حريستيان الەمى ارمەنيانىڭ جەڭىلىسىنە كۇيىنىپ، مۇسىلمان الەمى بوركىن اسپانعا اتىپ جاتقاندا رەسەيلىك «يۋجنىي فەدەرالنىي» سايتىندا اليسا سەلەزنەۆانىڭ «ەردوعان قازاقستاندى كاۆكازداعى كونفليكتىگە تارتىپ، قوسارلى ويىن جۇرگىزۋدە/ەردوگان ۆەدەت دۆوينۋيۋ يگرۋ، ۆتياگيۆايا قازاحستان ۆ كونفليكت نا كاۆكازە» اتتى ماقالاسى جارىق كوردى. 

رەسەيدىڭ 1990 جىلدارداعى ەسكى اسكەري تەحنيكاسىن تمد ەلدەرىنە تىقپالاۋىنىڭ ارتى نەگە سوقتىراتىنىن قاراباق سوعىسى دالەلدەپ بەردى. الەم ورىس قارۋىن ساتىپ الۋدان باس تارتاتىن ءداۋىر تۋدى. رەسەي زاماناۋي سوعىسقا دايىن بولماي شىقتى. ەندى ەكونوميكاسى قۋاتتى قازاقستان ناتو قارۋ-جاراعىمەن ءوز ارمياسىن قايىرا جاساقتايدى دەگەن وي سولتۇستىك كورشىمىزگە تىنىم بەرمەۋدە. 

ەندى وسى ويبايدىڭ العاشقى بايبالامىن جاساعان اۆتوردىڭ ورتالىق ازيانىڭ التىن قاقپاسى سانالاتىن ەلىمىزدىڭ زامانالىق اسكەري قارۋ-جاراققا يە باۋىرلاس تۇرىكتەرمەن اسكەري ىنتىماقتاسۋدى قالامايتىن پيعىلدا جازىلعان ماقالاسىن Abai.kz وقىرماندارىنا ءتارجىمالاپ ۇسىنىپ وتىرمىز.

تۇركيا قازاقستاندى كاۆكازداعى وقيعالارعا تارتا باستادى. تاياۋدا قازاقستاننان تۇرىك اسكەري توبى قاراباققا اتاندىرىلعانى جايىندا باق حابار تارادى.

انكارانىڭ ستراتەگياسى وزگەردى. بۇرىندارى قازاق اسكەريلەرى ستامبۇلدا ءبىلىم السا، ەندى تۇرىكتەر قازاقستاننىڭ ۇلتتىق قورعانىس ۋنيۆەرسيتەتىنە وقۋعا كەلە باستادى. وتكەن جىلى انكارانىڭ وتىنۋىمەن تۇرىك باس شتابىنىڭ ءبىر توپ وفيتسەرى قازاقستاندا تاجىريبەدەن ءوتتى. «رۋسسكايا ۆەسنا» باسىلىمى بۇنى ەردوعاننىڭ كەڭەستىك اسكەر كەڭىستىككە ەنۋى ءۇشىن جاساعان ستراتەگيالىق شەشىمى دەپ جازادى. قازاق ەلىنە كەلگەن وفيتسەرلەر قۇرامى بارلاۋ، ارنايى اسكەر جانە اسكەري ناسيحات ماماندارىنان تۇردى. ولار ءىس-تاجىريبەسىن ورىس ءتىلدى ورتادا وتكىزىپ، پوستكەڭەستىك اسكەري جارعىنى وقىپ ۇيرەندى.

تۇركى وفيتسەرلەرىن وقىتۋ نۇر-سۇلتاندا 2020 جىلدىڭ ناۋرىزىندا اياقتالىپ، جاز ايىندا ولار اسكەري وقۋ-جاتتىعۋعا قاتىسۋعا ازەربايجانعا اتتانىپ كەتتى. اسكەري وقۋ-جاتتىعۋدان كەيىن تۇرىك اسكەريلەرى سول جەردە قالىپ، شتاب جۇمىسىنا جەتەكشىلىك ەتتى. وسى جولداردىڭ اۆتورى دا انكارا تاپ وسىنداي جولمەن قازاقستاندى كاۆكازداعى شيەلەنىسكە تارتۋدا دەپ سانايدى.

اۆتور ودان ارى جانى جاي تاۋىپ: «بىراق قازىر جاعداي وزگەردى. قاراباق بويىنشا بەيبىت كەلىسىمشارتقا قول قويىلدى. ايماققا جاعدايدى تۇراقتاندىراتىن ءارى رەسەيدىڭ كاپ تاۋى ەلدەرىندەگى سالماعىن ارتتىراتىن رەسەيلىك بىتىمگەرلىك كۇشتەرى جىبەرىلدى» دەپ قۋانا جازادى. 

رەسەي قورقا باستاعان تۇران ارمياسىنىڭ ناعىز شىندىققا اينالۋى ءۇشىن ءام زامانالىق اسكەري تەحنيكاعا يە بولۋ ءۇشىن ەندىگى جەردە بۇرىنعىداي جەرىمىزگە كوز الارتقان اسكەري تەحنولوگياسى ارتتا قالعان رەسەيمەن ەمەس، ناتو-عا مۇشە تۇركيامەن تىعىز اسكەري بايلانىس ورناتقانىمىز ءجون دەگەن وي الاش جۇرتىنىڭ ۇلتتىق يدەياسىنا اينالا باستادى. 

ءابىل-سەرىك الياكبار

Abai.kz