5 جەلتوقسان كۇنى ارمەنيا وپپوزيتسياسى ەرەۆاننىڭ «بوستاندىق» الاڭىندا پرەمەر-مينيستر نيكول پاشينياننىڭ وتستاۆكاسىن تالاپ ەتىپ ميتينگكە شىقتى.

ودان كەيىن نارازىلىق بىلدىرۋشىلەر «بوستاندىق» الاڭىنان پاشينيان تۇراتىن ۇكىمەتتىك ساياجايعا قاراي ءجۇرىپ ءوتىپ، سول جەردە ونىڭ 8 جەلتوقسانعا دەيىن قىزمەتىنەن كەتۋىن تالاپ ەتكەن.

الاڭعا شىققان وپپوزيتسيالىق «داشناكتسۋتيۋن» پارتياسى: «ءبىز بۇگىن «ارمەنيا ساتقىن نيكولسىز» دەگەن جاڭا ۇران جاريالايمىز»,- دەيدى.

سونىمەن قاتار، وسى پارتيانىڭ تاعى ءبىر وكىلى يشحان ساگاتەليان پاشينياننىڭ سەيسەنبىگە دەيىن بيلىكتەن كەتۋى كەرەكتىگىن ايتىپ، ۋلتيماتۋم قويعان.

«نيكول، بۇل سەنىڭ ۇكىمەتتىك ساياجايداعى سوڭعى ساعاتتارىڭ. ءبىز نيكول پاشينيانعا ءوز كومانداسىمەن وسى ماسەلەنى تالقىلاپ، وتستاۆكاعا كەتۋ ءۇشىن سەيسەنبى، 8 جەلتوقسان ساعات 12:00-گە دەيىن ۋاقىت بەرەمىز. ايتپەسە، بۇكىل ارمەنيادا ازاماتتىق بيلىككە باعىنباۋ اكتسياسى باستالادى»،- دەپ مالىمدەدى ولار.

سونداي-اق، وپپوزيتسيا پاشينيانعا «فيزيكالىق قاۋىپسىزدىك كەپىلدەمەسىن» بەرەتىنىن ايتتى.

جالپى، پاشينياننىڭ وتساۆكاسىن «وتاندى قۇتقارۋ قوزعالىسىن» قۇرعان 17 پارتيا تالاپ ەتكەن. ولار ۋاقىتشا پرەمەر-مينيستر لاۋازىمىنا ۇمىتكەر رەتىندە ۇلتتىق دەموكراتيالىق وداقتىڭ كوشباسشىسى ۆازگەن مانۋكياندى ۇسىنعان. نارازىلىق بىلدىرۋشىلەردىڭ پىكىرىنشە، مانۋكيان پرەمەر-مينيستر بولا سالىسىمەن پارتيالىق قىزمەتىن توقتاتادى جانە ءبىر جىلدان كەيىن مەرزىمىنەن بۇرىن پارلامەنتتىك سايلاۋ وتكىزۋگە مىندەتتى بولادى.

ايتا كەتەيىك، 10 قاراشاعا قاراعان ءتۇنى نيكول پاشينيان رەسەي جانە ءازىربايجان پرەزيدەنتتەرىمەن تاۋلى قاراباقتاعى اسكەري قيمىلداردى تولىق توقتاتۋ تۋرالى بىرلەسكەن مالىمدەمەگە قول قويدى. سودان باستاپ ەرەۆاندا پرەمەر-ءمينيستردىڭ وتستاۆكاسىن تالاپ ەتكەن نارازىلىقتار توقتاعان جوق.

پاشينياننىڭ ءوزى 5 جەلتوقسان كۇنى تاڭەرتەڭ تەلەديدار ارقىلى سويلەگەن سوزىندە: «سوعىستى (قاراباقتا) تەك 9 قاراشادا قۇجاتقا قول قويۋ ارقىلى عانا توقتاتۋ مۇمكىن ەدى. ءبىز ديپلوماتيادا ساتسىزدىككە ۇشىراعان جوقپىز. ءبىز سوڭعى 20-25 جىلداعى ديپلوماتيالىق ساتسىزدىكتەردىڭ اۋىرتپالىعىن ەڭسەرۋگە تىرىستىق»، - دەدى.

Abai.kz