قاراعاندى فارماتسەۆتيكالىق كەشەنى قازاقستان رەسپۋبليكاسىنىڭ اۋماعىندا «گام-كوۆيد-ۆاك» («سپۋتنيك – V») كوروناۆيرۋس ينفەكتسياسىنا قارسى ۆاكتسينانى تىركەۋ ءراسىمىن اياقتادى.

بۇل تۋرالى قر ۇكىمەتى جانىنداعى قازاقستاندا كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ Telegam پاراقشاسىندا حابارلاندى.

كاسىپورىننىڭ ءباسپاسوز قىزمەتى حابارلاعانداي، 13 اقپاندا قر دەنساۋلىق ساقتاۋ مينيسترلىگىنىڭ ساراپتاما ۇيىمى تىركەۋ دەرەكناماسىنىڭ ماتەريالدارىن قاراۋ ناتيجەسى بويىنشا ۆاكتسينانىڭ قاۋىپسىزدىگى، ساپاسى مەن تيىمدىلىگى تۋرالى قورىتىندى بەرگەن. اتالعان قورىتىندى نەگىزىندە قر دسم مەديتسينالىق جانە فارماتسەۆتيكالىق باقىلاۋ كوميتەتىنە تىركەۋ كۋالىگىن الۋعا ءوتىنىم جولداندى.

وسىلايشا، قازاقستان «سپۋتنيك-V» ۆاكتسيناسىن قولدانۋدى ماقۇلداعان 27-ءشى مەملەكەت بولدى. بۇگىنگى كۇنى ۆاكتسينا رەسەي، بەلارۋس، ارگەنتينا، بوليۆيا، سەربيا، الجير، پالەستينا، ۆەنەسۋەلا، پاراگۆاي، تۇرىكمەنستان، ماجارستان، ءباا، يران، گۆينەيا رەسپۋبليكاسى، تۋنيس، ارمەنيا، مەكسيكا، نيكاراگۋا، سەرب رەسپۋبليكاسى (بوسنيا جانە گەرتسەگوۆينا ەنتيتەتى), ليۆان، ميانما، پاكىستان، موڭعوليا جانە باحرەين سياقتى مەملەكەتتەردە تىركەلگەن.

ەستەرىڭىزگە سالا كەتەيىك، قازاقستاندا ۆاكتسينا ءوندىرۋ تۋرالى شەشىم قر دەنساۋلىق ساقتاۋ مينيسترلىگى مەن رەسەيدىڭ تىكەلەي ينۆەستيتسيالار قورىنىڭ كوميسسياسى قازاقستاندىق فارماتسەۆتيكالىق كاسىپورىندارىنا جۇرگىزىلگەن ساراپتامالارىنىڭ ناتيجەسىندە قابىلدانعان بولاتىن. قفك الاڭى رەسەيلىك سۋبستانتسيادان دايىن ءونىمدى وندىرۋگە اناعۇرلىم دايىن بولىپ شىقتى. رتيق ماماندارى جۇرگىزگەن تەحنيكالىق اۋديت ناتيجەسى وندىرىستىك الاڭنىڭ كوروناۆيرۋسقا قارسى ۆاكتسينانىڭ دايىن ءتۇرىن شىعارۋ ءۇشىن بارلىق تالاپتارعا سايكەس كەلەتىنىن راستادى.

اقپان ايىنىڭ سوڭىندا ەلىمىزدىڭ بارلىق وڭىرلەرىنە قفك وندىرگەن «سپۋتنيك - V» ۆاكتسيناسىنىڭ 90 مىڭعا جۋىق دوزاسىن جەتكىزۋ جوسپارلانىپ وتىر.

دەنساۋلىق ساقتاۋ مينيسترلىگىندە اتاپ وتكەندەي، قازاقستاندا جەرگىلىكتى ازىرلەۋشىلەردڭ بولۋى، سونداي-اق ۆاكتسينالار ءوندىرىسى ءۇشىن جەرگىلىكتى الاڭداردىڭ بولۋى – بۇل ۆاكتسينامەن قامتاماسىز ەتۋگە بايلانىستى تاۋەكەلدەردى ازايتۋعا جانە ەلىمىزدىڭ ەپيدەميولوگيالىق احۋالىنىڭ تۇراقتانۋىنا ەلەۋلى ىقپال ەتۋگە مۇمكىندىك بەرەدى.

Abai.kz