ىستەگى كۋاگەرلەردىڭ ءبىرى قۇندىز جولدۋباەۆانىڭ حابارلاۋىنشا، بۇرىنعى پرەزيدەنت سوتقا ءوتىنىش جاساعان.

«مەنى قاماۋدا قالدىرىڭىزدار، ماعان قارسى ەشكىم كۋالىك ەتپەسە دە، 11 جىلعا سوتتادى. ۋاقىت ءبارىن دالەلدەيدى. ءتۇپتىڭ تۇبىندە شىندىق جەڭەتىنىن بىلەمىن. قانات ساعىمباەۆ پەن فاريد نيازوۆ ماعان ادال بولعانى ءۇشىن وتىر. مەن بارىنە توزەمىن. ۇيقاماقتاعىلار ۇيىندە قالسىن. ال قاماۋدا وتىرعاندار بوساتىلۋى كەرەك»، - دەدى اتامباەۆ.

جولدۋباەۆانىڭ حابارلاۋىنشا، سۋديا پروكۋراتۋرانىڭ ايىپتالۋشىلارعا قاتىستى بۇلتارتپاس شاراسىن قولدانۋ جونىندە ارىزىن قاراپ جاتىر.

2019 جىلى 7-8 تامىزدا قوي-تاش اۋىلىندا ىشكى ىستەر مينيسترلىگى مەن ۇلتتىق قاۋىپسىزدىك مەملەكەتتىك كوميتەتىنىڭ كۇشتەرى بۇرىنعى پرەزيدەنت المازبەك اتامباەۆتى تەرگەۋگە جەتكىزۋ ءۇشىن ارنايى وپەراتسيا وتكىزدى. سول كەزدە ارنايى جاساقتىڭ ءبىر وكىلى قازا تاۋىپ، 200-دەن استام ادام جارالاندى.

تەرگەۋ باسقارماسى بۇل وقيعا بويىنشا 19 ادامعا ايىپ تاقتى، ولاردىڭ اراسىندا المازبەك اتامباەۆ تا بار. تەرگەۋمەن بىرگە جۇمىس ىستەۋگە كەلىسكەن بەس ادامنىڭ ءىسى بولەك وندىرىسكە الىنىپ، 14 ايىپتالۋشىنىڭ ءىسى سوتقا جەتتى.

Abai.kz