كيەلى كونە تۇركىستان بۇگىندە كۇن ساناپ تۇرلەنىپ كەلەدى. تۇگەل تۇركىگە رۋحاني استانا بولعان تۇركىستاندى قايتا تۇلەتۋ مەملەكەتتىك ساياساتتىڭ باسىم باعىتتارى ەكەنىن پرەزيدەنت قاسىم-جومارت توقاەۆ تا، ەلباسى نۇرسۇلتان نازارباەۆ تا بىرنەشە مارتە ايتتى. بارلىق قاجەتتى ينفراقۇرىلىمدى دامىتىپ، وبلىس مارتەبەسىنە يە تۇركىستاندى تۋريستىك ايماق ساناتىندا دامىتۋدى مىقتاپ تاپسىردى. وسى باعىتتا اتقارىلعان ءبىراز شارۋاعا ءبىز وتكەندە ءبىر شولۋ جاساپ شىققان ەدىك.

بۇگىندە، تۇركىستاندى حالىقارالىق تۋريستىك ورتالىققا اينالدىرۋ ءۇشىن بىرقاتار ينفراقۇرىلىمدىق جوبالار قولعا الىنعان. حالىقارالىق ستاندارتتارعا ساي جاڭا اۋەجاي اشىلىپ، قولدانىسقا بەرىلدى. ونىڭ ماكسيمالدى پوتەنيالى – جىلىنا 3 ميلليون جولاۋشى دەپ ەسەپتەلگەن. 7 مىڭ ادامعا شاقتالعان سۋ جاڭا «تۇركىستان ارەنا» ستاديونى تاعى بار. «الاتاۋ مەديا ورتالىعى» مەن ءبىر مىڭ ادامعا لايىقتالعان «كونگرەسس حولل» كونتسەرت زالى، جاڭادان اشىلعان مۇراجايلار مەن تەاترلار دا كونە تۇركىستاننىڭ جاڭاشا تۇرلەنۋىنىڭ ايقىن دالەلى.

وسىعان دەيىن مەملەكەت باسشىسى قاسىم-جومارت توقاەۆ تا، ەلباسى نۇرسۇلتان نازارباەۆ تا تۇركىستان وبلىسىنا ارنايى ساپارلاپ بارىپ، ونداعى اتقارىلىپ جاتقان شارۋالاردى ءبىر تياناقتاپ قايتقان ەدى.

بۇگىنگى تاڭدا جۇرتى تىعىز ورنالاسقان، الەۋمەتتىك-تۇرمىستىق ماسەلەلەرى قوردالانىپ قالعان تۇركىستان وبلىسىن قايتا تۇرلەندىرۋ ءۇشىر ىرگەلى ىستەر اتقارىلىپ جاتقانى جاسىرىن ەمەس. قازىر جارتى الەمگە جايىلعان كوروناۆيرۋس پاندەمياسى وزگەلەر سەكىلدى، ءبىزدىڭ دە ەل تۇرمىسىن ەداۋىر تۇرالاتىپ قويعانى بەلگىلى. دەسە دە، بۇكىل ەل بويىنشا جاريالانعان كارانتيندىك شەكتەۋلەرگە قاراماستان تۇركىستان قالاسىندا ءھام وبلىس كولەمىندە قۇرىلىس جۇمىستارى قارقىندى جالعاسىپ جاتىر ەكەن. بۇل تۋرالى وبلىس اكىمدىگىنىڭ ءباسپاسوز قىزمەتىنەن بىلدىك.

تۇركىستان اكىمدىگىنىڭ رەسمي اقپارىنان ۇققانىمىز، قازىرگى ۋاقتا تۇركىستاننىڭ اكىمشىلىك ىسكەرلىك ورتالىعىندا ۇزىن سانى 24 تۇرعىن ءۇي كەشەنىنىڭ قۇرىلىسى ءجۇرىپ جاتىر ەكەن. جۇرگىزىلىپ جاتقان جۇمىستاردى جۋىردا وبلىس اكىمى ومىرزاق شوكەەۆىڭ ءوزى بارىپ تەكسەرگەن. قۇرىلىس كومپانيالارىنا قاتاڭ تاپسىرما بەرىپ، سالىنىپ جاتقان تۇرعىن ۇيلەردىڭ ساپاسىنا ءمان بەرۋدى، سونداي-اق، قۇرىلىس جۇمىستارىن ۋاقىتىلى اياقتاۋدى تاپسىرعان.

اكىمدىڭ مالىمەتىنە سۇيەنسەك، جوعارىدا اتالعان 24 تۇرعىن ءۇي كەشەنىنىڭ 22-ءسىنىڭ قۇرىلىسى بيىلعى جىلدىڭ قاراشا ايىندا اياقتالادى دەپ جوسپارلانىپتى. بۇدان بولەك، وڭىردە تاعى 12 قاباتتى 45 تۇرعىن ءۇي كەشەنىنىڭ قۇرىلىسى ءجۇرىپ جاتىر ەكەن. قازىرگى ۋاقتا بۇل ۇيلەردىڭ قابىرعالارى كوتەرىلۋدە. بۇل ۇيلەر 2021 جىلى پايدالانۋعا بەرىلەدى دەيدى اكىمدىكتەگىلەر.

تۇركىستان وبلىسىندا باسپاناعا سۇرانىس ارتقان. وسىعان وراي، تۇركىستان حالقىن مەملەكەتتىك باسپانامەن قامتۋ ءۇشىن ارنايى يپوتەكالىق باعدارلامالارمەن بەرىلەتىن تۇرعىن ۇيلەردىڭ سانىن ارتتىرۋ جوسپارلانىپتى.

بۇعان قوسا، تۇركىستاندا الەمدە بالاماسى جوق «كەرۋەن ساراي» اتتا تۋريستىك كەشەن قۇرىلىسى دا قارقىندى جۇرىپ جاتىر. بۇل كوپلالانى كەشەن.مۇندا ايگىلى «شىعىس بازارى» مەن ەتنيكالىق فورماتتاعى مەيرامحانالار، قوناقجايلار اشىلاتىن بولادى. سونىمەن قاتار، كونە شىعىس تەاترى، ۇلتتىق ۇلگىدەگى ءدامحانالار، ساياباقتار مەن كەلۋشىلەر دەمۋلاتىن ارنايى جاساندى كولدەر سالىنادى. بۇدان بولەك، شەبەرلەر كوشەسىن اشۋ جوسپارلانعان. وندا ون ساۋساعىنان ونەر تامعان شەبەرلەر مەن ۇستالار تۋرسيتەرگە ارنايى كادەسىيلار سوعىپ، ساتادى.

تۇركىستان وبلىسىنىڭ تۋريستىك الەۋەتىن ارتتىرۋ ماقساتىندا «جەلىلىك ساياباق»، «وقۋشىلار سارايى»، «كونگەرسس حولل»، «اتتراكتسيوندار ساياباعى»، «ياسساۋي مۇراجايى» مەن «دراما تەاتر» قۇرىلىسى دا قارقىندى جۇرگىزىلۋدە. بۇل نىساندار بيىلعى جىلدىڭ سوڭىنا دەيىن ەل يگىلىگىنە بەرىلەدى دەپ جوسپارلانىپتى.

بۇگىندە الەم جۇرتىن ابىگەرگە سالعان پاندەميا داعدارىسىنا قاراماي،  تۇركىستان وڭىرىندە رۋحاني-مادەني، تاريحي ورتلىقتاردى قايتا جوندەۋدەن وتكىزىپ، اباتتاندىرۋ ماقساتىندا بىرقاتار جوبالار قولعا الىنعان.

ءبىر سوزىندە مەملەكەت باسشىسى قاسىم-جومارت توقاەۆ: «تۇركىستان جالعىز قازاقتىڭ عانا ەمەس، كۇللى تۇركى جۇرتىنىڭ كيەلى مەكەنى. تۇركىستان نەشەمە عاسىرلىق ادامزات تاريحىنىڭ كۋاگەرى. جاھانعا ماقتاناتىنداي وركەنيەت جاۋھارى. تۇگەل تۇركى جۇرتىنىڭ ءتاۋ ەتەر تەمىرقازىعىنا اينالعان تۇركىستان – قازاقتىڭ ارعى-بەرگى تاريحىندا ەل باسقارعان تۇلعالاردىڭ ات باسىن بۇرعان التىن ورداسى. ونى دامىتۋ ءۇشىن مەملەكەت قاجەتتى شارالاردى قابىلدايدى»، - دەگەن ەدى.

ال بىرتىلعى جىلعى تۇركىتان ساپارىندا: «مەملەكەت قازىناسىنان بولىنەتىن شىعىستار اۋەلى – ەل-جۇرتتىڭ تۇرمىستىق پروبلەمالارىن، قاراپايىم حالىقتىڭ كۇندەلىكتى ماسەلەلەرىن شەشۋگە جۇمسالۋى كەرەك. ول – اۋىس سۋ ماسەلەسى. ول – تۇرعىن ءۇي مەن باسپانا ماسەلەسى. ول – جۇمىسپەن قامتۋ ماسەلەسى ت.ب. ادامدار جايلى ءومىر ءسۇرۋ ءۇشىن قاجەتتى بارلىق ينفراقۇرىلىمدار جاسالۋى كەرەك. جۇرتتى الاڭداتاتىن نەگىزگى ماسەلە وسى.  بىز، اۋەلى وسى ماسەلەلەردى شەشۋدى مىندەتتەۋىمىز كەرەك. الداعى ۋاقتا مەن مينيسترلەر مەن اكىمدىردىڭ جۇمىستارىن وسىنداي ناقتى ماسەلەلەردى شەشۋ ناتيجەسىمەن باعالايتىن بولامىن»، - دەگەن مەملەكەت باسشىسى.

Abai.kz