1-6 جەلتوقسان ارالىعىندا ەلوردانىڭ جۇمىسشى جاستارىنا ساتىپ الۋ قۇقىعىنسىز جالعا بەرىلەتىن تۇرعىن ۇيگە وتىنىشتەر قابىلدانادى.

باعدارلاماعا قاتىسۋ ءۇشىن https://qatysu.zhilfond.kz/index.php پورتالى ارقىلى ءوتىنىش بەرۋگە بولادى.

«ءوتىنىش بەرۋ ءۇشىن ەلەكتروندى تسيفرلىق قولتاڭبا قاجەت، ويتكەنى وتىنىمدەر تەك ونلاين رەجيمدە قابىلدانادى. بارلىق انىقتامالار مەن قۇجاتتار جاڭا بولىپ، ءوتىنىش بەرگەن كەزدە الىنۋى كەرەك»، - دەيدى نۇر-سۇلتان تۇرعىن ءۇي قورىنىڭ ءباسپاسوز حاتشىسى ارماناي وڭعارباەۆا.

ءوتىنىش بەرۋشىلەردىڭ بارلىق قۇجاتتارى مەن انىقتامالارى ءبىر سكانەرلەنگەن فايلعا تىركەلۋى كەرەك. ءوتىنىش بەرگەننەن كەيىن ونىڭ مارتەبەسى تۋرالى SMS حابارلاما كەلەدى. ءوتىنىش بەرۋشى باعدارلاما شارتتارىنا سايكەس كەلسە جانە تولىق ءتىزىمىن ۇسىنسا، ءوتىنىم قابىلدانادى. ەگەر ءوتىنىش بەرۋشى قۇجاتتارى تولىق بولماسا، تۇزەتۋ قاجەتتىگى حابارلانادى. ال ەگەر ۇمىتكەر باعدارلامانىڭ شارتتارىن ورىنداماسا، باس تارتۋ تۋرالى حابارلاما كەلەدى.

ساتىپ الۋ قۇقىعىنسىز جالعا بەرىلەتىن باسپانانى الۋشىلار ءتىزىمى zhilfond.kz سايتىندا جاريالانادى. وسى باعدارلاماعا قاتىستى بارلىق سۇراقتار بويىنشا 109 بايلانىس ورتالىعىنا حابارلاسۋعا بولادى.

ەسكە سالا كەتسەك، بۇعان دەيىن توتەنشە جاعداي جانە كارانتين رەجيمى كەزىندە ءوتىنىش بەرۋشىلەردىڭ تابىسى ازايىپ، ولار 42 500 تەڭگە العان بولسا، بۇل ماسەلەنىڭ ەسكەرىلەتىنى حابارلانعان ەدى. ول ءۇشىن وسى جاردەماقى ەسەپتەلگەن كارتانىڭ شوتىنان ءۇزىندى-كوشىرمەنى قوسۋ قاجەت.

ىرىكتەۋ باللدىق جۇيەگە نەگىزدەلەدى. ۇپايلار وتباسى، بالالارى، جەكە كاسىپتەرى، مەملەكەتتىك قىزمەتتە نەمەسە بيۋدجەتتىك ۇيىمدا جۇمىس ىستەگەنى ءۇشىن بەرىلەدى. سەرتيفيكاتتار، ماراپاتتار سەكىلدى جەكە جەتىستىكتەر دە ەسكەرىلەدى.

سوڭعى ەكى جىلدا مەنشىگىندە تۇرعىن ءۇيى بولماعان جانە تۇراقتى تىركەۋى بار 29 جاسقا دەيىنگى قازاقستان ازاماتتارى جالعا بەرىلەتىن باسپاناعا ءوتىنىش بەرە الادى. سونىمەن قاتار، ەرلى-زايىپتىلار مەن بالالاردىڭ مۇلكى بولماۋى كەرەك. ءوتىنىش بەرۋشىلەردىڭ رەسمي كىرىسى 40 اەك نەمەسە سوڭعى التى ايدا 111 120 تەڭگەنى قۇراۋى كەرەك.

دەرەككوز: قازاقپارات

Abai.kz