بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى.

زاڭ جوباسىن مادەنيەت جانە سپورت ءمينيسترى اقتوتى رايىمقۇلوۆا تانىستىرىپ، سپورت كلۋبتارىنا بولىنەتىن قارجى كولەمى تۋرالى ايتتى.

«ەلىمىزدە جالپى 98 كاسىبي سپورت كلۋبى بار. ولار جەرگىلىكتى اتقارۋشى ورگاندار ەسەبىنەن قارجىلاندىرادى. كەيبىرەۋى دەمەۋشىلەردەن اقشا الادى، ياعني، ۇلتتىق كومپانيالار مەن جەكە كاسىپكەرلەر اقشا بولەدى. اناليز جاساپ، كاسىبي سپورت كلۋبتارىن ۇستاۋعا كەتەتىن قاراجات دەڭگەيىن تومەندەتۋدە ۇسىنىپ وتىرمىز. وينايتىن دا، وينامايتىن دا كلۋبتار بىرىڭعاي تاريفتىك سەتكاعا كوشسىن دەپ وتىرمىز. سونىمەن قاتار، سپورتشىلار مەن جاتتىقتىرۋشىلاردىڭ، كلۋبتا جۇمىس ىستەيتىن وزگە دە قىزمەتكەرلەردىڭ جالاقىسى بويىنشا بىرىڭعاي تاريف بەكىتۋدى ۇسىندىق. قازىر 98 كاسىبي سپورت كلۋبتارىن قارجىلاندىرۋعا جىل سايىن 55,5 ملرد تەڭگە قاراجات كەتەدى»، - دەدى سۇراققا جاۋاپ بەرە باستاعان اقتوتى رايىمقۇلوۆا.

ءمينيستردىڭ ايتۋىنشا، جىل سايىن سپورتتى دامىتۋعا 160 ملرد تەڭگە بولىنەدى. سونىڭ ىشىندە كاسىبي سپورت كلۋبتارىنا 55,5 ملرد تەڭگە قاراستىرىلعان.

«جەرگىلىكتى اتقارۋشى ورگانداردان 55,5 ملرد تەڭگە، قوسىمشا «استانا» سپورت كلۋبىنا «سامۇرىق-قازىنادان» قوسىمشا 27 ملرد تەڭگە بولىنەدى. ءبىز ۇكىمەتكە وسى قاراجاتتى ەكى ەسەگە ازايتىپ، قىسقارعان 22,5 ملرد تەڭگەنى بۇقارالىق سپورتتى دامىتۋعا جۇمسايىق دەگەن ۇسىنىسپەن شىقتىق. ۇسىنىستى ۇكىمەتكە ەنگىزدىك»، - دەدى رايىمقۇلوۆا.

Abai.kz