ كۇيەۋىن تۇرمەدەن قالاي الىپ شىققان بارىسىن ولەڭمەن ايتىپ، وتىرعانداردى تاڭ قالدىرادى. باتەش  رۋلىق جاقتان جاكەڭنىڭ جاقىن اپايى بولىپ كەلەتىنى بار ەكەن. ولەڭ ايتىلىپ بىتەر ساتتە ەل اعاسى جاكەڭ: جارايدى اپاي، دەنساۋلىعىڭىز جاقسى، ولەڭىڭىز دە ءباز-باياعىسىنداي ەكەن. راحمەت سىزگە، تاعى نە ايتارىڭىز بار، - دەگەندە، باتەش جالعاستى ولەڭدەتە جونەلەدى:

بەرەيىن ولەڭ ايتىپ باۋىرىما،
باۋىرىم تۇسەل ءتۇستى اۋىلىما.
ءبىر كەزدە جورتۋىلمەن اتى شىققان،
جەزدەڭنىڭ التاي مەنەن ساۋىرىڭا.
ولەڭمەن تاس تۇرمەدەن الىپ شىققام،
بۇل ءمالىم التىن التاي قاۋىمىنا.
سول سورلى جەزدەڭدە ءالى بۇت ارتار جوق،
شىقپاي جۇر جىرعاپ ءارى قارىعى دا.
جاقسىدان ءبىر شاراپات كەلدى بىلەم،
باۋىرىم كەلدى اتىكتىڭ سالىمىنا، - دەگەندە وتىرعاندار بارەكەلدى ايتىپ، دۋ قول شاپالاق سوعادى، ەل اعاسى جاكەڭ: 

- ءاي، مىنا اتىككە ءبىر ات بەرمەسە بولمايدى ەكەن، - دەپ سول جەردە، شاعىبانعا اتىك باتىردىڭ ءمىنىس كولىگى ءۇشىن ءبىر ات بەرۋدى تاپسىرادى. سول كوك اتتى مارقۇم اتىك  باتىر ءومىرىنىڭ سوڭىنا دەيىن ءمىنىس كولىگى ەتىپ، جاكەڭە راحمەتىن ايتىپ جۇرەدى ەكەن.

رۋىمەن ۇيىسقان ۇلتتىڭ ۇرپاعىمىز عوي. ورتا ءجۇزدىڭ ءبىر بۇتاعى كەرەي اۋلەتىنىڭ شىبارايعىر اتاسىنان تارايتىن جاكەڭ اقساقالمەن دە سول جاعىنان قاندىق جاقىندىعىمىز بار ەدى. الماتىدا اعالارىما ەركەلەپ شىبارتاي اتالىپ جۇرگەن مەن جاكەڭ اتا كەلگەندە ءتىپتى كىشىرەيىپ قالدىم. ارەدىگىندە اعالار ولەڭ وقىپ بەرۋىمدى سۇراعاندىقتان ۇلكەن كىسىگە تانىستىق بىلدىرە ءوزىمنىڭ قابادا تۋعانىمدى، ول كىسىنىڭ اتا قونىسى، اكە-شەشەسىنىڭ زيراتى جاتقان شىباراعاش، قاراشوقى جايلاۋلارى تۋرالى ايتا كەلىپ،

تامىزدىڭ جەلى بەتىمە وبەتىن،
تاڭ اتا-انام موسى كەرەتىن.
بيشىگىن اكەم بەلىنە العاندا،
ساركىدىر ساۋلىق مەكىرەنەتىن.
قورالى وتار سوسىن ورەتىن.

شاتقالدا وسكەن شۇعۇنىعىڭنان،
شاتتىقتىڭ شەكسىز سىرىن ۇعىنعام.
سۋرلى سايدىڭ سامالى جەلپىپ،
سەزبەدىم قىردىڭ سۋعىن ۇرعان.

جىلقىلى جۇرتقا ۇناعاسىن با؟
ارسىلدايدى ارلعان ءتۇن اراسىندا.
تۇسامىسىمەن تىقىرشىپ تۇرار،
تۇمارلى تورىم تۇما باسىندا.

ءتىلسىمى سان مىڭ تاۋدىڭ ۇقتىراتىن،
ۇلىلار سالعان ءان قۇنىقتىراتىن.
سارقىمىز بوككەن سابانىڭ داۋسىن،
ساباۋدىڭ ءۇنى جاڭعىرىقتىراتىن.

ءتورت تۇلىك تۇگىل عاشىق اڭداردا،
كۇرەڭشە كۇلگەن جاسىل اڭعارعا.
قوسناۋا باسىن قورىس قىلاتىن،
بۇعى بەيباقتار اشىلاعاندا.

ءار كەزەڭ سايىن ارلى اۋىل قونعان،
اسىرعان شىڭى ارمانىڭدى ايدان.
جەڭگەلەر العان بارماعى بالدان،
سارىاتان شوككەن سارىقارىن مايدان.
ايرانىڭ قايران، قايماعىڭ قايران.

تاۋىن جىر ەتىپ، تاسىن جىر ەتىپ،
ءاز جانىن وتەر اقىن جۇدەتىپ.
شەكىلدەۋىكشىل شاۋقارعالاردان،
بالقاراعايدىڭ باسىن كۇزەتىپ.، - دەپ كەلەتىن «قاراشوقى» دەگەن ولەڭىمدى وقىپ بولىپ،  سوڭىنان جاكەڭ اقساقالعا قاراپ: 

- كوكە، مىنا اعالارىمنىڭ ءبارى - ، الدىڭدا اعالارىڭ تۇرعاندا سەن تايسىڭ، شۇبار تايسىڭ، - دەپ ءبىر ەسەيتپەي قويدى. جاسىم وتىزعا كەلگەن، ءبىر وتاۋدىڭ يەسى، ەكى بالانىڭ اكەسىمىن، ءوىزڭىز ءبىر ەسەيتىپ كەتىڭىزشى؟ - دەدىم. ءسوزىمدى قالجىڭمەن جالعاي، وتىرعاندار دۋ كۇلىستى. ءوزارا اعايىن اراسىنداعى ءبىزدىڭ اڭگىمەمىز شىنىمەن سولاي ەدى. بەلگىلى عالىم، دوكتور بولاتحان زايادانۇلى، جازۋشى-جۋرناليست دوسان بايمولداۇلى، دوكتور جىگەر ءجانابىلۇلى، كاسىپكەر مەرەي سلامۇلى قاتارلى اعالارىم الدىمىزدا جۇرگەسىن شىنىمەن دە ءىنى، بالا ەدىك. 

بازىنامدى ايتىپ باتا سۇراعانداي بولعان مەنىڭ سوزىمە جاكەڭ اقساقال ءسال جىمىيىپ كۇلىپ قويىپ:

- اينالايىن، ولەڭىڭ كەرەمەت، مەنىڭ جەرلەسىم ەكەنسىڭ عوي. اعالارىڭ ايتسا دۇرىس قوي، ەركەلەپ جۇرگەن جاقسى ەمەس پە؟. ءوزىڭ دە بولايىن دەپ تۇرعان ازامات ەكەنسىڭ. قازاقتا «بەستىنىڭ بەتالىسىنان ساقتا» دەگەن ءسوز بار، سەن سۇرادىڭ، مەن ايتايىن، وندا سەن بەستى بول، - دەدى كوپشىلىكتى مەيىرلى جۇزىمەن ءبىر شولىپ ءوتىپ. اۋىزدارىنا قۇم قۇيىلعان اعالارىم كۇبىرلەسە كۇلىسىپ، شاپالاق سوعىپ مەنى قۇتتىقتاپ جاتتى. العانىم ابرويلى اتاق، دارەجە بولماعانىمەن اعانىڭ وزىمە ارناپ ايتقان ءبىر اۋىز جىلى ءسوزى، ىقىلاس باتاسىنىڭ ءوزى اتانعا بەرگىسىز ابروي عوي، قۋانا بەت سىيپادىم. باسىمداعى تاز كەپەشىم، سول كۇننەن باستاپ ورازبەك باۋىرىما كيىلىپ، اعالارىنىڭ شىبار تايىنا اينالىپ شىعا كەلدى. سودان بەرى اعالار اراسىندا كوك دونەن بولىپ شاۋىپ كەلە جاتقان جايىم بار.

جاكەڭ اقساقالمەن بىرگە بولعان ءتورت بەس ساعاتتىق وتىرىسىمىز جىلعا بەرمەس جىلى جۇزدەسۋ بولىپ ەستە قالدى. جينالعانداردىڭ ءبىرازىنىڭ اكە-شەشەلەرى ۇلكەن كىسىنىڭ قىزمەتىندە بولعان، مەيىر-شاپاعاتىن كورگەن جاندار بولعاسىن بۇل وتىرىسىمىز ەمەن جارقىن، قىزۋ اڭگىمە، سىرلاسۋعا تولى بولدى. اعامىز داستارحاندى اق باتامەن قايىرىپ، رازىلىق ىقىلاسپەن ءسوزىن قايىردى. جۇبايى ءزۇپيرا اپامىز دا انالىق اق تىلەگىمەن العىسىن ايتتى. وسىلايشا زالداعى اعايىن قاۋمالاي قورشاپ، سىرتقا بەتتەدىك. كەربەز سۇلۋداي سىلانعان الماتى، اسىرەسە جاسىل ورمانمەن كومكەرىلگەن مەدەۋ شاتقالى كوركىمەن كوز اربايدى. سايالى تاۋ بوكتەرىندە ەركىمىزگە تيگەن جاكەڭ اقساقالمەن ءبارىمىز جابىلىپ ەستەلىك سۋرەتكە تۇستىك. ەسىك الدىنداعى ارەدىك جينالىستا داۋلەتكەرەي اقىن ۇكىلى دومبىراسىن بەبەۋلەتە:

قۇداي اۋ جىرىم قايدا تازا ءمىنسىز،
قالايشا اعام كەلسە قالام ءۇنسىز؟.
وسپاننان كەيىن ەلگە بيلىك قۇرعان،
الاشقا اڭىز بولعان ءجانابىلسىز....دەي كەلىپ اعامىزعا ارناپ اماندىق، ساۋلىق، اق جول تىلەگەن جىر شۋماقتارىن ارنادى. 

وسىلايشا تامىزدىڭ تامىلجىعان كۇنىندە، «ارعى بەتتەگى الاتاۋدىڭ ءبىر شىڭى» بولعان (اقىن اۋىت مۇقيبەكۇلىنىڭ ءجانابىل سىماعۇلۇلىنىڭ 80 جىلدىق مەرەيتويى قارساڭىندا «دات» گازەتى، Abai.kz اقپاراتتىق پورتالىندا جاريالانعان «الاتاۋدىڭ ءبىر شىڭى ارعى بەتتە» اتتى ماقالاسى جاريالانعان بولاتىن), الاشتىڭ ارداقتىسى، قىتايداعى جۇيەدەن شينجياڭداعى وزگە ۇلتتارمەن قوسا قازاق دەگەن قانداسىن «تۇمسىقتىعا شوقىتپاي، قاناتتىعا قاقتىرماي» قىرىق بەس جىل باسقارعان، ءالى دە رۋحاني تىرەگى بولىپ كەلە جاتقان ناراتتاي نار، تارباعاتايدان تارلان، التايداي اسقاق ابىزىمىزبەن قيماي-قيماي قوشتاستىق.......جاكەڭ اقساقالدىڭ قازاق ەلىنە، الماتىعا كەلۋى مۇنداعى اعايىنعا ۇلكەن رۋحاني كۇش، بۇزىلماس بەرەكە باعىشتاپ كەتكەندەي بولدى.                                

سول كەزدەسۋدە جارقىراپ ارامىزدا وتىرعان اسىل انا، اياۋلى جار ءزۇپيرا اپامىز وسى جىلى ومىردەن ءوتتى. ءبارىمىزدىڭ قابىرعامىزدى قايىستىرعان بۇل اۋىر قازا، حالىق جۇگىن قايىسپاي كوتەرگەن قارا نار جاكەڭ اقساقالعا دا وڭاي تيمەگەنى انىق. ەستەلىكتەر ەسكىرمەيدى، - دەپ ەسكەرمەي جۇرە بەرگەنىمىزبەن قارتتارىمىزدىڭ قاتارى سيرەپ، اعالارىمىزدىڭ اراسى اندىزداپ بارا جاتقانى كوڭىلگە كىربەڭ ۇيالاتادى ەكەن. سوندىقتان، ونەگەلى ومىرىندە وزگەشە ءىز قالدىرىپ، تىرىسىندە اڭىزعا اينالعان الاشتىڭ اردا پرەزيدەنتىمەن كەزدەسكەن ءبىر ءساتىمنىڭ بولىمىسىن سىزدەرمەن دە ءبولىسۋدى ءجون كوردىم.

تالاپبەك تىنىسبەكۇلى

Abai.kz