سەنبى, 8 مامىر 2021
دابىل 7407 14 پىكىر 4 اقپان, 2021 ساعات 12:38

رەسەي ازاماتى شىمكەنتتە قالاي شەنەۋنىك بولدى؟

قوس ازاماتتىعى بار ازامات ءبىراز ۋاقىتتان بەرى شىمكەنت قالالىق دەنە شىنىقتىرۋ جانە سپورت باسقارماسىن باسقارىپ كەلگەن. بۇل تۋرالى قر ۇلتتىق سەنىم كەڭەسىنىڭ مۇشەسى ايگۇل ورىنبەك Facebook جەلىسىندەگى جەكە پاراقشاسىندا جازدى.  

ونىڭ ايتۋىنشا، اتالعان مەكەمەنىڭ باسشىسى ولەگ پوچيۆالوۆتىڭ قازاقستاننان بولەك رەسەي فەدەراتسياسىنىڭ دا ازاماتى ەكەنىن انىقتالعان.

ايگۇل ورىنبەك قر مەملەكەتتىك قىزمەت ىستەرى جونىندەگى اگەنتتىگىنىڭ شىمكەنت قالاسى بويىنشا دەپارتامەنتىنىڭ باسشىسى ءارى ادەپ جونىندەگى كەڭەس توراعاسى ا.كومەكباەۆتىڭ قالا اكىمى م.ايتەنوۆكە جازعان حاتىنىڭ كوشىرمەسىن جاريالادى.

«قر مەملەكەتتىك قىزمەت ىستەرى جونىندەگى اگەنتتىگىنىڭ شىمكەنت قالاسى بويىنشا دەپارتامەنتىنىڭ وندىرىسىندەگى قۇجاتتارعا سايكەس، شىمكەنت قالالىق دەنە شىنىقتىرۋ جانە سپورت باسقارماسىنىڭ باسشىسى و.پوچيۆالوۆتىڭ رەسەي فەدەراتسياسى ازاماتتىعىنا قاتىستى شىمكەنت قالاسى پوليتسيا دەپارتامەنتى سۇرانىس حات جولدانعان بولاتىن.

03.02.2021 جىلى №154 كىرىسپەن شىمكەنت قالاسى پوليتسيا دەپارتامەنتىنەن جاۋاپ حات كەلىپ ءتۇستى (قوسىمشا تىركەلەدى).

جاۋاپ حاتقا سايكەس ولەگ پوچيۆالوۆتىڭ رەسەي فەدەراتسيا ازاماتى بولىپ تابىلاتىنى جانە 20.01.2021 جىلى شىمكەنت قالاسى پوليتسيا دەپارتامەنتىنە قازاقستان رەسپۋبليكاسى ازاماتتىعىنان ايىرۋ ءجايىتى تىركەلگەندىگى تۋرالى مالىمەت كەلدى.

قر «قازاقستان رەسپۋبليكاسى مەملەكەتتىك قىزمەتى تۋرالى” زاڭى 61 بابىنىڭ 10) تارماعىنا سايكەس، مەملەكەتتىك اكىمشىلىك قىزمەتشىلەردىڭ قازاقستان ازاماتتىعىنىڭ جوعالتۋى مەملەكەتتىك قىزمەتتى توقتاتۋىنا نەگىز بولىپ تابىلاتىنىن حابارلايمىز», – دەلىنگەن قىزمەتتىك حاتتا.

وتكەن جىلدىڭ جەلتوقسان ايىنىڭ ورتاسىندا بىرقاتار الەۋمەتتىك جەلى پاراقشالارىندا شىمكەنتتىك شەنەۋنىك ولەگ پوچيۆالوۆتىڭ رەسەي ەلىنىڭ ازاماتى ەكەنى تۋرالى اقپارات تاراپ، ءتىپتى كەيبىر قۇجاتىنىڭ كوشىرمەسى جاريا ەتىلدى. وندا ولەگ  پوچيۆالوۆتىڭ تۇرعىلىقتى جەرى ماسكەۋ ەكەنى، ال «ازاماتتىق» باعانىندا «رەسەي فەدەراتسياسى» دەپ جازىلعانىن كورۋگە بولادى. الايدا سپورت باسقارماسىنىڭ وكىلى بۇل اقپاراتتى تەرىسكە شىعاردى.

ايتا كەتەيىك، مەملەكەت باسشىسى قاسىم-جومارت توقاەۆ 2020 جىلى قىركۇيەك ايىنداعى قازاقستان حالقىنا جولداۋىندا «ەگەر مەملەكەتتىك قىزمەتشى نەمەسە كۆازيمەملەكەتتىك مەكەمەنىڭ باسشىسى قوس ازاماتتىق السا، ولار قىزمەتىنەن بوساتىلادى»، دەپ مالىمدەگەن.

ال قازاقستان رەسپۋبليكاسى ىشكى ىستەر ءمينيسترىنىڭ ورىنباسارى الەكسەي كالايچيدي بۇقارالىق اقپارات قۇرالدارىندا تەك 2020 جىلدىڭ 11 ايىندا مەملەكەتتىك قىزمەتشىلەرگە قاتىستى ەكى ازاماتتىقتىڭ 431 فاكتىسى انىقتالعانىن ايتقان.

Abai.kz

14 پىكىر