قاراۋ ويمەن تۋعان كوپ ءتۇن ىشىندە،
كورىپ ءجۇرمىن ۇساعىن، ءىرىسىن دە.
قوناەۆتىڭ قىلمىسىن بەتىنە ايتساڭ،
قايدا قالدىڭ، زامانداس، تىرىسىندە.

قۇبا تورگە جاڭا ەدى جايعاسقانىڭ،
ءسوزىن سويلەي باستادىڭ قاي قاسقانىڭ؟
قوناەۆتىڭ مازالاپ ارۋاعىن،
ەي، زامانداس!
بۇ سەنىڭ قاي ساسقانىڭ؟!

تۇرعان كەزدىڭ وزىندە قاۋىپ ءتونىپ،
جۇگىرگەن ەلدىڭ جوعىن تاۋىپ بەرىپ،
سول كىسىنىڭ ارقاسى ەمەس پە ەدى،
سەنىڭ دە ەركىن وسكەنىڭ ساۋىققا ەرىپ.

قوناەۆقا ءتىلىڭدى بەزەي بەرمە،
وق وتپەيتىن كەۋدەڭدى ساۋىت كورىپ.
قابىرىنەن ءبىر كۇنى اتىپ شىعىپ،
باسىڭدى الىپ جۇرمەسىن شاۋىپ كەلىپ.

كۇنىڭ اۋىپ، تومەنگە كولبەگەندە،
قانىڭدى ىشەر تالاي سۇم شولدەگەندە.
مولاسىنا يت بولىپ سارىساڭ دا،
نە ىستەيدى ولگەندەر كونبەگەندە.

بۇنىڭ اۋىر زاردابى قارا دا تۇر،
سۇيەگىڭە تاڭبا بوپ قالادى اقىر.
ارۋاقتارعا ءتيىسۋ بۇل كۇندەرى
سالت-داستۇرگە اينالىپ بارا جاتىر.

قولدان كەلەر دارمەن جوق.
نە ىستەيىن،
كىمدى دۇرىس، كىمدىكىن تەرىس دەيىن.
بىلسەڭ ەگەر ەلدەن دە قاۋقار كەتكەن،
ارام ءشوبى قاپتاعان ەگىستەيىن.

ءسوز كەلتىرمە، ەندەشە، كيەلى ەلگە،
ءجونسىز ءىستى ساياسات، جۇيە كورمە.
قوناەۆتىڭ مازالاپ ارۋاعىن،
ەي، زامانداس!
جۇيكەگە تيە بەرمە.

2

اڭىن جەتىپ ۇستاعان قۇماي قۋعان،
ءجاي ءسوز دەمە سەن مۇنى قۇر ايتىلعان.
مىقتى بولساڭ قايتارىپ نەگە المايسىڭ،
قارا ەرتىستىڭ ارناسىن قىتاي بۇرعان.

رافاەل نيازبەك،

اقىن. قازاقستاننىڭ ەڭبەك سىڭىرگەن قايراتكەرى،
شەشەنستاننىڭ حالىق باتىرى

Abai.kz