سارسەنبى, 26 اقپان 2020
جاڭالىقتار 1522 0 پىكىر 1 شىلدە, 2009 ساعات 19:31

«فريدوم حاۋز»: قازاقستان بۇرىنعىداي اۆتوريتارلىق رەجيمدى ەلدەردىڭ قاتارىندا سانالادى

 

 

«فريدوم حاۋز ەۋروپا» ۇيىمى باسشىسى ۆلاديمير شكولنيكوۆ «ازات ەۋروپا»/«ازاتتىق» راديولارىنىڭ پراگاداعى كەڭسەسىندە باياندامانى تانىستىرۋ كەزىندە. 30 ماۋسىم 2009 جىل.

«فريدوم حاۋز» حالىقارالىق ۇيىمى، 30 ماۋسىمدا «وتپەلى كەزەڭدە ءومىر ءسۇرىپ جاتقان ەلدەر» اتتى بايانداماسىن جاريالادى. اۆتوريتارلى ەلدەردىڭ قاتارىندا قالعان قازاقستان، ساراپشىلاردىڭ پىكىرىنشە، وزگەرۋگە قۇلىقتى بولماي وتىر.
اقش-تا ورنالاسقان «فريدوم حاۋز» حالىقارالىق قۇقىققورعاۋ ۇيىمى 30 ماۋسىم كۇنى «ازات ەۋروپا»/«ازاتتىق» راديولارىنىڭ پراگاداعى كەڭسەسىندە وتكىزگەن بەينە-جينالىسىندا «وتپەلى كەزەڭدە ءومىر ءسۇرىپ جاتقان ەلدەر» اتتى جاڭا بايانداماسىن جاريالادى.
2004 جىلدان باستاپ ورتالىق ەۋروپا مەن ەۋرازيانىڭ 29 ەلىندە باقىلاۋ جاساعان بايانداما اۋتورلارى بۇل ەلدەردەگى جاعدايدى جەتى كورسەتكىش بويىنشا باعالاعان.
باياندامانىڭ وسى ەلدەردىڭ ارقايسىسىنداعى ۇلتتىق دەموكراتيالىق باسقارۋ، داۋىس بەرۋ پروتسەسى، ازاماتتىق قوعام، ءباسپاسوز بوستاندىعى، جەرگىلىكتى دەموكراتيالىق باسقارۋ، ادىلەت جۇيەسىنىڭ تاۋەلسىزدىگى ماسەلەلەرى جانە سىبايلاس جەمقورلىق پروبلەمالارىنا ارنالعان بولىمدەرىندە تەك جوعارىدا اتالعان سالالاردىڭ جاعدايى عانا ايتىلىپ قويماي، سونىمەن بىرگە 1-دەن 7 باللعا دەيىنگى شامادا باعا بەرىلگەن.
«وتپەلى كەزەڭدە ءومىر ءسۇرىپ جاتقان ەلدەر» بايانداماسىندا ءازىربايجان، رەسەي جانە بەلارۋسپەن قاتار ورتالىق ازياداعى بارلىق بەس مەملەكەتتىڭ دە اۆتوريتارلىق رەجيمدى مەملەكەتتەردىڭ تىزىمىنە ەنگەنىن ايتا كەتۋ كەرەك.
«فريدوم حاۋز» ۇيىمى بايانداماسىنىڭ قازاقستانعا ارنالعان بولىمىندە بۇل ەل 2010 جىلى ەۋروپاداعى قاۋىپسىزدىك جانە ىنتىماقتاستىق ۇيىمىنا (ەقىۇ) توراعالىق ەتۋگە دايارلانىپ جاتقاندىقتان ول ليبەرالدانۋعا قاراي، ەڭ الدىمەن سوت سالاسىندا، الدىن الا قادامدار جاساعانىمەن، اۆتوريتارلى ەلدەردىڭ قاتارىندا قالىپ قويدى دەلىنگەن.
ەلدە ساياسي پليۋراليزم مەن جارىستىڭ جوق بولۋى، مۇنداعى زاڭنامالىق قۇرىلىم، قازاقستان ەقىۇ توراعاسى مارتەبەسىن قابىلداۋعا دايارلىق بارىسىندا ساياسي ليبەرالدانۋدىڭ وڭ ستيمۋلىن ۇسىنىپ جانە دەموكراتيالىق پروتسەستەردى دامىتاتىنىنا كۇمان تۋعىزادى.
ازاتتىق راديوسىنىڭ تىلشىسىمەن بولعان سۇحباتتا «فريدوم حاۋز ەۋروپا» حالىقارالىق قۇقىققورعاۋ ۇيىمىنىڭ باسشىسى ۆلاديمير شكولنيكوۆ قازاقستانداعى سوڭعى بولىپ جاتقان وقيعالاردى باقىلاي وتىرىپ، ۇيىم ەلدەگى بولىپ جاتقان وقيعالارعا، اتاپ ايتقاندا، كوپتەگەن ۆەب-سايتتارعا توسقاۋىل قويۋ جانە ينتەرنەت-كەڭىستىككە باقىلاۋ جاساۋعا ارەكەتتەنۋ ماسەلەسىنە ەرەكشە الاڭداۋشىلىق بىلدىرەتىنىن جانە بۇعان بايلانىستى ەل بيلىگىنىڭ ساياساتىن قولدامايتىنىن اتاپ ءوتتى.
«فريدوم حاۋز» جاقىندا عانا ەقىۇ-نىڭ باق ماسەلەلەرى جونىندەگى وكىلىنىڭ پوزيتسياسىن قولدايتىن مالىمدەمە جاسادى. وندا ءبىز وسى پروتسەستەرگە قاتىستى ءبىزدىڭ ۇيىمنىڭ پىكىرىن بىلدىردىك»، – دەدى ۆلاديمير شكولنيكوۆ.
ول «مۇنداي پروتسەستەردىڭ ءسوز جوق الاڭداۋشىلىق تۋدىراتىندىعىن» اتاپ ءوتتى.
«بۇدان ەكى جىل بۇرىن سىرتقى ىستەر مينيسترلەرىنىڭ مادريدتەگى كەزدەسۋىندە قازاقستان سىرتقى ىستەر ءمينيسترى مارات ءتاجيننىڭ بەرگەن ۋادەلەرى ورىندالماعان كۇيى قالىپ وتىر. بۇنىڭ ءوزى، وكىنىشكە قاراي، قازاقستاننىڭ حالىقارالىق سالادا جاۋاپتى بولۋعا ۇمتىلمايتىندىعىن بايقاتىپ وتىر»، – دەدى «فريدوم حاۋز ەۋروپا» حالىقارالىق قۇقىقورعاۋ ۇيىمىنىڭ باسشىسى ۆلاديمير شكولنيكوۆ.
بەدەلدى زەرتتەۋلەردىڭ ءبىرى بولىپ سانالاتىن «وتپەلى كەزەڭدە ءومىر ءسۇرىپ جاتقان ەلدەر» ايدارىنداعى باياندامالاردى الەمدەگى قانداي دا ءبىر ەلدەگى تۇراقتىلىق جاعدايىن باعالاۋ ءۇشىن شەت ەلدەردىڭ ۇكىمەتتەرى، سونىمەن بىرگە ءىرى بيزنەس كومپانيالاردىڭ باسشىلارى پايدالانادى.

 


ديلبەگيم ماۆلوني
«ازاتتىق» راديوسى 1 شىلدە 2009 جىل

0 پىكىر