سوڭعى اپتالاردا ەل ىشىندە ءھام الەۋمەتتىك جەلىلەردە اتى ءجيى اتالىپ جۇرگەن تۇلعا  – «اق جول» پارتياسىنىڭ توراعاسى ازات پەرۋاشەۆ. اسىرەسە ونىڭ «اق جولدىڭ» قۇرىلتايىندا جاساعان بايانداماسىنداعى ۇستانىمدار ساراپشىلاردىڭ قىزىعۋشىلىعىن تۋدىردى. ونىڭ ىشىندە ەلدەگى ساياسي باسقارۋ جۇيەسىن بيلىك مونوپولياسىنان پارلامەنتتىك جۇيەگە كوشىرۋ تۋرالى باستاماسى قوعامدا وتكىر تالقى بولدى. ءتۇرلى پىكىرلەر ايتىلدى. ساياساتشىلاردىڭ ءبىر توبى قولدادى، ەكىنشىلەرى سىني پىكىرلەرىن ايتىپ جاتتى.

وسىعان بايلانىستى ءبىز «اق جول» توراعاسى ازات پەرۋاشەۆتى از-كەم اڭگىمەگە تارتتىق. الەۋمەتتىك جەلىلەردە ەل شۋلاعان كوپ ساۋالدىڭ ءبىرلى-ەكىلىسىن ءبىز دە پەرۋاشەۆ مىرزانىڭ وزىنەن سۇراپ بىلدىك.

ساياسي جۇيەدە تەكتونيكالىق پروتسەستەر ءجۇرىپ جاتىر

- ازات مىرزا، سايلاۋ قارساڭىندا سىزدەر تاعى دا ەل نازارىنا ءىلىنىپ وتىرسىزدار. سەزدە سويلەگەن سوزدەردەن باستاپ، ەلدەگى وتىز جىلدىق ساياسي جۇيەگە بەرگەن وتكىر سىن مەن باتىل باستامالار از تالقىلانعان جوق. سونىڭ ىشىندە، «اق جولدىڭ» پرەزيدەنتتىك باسقارۋ جۇيەسىنەن باس تارتۋ تۋرالى ۇسىنىسى ساياساتكەرلەردىڭ اراسىندا ءبىراز اڭگىمە بولدى. ساياساتكەر مارات ءباشىموۆ ءسىزدىڭ بۇل ۇسىنىسىڭىزدى: «ەڭ پروگرەسسيۆتى باستاما» دەسە، كادرلىق ديپلومات قازبەك بەيسەباەۆ: «اق جول» ەلدى پارلامەنتتىك رەسپۋبليكاعا اينالدىرا الادى»، دەپتى. ال تاعى ءبىر تەلەگرام-كانال ءتىپتى «ءار ماسليحاتقا قوياتىن سونشا پەرۋاشەۆتاردى قايدان تابامىز» - دەپ تە جازدى.

- ساراپشى مىرزالارعا وسىنداي باعا بەرگەنى ءۇشىن، ارينە راقمەت. بىراق ءبىزدىڭ سايلاۋالدى باعدارلامامىزدا ايتىلعان بۇل ۇسىنىسقا ءبىزدىڭ كۇندەلىكتى جۇمىسىمىزدى جانە الدىنعى جىلدارى سويلەگەن سوزدەرىمىزدى بىلمەيتىن ادامدار عانا تاڭدانۋى مۇمكىن. ويتكەنى، بۇگىنگى ۇسىنىلعان قۇجات ءبىزدىڭ 2012 جىلدان باستاپ پارلامەنت الاڭىندا مالىمدەگەن ۇسىنىستارىمىزدىڭ دامىتىلعان، تولىقتىرىلعان، پىسكەن نۇسقاسى. نەلىكتەن سول باياندامالار سول كەزدە ساياساتكەرلەردىڭ، قوعامنىڭ نازارىنان تىس قالدى – ول جاعى بەلگىسىز. مەن قازىر ەلدە شىنىمەن تەرەڭ، ءتىپتى تەكتونيكالىق پروتسەستەر ءجۇرىپ جاتىر دەپ ايتار ەدىم. ولاردى ءتۇسىنۋ ءۇشىن قولدانىستاعى بالامالاردى جەتكىلىكتى تۇردە باعالاۋ قاجەت.

مەن بۇل ماسەلەگە قاتىستى ءوزىمنىڭ كوزقاراسىمدى بىلتىر 15 تامىزدا «ۆرەميا» گازەتىندە جاريالانعان سۇحباتتا: «وزگەرىستەر قاجەت جانە ودان باستارتۋ ءتىپتى مۇمكىن ەمەس» دەپ جەتكىزگەن بولاتىنمىن. ەندى كەشەگى جاريالانعان جاڭا باعدارلامانى قاراڭىز. جاڭا باعدارلامانىڭ اتاۋى دا وسى. «تۇبەگەيلى وزگەرىستەر قاجەت»، دەپ اتالادى. بايقاساڭىز، اسپاننان العان ەشتەڭە جوق. بۇگىنگى ءبىزدىڭ كوتەرىپ وتىرعان ماسەلەلەرىمىز ءبىزدىڭ الدىنعى جىلدارداعى تاجىريبەلەرىمىزگە نەگىزدەلەدى.

ءبىز ساياسي جۇيەنى دەموكراتيالاندىرۋ، ناقتى نارىقتىق جانە ءادىل مەملەكەت قالىپتاستىرۋ دەگەن باعىتتى ۇستانامىز. ءماجىلىس دەپۋتاتتىعىنا ۇمىتكەر، بەلگىلى ساياساتتانۋشى ءبورىحان نۇرمۇحامەدوۆ: «پارتيانىڭ بۇل ۇسىنىستارى جالدامالى ساياسي ساراپشىلاردىڭ باقىر ەسەپكە تۇزىلگەن قۇراندىسى ەمەس، ساياساتتا، قوعامدا ءوز ورنى بار پارتيانىڭ كوپ جىلدىق تاجىريبەسى» دەپ جاقسى ايتتى.

يا، بۇل جولعى جاڭا باعدارلامامىز پارتيامىزدىڭ بۇرىننان بەرى كوتەرىپ كەلە جاتقان باستامالارىن ودان سايىن ايقىنداي تۇسكەن شىعار. بىراق بۇل ەشقانداي دا سايلاۋ الدىنداعى «ويانۋ» نەمەسە «حايپ» ەمەس، ساياساتتا، ەكونوميكادا جانە مەملەكەتتىك باسقارۋ جۇيەسىندە جۇمىس ىستەگەن جىلدار بويى قالىپتاسقان تاجىربيەدەن تۋعان قۇجات. بۇل قۇجاتتى ءبىزدىڭ ورتاق ۇستانىمىمىز رەتىندە قولداعان سەزد دەلەگاتتارىنا العىسىمدى بىلدىرەمىن.

دە-كوممۋنيزاتسيا!

- سايلاۋ ناۋقانى باستالعالى بەرى ەلدەگى ساياساي پارتيالاردىڭ ەدەل-جەدەل ارەكەتتەرگە كوشۋى، كوممۋنيستەردىڭ كوممۋنيزمنەن باس تارتۋى، «ادال» مەن «ەل تىرەگىنىڭ» پايدا بولۋى نەنى بىلدىرەدى؟ بۇل وقيعالار سىزدەردىڭ جۇمىستارىڭىزعا قالاي اسەر ەتەدى؟ ءسىز بۇل پارتيالاردى قارسىلاستارىڭىز نەمەسە وداقتاستارىڭىز دەپ سانايسىز؟

- بۇل مەن ءۇشىن قالىپتى جاعداي. سايلاۋ ارقاشان ۇمىتتەردىڭ، جۇيكەنىڭ، كۇرەستىڭ كۇشەيۋىن تالاپ ەتەدى. بىرەۋدىڭ ورىندالماعان امبيتسياسى بار، جەكە جوبالار وزدەرىن جەڭۋ ءۇشىن ەمەس، باسقالاردىڭ الدىن الۋ ءۇشىن پايدا بولادى. كاسىبي ساياسي ستراتەگتەر اينالىساتىن كوپ ساتىلى كومبيناتسيالار ىسكە قوسىلۋدا.

قكحپ-نىڭ كوممۋنيستىك اتاۋدان باس تارتۋىن ءبىزدىڭ ۇلتتىق تاريحىمىزدى ەسكەرە وتىرىپ، دۇرىس دەپ سانايمىن. پرەزيدەنت قاسىم-جومارت توقاەۆتىڭ قۋعىن-سۇرگىن قۇرباندارىن اقتاۋ جونىندەگى جۇمىستى جالعاستىرۋ تۋرالى شەشىمىنەن كەيىن بيىلعى جىلدىڭ 3 ماۋسىمىندا «اق جول» فراكتسياسى بولشەۆيكتەر ۇيىمداستىرعان ۇلى جۇتتى (اشارشىلىق) حالىقارالىق دەڭگەيدە مويىنداۋ، پرولەتاريات ديكتاتۋراسىنا قارسى قارۋلى كوتەرىلىستەرگە قاتىسۋشىلاردىوڭالتۋ جونىندەگى ءىس-شارالاردى باستاۋدى ۇسىندى (تاريحشىلار وسى تاقىرىپتا 20-30 جىلدارى 360-قا جۋىق كوتەرىلىس بولعان دەپ ەسەپتەيدى). سول كەزدە ءبىز دە-كوممۋنيزاتسيا «اق جول» پارتياسىنىڭ ماڭىزدى قاعيداتتارىنىڭ ءبىرى بولىپ تابىلاتىنىن مالىمدەدىك.

ال اتاۋلارىن اۋىستىرىپ جاتقان «ادال» جانە «ەل تىرەگى» تۋرالى پالەندەي بىردەڭە ايتۋ قيىن. ولاردىڭ ءوز ۇراندارىنان باسقا ەشقانداي تاجىريبەلەرى جوق.

«اق جولدىڭ» قارسىلاسى كىم، سەرىكتەسى كىم؟

قارسىلاستار مەن سەرىكتەرستەرگە قاتىستى... سايلاۋ ناۋقانى تۇرعىسىنان، ارينە، بارلىق پارتيالار باسەكەلەس. الايدا، سايلاۋ ستراتەگياسىنىڭ ەكى نەگىزگى ءتۇرى بار: پرواكتيۆتى يدەولوگيا، پارتيا ءوز باستامالارىن ۇسىنعان كەزدە، جاڭاسىن ۇسىنادى، ال «كونتر» يدەولوگيا، پارتيا باسەكەلەستەردىڭ شەشىمدەرىن سىنعا الىپ، اشكەرەلەيدى. ءاربىر جاعدايدا وڭ جانە تەرىس جاقتارى بار: پرواكتيۆتى يدەولوگيا قارسىلاستاردى جەتە باعالاماۋى مۇمكىن; كونتر يدەولوگيا، باسقا پىكىرلەردىڭ سوڭىنان ىلەسىپ جۇرەدى.

مەن ءپوزيتيۆتى يدەولوگيانىڭ جاقتاۋشىسىمىن. ءبىز ءۇشىن باسەكەلەستەرمەن داۋ-دامايعا ءتۇسۇ باستى ماقسات ەمەس. ەڭ الدىمەن سايلاۋشىلارعا ءوز كوزقاراسىمىزدى، ەلدى قايدا جانە قانداي باعىتتا دامىتاتىنىمىزدى ۇسىنامىز. ياعني، «اق جول» دەموكراتيالىق پارتياسى ءۇشىن ءبىزدىڭ جەكە باعدارلامامىز ماڭىزدىراق. ەگەر باسقا پارتيالاردىڭ اراسىندا بىزگە جاقىن ماقساتتارمەن بولىسەتىندەر بولسا، ءبىز ولاردى سەرىكتەس دەپ ساناۋعا دايىنبىز. قارسى شىققاندار قارسىلاستار ەكەنى انىق. بىراق بۇل ولاردىڭ باس اۋرۋى.

- سايلاۋ پروتسەسسى باستالعان سوڭ، ءتۇرلى ساياسي تەحنولوگتاردىڭ بولاتىنى بەلگىلى. ءدال سايلاۋدىڭ قارساڭىندا «ادال» دەگەن پارتيا پايدا بولدى (بۇرىنعى «بىرلىك» پارتياسى). كەيبىر ساراپشىلاردىڭ پىكىرىنشە، اتالعان پارتيانىڭ ماقساتى – سىزدەر مەن «اتامەكەننىڭ» اراسىنداعى جاقىندىقتى جاسىرىپ، «اق جولدى» «بيزنەسمەندەردىڭ پارتياسى» دەگەن تۇسىنىكتى وزگەرتىپ، ەكونوميكالىق تاقىرىپپەن قوسا، ساياسي ماسەلەلەرگە اسەر ەتەتىن كۇشكە اينالدىرۋ. ءسىز وسى پىكىرلەرمەن كەلىسەسىز بە؟

- مۇنداي نۇسقالار تۋرالى بىلمەيدى ەكەنمىن. ال، ساياسي ماسەلەلەر تۋرالى ايتساق – «اق جول» پارتياسىنىڭ «تۇبەگەيلى وزگەرىستەر قاجەت» باعدارلاماسىن وقىپ شىعىڭىز. ءيا، نارىقتىق ەكونوميكا جانە بيزنەستى قولداۋ تۋرالى تاراۋ ماڭىزدى ورىن الادى. بىراق قالعان 5 ءبولىم مەن باعدارلاما كولەمىنىڭ 70 پايىزى ناقتى جالپىحالىقتىق تاقىرىپتارعا ارنالعان: «تاۋەلسىزدىك جانە «الاش» ۇلتتىق يدەياسى»، «دەموكراتيا مەن پارلامەنتاريزم»، «سىبايلاس جەمقورلىققا قارسى كۇرەس جانە دەوفشوريزاتسيا»، «الەۋمەتتىك ادىلەتتىلىك»، «ساليقالى سىرتقى ساياسات».

جوعارىدا ايتقانىمداي، بۇل جىلدار بويى «ادالدىڭ» اتى اتالماعان كەزدە جاسالعان باستامالار، ۇستانىمدار. مۇمكىن، بۇل پارتيانىڭ پايدا بولۋداعى مىندەتى باسقا شىعار، مىسالى بيلىكتىڭ قالاۋىمەن «اق جولدىڭ» از داۋىس الۋىن قوعام الدىندا اقتاۋ. الايدا، «رەجيسسەرلەر» پارلامەنتتە بيزنەستى قولداۋعا باعىتتالعان قاتاڭ سوزدەر سويلەۋىمىزدىڭ ارقاسىندا تاقىرىپ باسقا قاتىسۋشىلار ءۇشىن تارتىمدى بولا باستاعانىن ەسكەرمەدى.

«ەل تىرەگى» پارتياسىمەن ورناعان كلوۋنادا دا وسىعان بايلانىستى. اۋىل كاسىپكەرلىگى تاقىرىبىن «اۋىل» پارتياسى قامتيتىنىنا كامىل سەنەمىن. ال «Nur Otan» تىزىمىندە وسى ءۇش قۇرىلىمعا قاراعاندا كاسىپكەرلەر كوپ. سوندىقتان «ەكس-بىرلىكشىلەر» مۇندا جالعىز ەمەس.

بىراق قانداي دا ءبىر پارتيالار شاعىن جانە ورتا بيزنەستى قولداۋ، ادال باسەكەلەستىك پەن نارىقتىق ەكونوميكانى دامىتۋ بويىنشا بىزگە جاقىن ماسەلەلەردى قولداسا ءبىز ولاردى ءوزىمىزدىڭ وداقتاسىمىز دەپ ساناۋعا دايىنبىز. ەڭ باستىسى - ينۆەستيتسيالار مەن تەحنولوگيالار ءۇشىن تارتىمدى، قالىپتى بيزنەس-احۋالدى قالىپتاستىرۋ.

- الەۋمەتتىك جەلىلەردە بارسىز با؟ بار بولساڭىز، ونى ءوزىڭىز جۇرگىزەسىز بە، الدە ارنايى پوليتتەحنولوگتار وتىرا ما؟

- الەۋمەتتىك جەلىلەردەگى (تۆيتتەر مەن تەلەگرامم) پاراقشالارىمدى ءوزىم جۇرگىزەمىن. پوليتتەحنولوگتار باسقا رەسۋرستارمەن جۇمىس ىستەيدى، مەن ولاردىڭ جۇمىسىنا ارالاسپايمىن، بىراق كەيدە كەڭەسىمدى بەرىپ تۇرامىن. مۇنداي ماماندار الەۋمەتتىك جەلىلەر ءۇشىن ەمەس، سايلاۋ الدىنداعى شتابتاردى ۇيىمداستىرۋ، بايقاۋشىلاردى وقىتۋ، سايلاۋ ەرەجەلەرىن بۇزۋشىلىقتاردى تىركەۋ، داۋىستاردى قورعاۋ جانە ت.ب. سۇراقتارمەن اينالىساتىنىن ەستە ۇستاعان ءجون. وسى ۋاقىت ارالىعىندا كوپ جۇمىس اتقارىلدى. سوندىقتان ءبىز ءوز سايلاۋشىلارىمىزدىڭ كوزىنە تىك قاراي الامىز. الەۋمەتتىك جەلىلەردى جۇرگىزۋ ءبىز ءۇشىن ءبىرىنشى ورىندا ەمەس.

- الايدا، سول الەۋمەتتىك جەلىلەردە «اق جول» ميللياردتتاعان بيۋدجەت قاراجاتى تۋرالى ەسەپ بەرمەيدى دەگەن اقپارات تاراپ جاتىر.

– «اق جول» دەموكراتيالىق پارتياسى جىل سايىن قاراجاتتىڭ پايدالانىلۋى تۋرالى ەسەپ بەرەدى جانە ول ميللياردتاعان سوما ەمەس. مەن پارتيا توراعاسى بولعان كەزدەن باستاپ، تەكسەرۋ كوميسسياسىنىڭ جىل سايىنعى ەسەپتەرى «قازاق ءۇنى» باسىلىمىندا اشىق تۇردە جاريالانادى. باقىلاۋعا تاۋەلسىز اۋديتورلار تارتىلادى، بۇدان باسقا ءبىزدىڭ قارجىلىق قىزمەتىمىزدى ەسەپ كوميتەتى تەكسەرەدى. سوڭعى 10 جىلداعى سىلتەمەلەردى ءسىزدىڭ رەداكتسياڭىزعا دا جىبەرۋگە دايىنبىز. بىراق ەسەپتەر مەملەكەتتىك تىلدە جاريالاناتىنىن ەسكەرۋ قاجەت. شاماسى، بىرەۋ وسى تاقىرىپتا «حايپ» جاساعىسى كەلدى، بىراق ونى تەك ورىس ءتىلدى باسپاسوزدەن ىزدەدى. مەملەكەتتىك ءتىلدى ۇيرەنۋ كەرەك!

ازاماتتار مەملەكەتىمىزدى جوعارىدا وتىرعان بيۋروكراتتار ءۇشىن ەمەس، قاراپايىم حالىق ءۇشىن سۇيەدى

- كوپتەگەن ساراپشىلار «جسدپ» بايكوتىنان كەيىن «اق جولعا» سۇرانىس ارتتى دەپ سانايدى ەكەن. قوعامداعى پروتەستىك كوڭىل كۇيدى ءوزىڭىز دە جاقسى ءبىلىپ وتىرسىز. بيلىك پارتياسىمەن اشىق پىكىرتالاسۋعا داياسىزدار ما؟ پروتەستىك پوزيتسياداعى ازاماتتار «اق جول» ەلەكتوراتى دەپ ايتا الامىز با؟

- راديكالدى فيگۋرالاردى قوسپاعاندا سولاي شىعار. ءبىز سەندىرۋ ادىسىمەن وزگەرىستەرگە قول جەتكىزگەندى ءجون كورەمىز، وتكەن جول مەن حالقىمىزدىڭ ەڭبەگىن باعالايمىز. مەملەكەت پەن مەملەكەتتىك ينستيتۋتتاردى السىرەتۋگە، ازاماتتارىمىزدىڭ قاۋىپسىزدىگىنە جانە قالالارىمىزدىڭ تىنىشتىعىنا قاتەر توندىرۋگە كەز كەلگەن ارەكەتكە جول بەرىلمەيدى دەپ سانايمىز.

ادىلەتسىزدىك. جەمقورلىق.

كوپتەگەن ازاماتتاردىڭ قوعامداعى ادىلەتسىزدىك پەن جەمقورلارلىققا، ءوز ءىسىن جۇرگىزۋگە قولايلى جاعدايدىڭ جانە جاستار ءۇشىن پەرسپەكتيۆالاردىڭ بولماۋىنا كوڭىلدەرى تولمايدى. بىراق ولاردىڭ كوپشىلىگى ءوز ەلىن جاقسى كورەدى، ەلگە دەگەن ماحابباتتارىن  بيۋروكراتتارمەن ەمەس حالقىمىزبەن بايلانىستىرادى.

ەڭ الدىمەن، بۇل كاسىپكەرلەر، زيالى قاۋىم جانە ەركىن سانا-سەزىمى بار، ءوزىن-ءوزى قامتاماسىز ەتەتىن جانە امەريكاندىقتار ايتقانداي «وزدەرىن قۇرعان» ادامدار. ولار شەنەۋنىكتەر الدىندا ەشنارسەگە مىندەتتى ەمەس، كەرىسىنشە، ولار جۇمىس ورىندارىن قۇرىپ، سالىق تولەيدى، وتباسىلارىن اسىرايدى. ولار بۇل ەلدى ولاردىڭ اتىنان جالدانعان مەملەكەتتىك قىزمەتكەرلەر قالاي باسقاراتىنىن سۇراۋعا قۇقىلى. بۇل «اق جول» دەموكراتيالىق پارتياسىنىڭ ەلەكتوراتى.

قاشقىن وليگارحتىڭ قولداۋىنىڭ قاجەتى جوق

– ازەكە، جاقىندا بۇرىنعى بانكير، ءوزىن وپپوزيتسيا ليدەرى سانايتىن مۇحتار ءابىلازوۆ ءوز جاقتاستارىنا ۇندەۋ جاساپ، اۋەلى «جسدپ-عا»، سوسىن ءسىز باسقاراتىن «اق جولعا» قوسىلۋعا ۇندەدى.

– «اق جول» ساياسي ارەنادا 18 جىلدان بەرى تابىستى جۇمىس ىستەپ كەلە جاتقان، قالىپتاسقان ساياسي ۇيىم. بىزدە كەڭ كولەمدى ەلەكتورات بار جانە ولقاشىپ جۇرگەن الدەكىمدەردىڭ كەڭەسىن قاجەت ەتپەيدى. ايتا كەتەيىن، «اق جول» قدپ بيلىك پارتياسىنان باسقا جالعىز پارتيا بولىپ 2004, 2012 جانە 2016 جىلدارى پارتيالىق ءتىزىم بويىنشا ماجىلىسكە ءۇش رەت ءوتتى. كوممۋنيستەر ەكى رەت ءوتتى. بۇل جەتىستىككە «جسدپ» دا، «بىرلىك» تە جەتە العان جوق. مەنىڭ ويىمشا، جسدپ سايلاۋدان بىرەۋدىڭ ىقپالىنان ەمەس، ءوزىنىڭ ۇيىمداستىرۋشىلىق جانە يدەولوگيالىق دارمەنسىزدىگىنە بايلانىستى شىقتى.

«اق جول» دەموكراتيالىق پارتياسىنىڭ قۇرىلىمى دامىعان، بارلىق وڭىرلەردە تانىمال كوشباسشىلارى بار. بىزدە ناقتى بەلگىلەنگەن ۇستانىم بار. ءبىز پارلامەنتتە بيلىكتىڭ پىكىرىنە قاراماستان ءوزىمىز قاجەت دەپ سانايتىن دۇنيەلەرگە داۋىس بەرەمىز.مۇنداي رەسۋرس امبيتسياسى بار ادامدار ءۇشىن وتە قىزىقتى ەكەنى تۇسىنىكتى. سوندىقتان پارتيانى مانيپۋلياتسيالاۋ ارەكەتتەرى بۇعان دەيىن دە بولعان، بىراق ونىڭ ءبارى ءساتسىز اياقتالدى.

«اق جول» ءوز باعدارلاماسى بويىنشا جۇمىس ىستەيدى. ءوز سايلاۋشىلارىنا، ءوز حالقىنا جانە ءوز مەملەكەتىنە قىزمەت ەتەدى. بۇل تىزىمدە قاشقىن وليگارحتار جوق.

- ونىڭ ايتۋىنشا، سول ۇندەۋدەن كەيىن، «اق جول» جاڭا مۇشەلەردى قابىلداماي، جەرگىلىكتى فيليالدارىن «جاۋىپ تاستاعان» ەكەن. نەگە؟ 

– ول ارينە جالعان اقپارات. فيليالدارىمىز كەرىسىنشە، ءوز جۇمىسىن كۇشەيتىپ جاتىر.

وسى كۇزدەن باستاپ «اق جول» دەموكراتيالىق پارتياسىنا كىرەتىن جاڭا مۇشەلەردىڭ، اسىرەسە جاستاردىڭ اعىمى كۇرت ءوستى. مىسالى، قىركۇيەك ايىندا 11 مىڭعا جۋىق ادام كىردى. قازان مەن قاراشادا ودان دا كوپ.

پارتياعا قابىلداۋ – بۇل ءبۇتىن ءبىر پروتسەسس. ىزدەنۋشى ءوتىنىش جازادى، ەسەپكە الۋ كارتوچكاسىن تولتىرادى. ەڭبەك ءوتىلى بار «اق جول» مۇشەلەرىنىڭ اراسىنان كەپىلگەر تابادى. ولاردىڭ وتىنىشتەرىن جەرگىلىكتى ۇيىم قارايدى، ماقۇلدانعان جاعدايدا - پارتيانىڭ جاڭا مۇشەسى رەتىندە دەرەكقورعا ەنگىزىلەدى جانە پارتيالىق بيلەت بەرىلەدى. بىرەۋ ايتقانداي، پارتياعا «بىردەن» كىرە سالۋ مۇمكىن ەمەس.

ال، سايلاۋالدى كەزەڭدە پارتيا فيليالدارىنىڭ باستى جۇمىسى – مۇشەلىككە قابىلداۋ ەمەس، ۇگىت-ناسيحاتپەن اينالىسۋ.

مۇندا ءبىر ايتا كەتەتىن جايت، «فرانتسۋز قاشقىننىڭ» ۇندەۋى ەشقانداي ءرول اتقارمايدى دا. ونىڭ ءبىر دالەلى – ول الدىمەن ءوز جاقتاستارىن «جسدپ-عا» بارۋعا ۇندەدى عوي. سونداعىسى – ءبىر ايدا بار بولعانى 78 ادام عانا بارعان ەكەن. وسىنىڭ ءوزى-اق، ونىڭ ۇگىتىنىڭ قانشالىقتى قاۋقارلى ەكەنىن كورسەتىپ تۇرعان جوق پا؟ ءتىپتى، مۇنداي «قاۋىپكە» جاۋاپ بەرۋدىڭ ءمان-ماعىناسى دا جوق! قازاقتا «ايداعانى بەس ەشكى، ىسقىرىعى جەر جارار» دەگەن بار عوي. سونىڭ كەرى كەلىپ تۇر.

- كەي ساراپشىلار «Nur Otan» مەن «اق جولدىڭ» باعدارلامالارىندا كوتەرىلگەن كوپتەگەن پروبلەمالار ۇندەس بولعانىن ايتادى. ءسىز نە دەيسىز؟

- بۇل بيلىك پارتياسىندا دا قوعامدىق وزگەرىستەرگە دەگەن سۇرانىستى بايسالدى باعالايتىنىن بىلدىرەدى. سونىمەن قاتار، كوپتەگەن پارامەترلەر بويىنشا ءبىزدىڭ قازىرگى جاعدايعا بەرگەن باعالارىمىز جاقىنداۋ، ويتكەنى ولار دا، ءبىز دە ناقتى ماسەلەلەرمەن جانە ناقتى ادامدارمەن اينالىساتىن ناقتى جۇمىس ىستەيتىن پارتيالارمىز. بىراق ونى شەشۋ ءۇشىن ۇسىنىپ وتىرعان جولدارى مەن قارقاندارى ارينە، ءار ءتۇرلى.

ناقتى ىستەردە ءبىر-بىرىمىزگە لايىقتى ارىپتەس بولا الامىز. «نۇر وتانمەن» پىكىر تالاساتىن دا، ءبىر-ءبىرىمىزدى تولىقتىراتىن دا ورتاق تاقىرىپتار جەتكىلىكتى.

-اڭگىمەڭىزگە راحمەت!

پىكىرلەسكەن نۇرگەلدى ابدىعانيۇلى

Abai.kz