Ranking.kz اناليتيكالىق سايتى قازاقستان مينيسترلەرىنىڭ ءتىل ءبىلۋ دەڭگەيى بويىنشا زەرتتەۋ جۇرگىزىپتى. ول بويىنشا، ۇكىمەتتەگى 18 ءمينيستردىڭ 17-ءسى مەملەكەتتىك ءتىلدى بىلەتىن كورىنەدى. سەنسەڭىز دە، سەنبەسەڭىز دە سول.

ال ەكى مينيستر باقانداي بەس ءتىلدى مەڭگەرگەن ەكەن. ولار: سىرتقى ىستەر ءمينيسترى مۇحتار تىلەۋبەردى مەن قورعانىس ءمينيسترى نۇرلان ەرمەكباەۆ.

تىلەۋبەردى مىرزا: قازاق، ورىس، اعىلشىن، كورەي جانە جاپون تىلدەرىن بىلسە، ەرمەكباەۆ مىرزا: قازاق، ورىس، اعىلشىن، قىتاي جانە پورتۋگال تىلدەرىن مەڭگەرىپتى.

سونىمەن بىرگە، قازاق جانە ورىس تىلدەرىن بىلگەنىمەن، اعىلشىن ءتىلىن بىلمەيتىن 7 مينيستر بار ەكەن. ولاردىڭ قاتارىندا ءبىلىم جانە عىلىم ءمينيسترى اسحات ايماعامبەتوۆ, اقپارات جانە قوعامدىق دامۋ ءمينيسترى ايدا بالاەۆا جانە قارجى ءمينيسترى ەرۇلان جاماۋباەۆ, ىشكى ىستەر ءمينيسترى ەرلان تۇرعىمباەۆتار بار.

ولاردىڭ اعىلشىن ءتىلىن بىلمەۋىنىڭ ءبىر سەبەبى - وتاندىق وقۋ ورىندارىندا وقىعانى دەسەدى. سەبەبى، بۇگىندە قازاقستاندا اعىلشىن ءتىلىن ۇيرەنۋ وتە تومەنگى دەڭگەيدە. ماسەلەن، 2020/2021 وقۋ جىلىندا مەملەكەتتىك تىلدە وقيتىن جوو ستۋدەنتتەرىنىڭ ۇلەسى 64,9% بولسا، ورىس تىلىندە - 29,6%، اعىلشىن تىلىندە - 5,5%-دى قۇراپتى. ال، ەلىمىزدەگى تەحنيكالىق جانە كاسىپتىك ءبىلىم بەرۋ ۇيىمدارىندا اعىلشىن تىلىندە وقيتىنداردىڭ ۇلەسى - 0,3%-دى عانا قۇرايدى ەكەن. سونداي-اق، قازاقستان اعىلشىن ءتىلىن ءبىلۋ دەڭگەيى «وتە تومەن» 10 ەلدىڭ قاتارىنا كىرگەن.

ءارى قاراي... ۇكىمەتتەگى 4 مينيستر 4 تىلدە سويلەي الادى. مىسالى، تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى باعدات مۋسين, ەنەرگەتيكا ءمينيسترى نۇرلان نوعاەۆ, گەولوگيا جانە تابيعي رەسۋرستار ءمينيسترى ماعزۇم ميرزاگاليەۆتەر قازاق، ورىس، اعىلشىن جانە تۇرىك تىلدەرىن بىلەتىن بولسا، ۇلتتىق ەكونوميكا ءمينيسترى اسەت ەرعاليەۆ قازاق، ورىس، اعىلشىن، نەمىس تىلدەرىن مەڭگەرىپتى.

ءبىر قىزىعى، توتەنشە جاعدايلار ءمينيسترى يۋري يلين ورىس تىلىنەن باسقا ءتىل بىلمەيدى ەكەن.

مەملەكەتتىك ءتىلدى مۇلدە بىلمەيتىن يۋري يلين قالاي مينيستر بولىپ ءجۇر دەگەن ابدەن جاۋىر بولعان سۇراقتى، سول ءيليندى مينيستر ەتىپ تاعايىنداعان اقورداعا جانە ءبىر مارتە قويۋعا تۋرا كەلەدى.

دەسە دە، وسى 18 ءمينيستردىڭ ىشىندە جالعىز يلين مىرزا قازاقشا بىلمەيدى دەگەنگە سەنۋدىڭ ءوزى قيىن. دالىرەك ايتساق، مەملەكەتتىك تىلدە سويلەمەيتىن جالعىز يلين ەمەس ەكەنى امبەگە ايان! ماسەلەن، وسى ۋاقىتقا دەيىن دەنساۋلىق ساقتاۋ ءمينيسترى الەكسەي تسوي مىرزانىڭ قازاقشا سويلەگەنىن كورگەن ەمەسپىز. قايسىبىر جىلى ادىلەت ءمينيسترى مارات بەكەتاەۆ تا مەملەكەتتىك ءتىلدى بىلمەيتىنىن مويىنداپ، ءتىل ۇيرەنۋ ءۇشىن ءسىز بەن بىزدەن ۋاقىت سۇراعان. مينيستر لاۋازىمىنا وتكەندە عانا تاعايىندالعان اسەت ەرعاليەۆ ماجىلىستە قازاقشا قويىلعان سۇراقتارعا ورىس تىلىندە جاۋاپ بەرىپ، دەپۋتاتتاردىڭ سىنىنا قالعان. ايتا بەرسەڭ، اقوردا تاڭداعان اق جاعالىلاردىڭ انا ءتىلىن بىلمەي، اقساعان جەرى از ەمەس...

بۇل تۋرالى جۋرناليست جارقىن تۇسىپبەكۇلى جەلىدەگى پاراقشاسىندا: «مىنا 18 ءمينيستردىڭ التاۋى عانا قازاقشا ويلانباي (ىشتەي ورىسشادان اۋدارما جاساماي) سويلەي الادى. قالعانىن قازاق ءتىلىن بىلەدى دەپ ساناپ، تۇسىنا تۋىمىزدى جاپسىرىپ قويۋ ءسال ۇياتتاۋ. ءتىلدى قويشى، سالاسىن بىلسە ەكەن دەپ كەلە جاتقانىمىزعا دا 30 جىل بولادى ەكەن»، - دەپ جازىپتى. الىپ-قوسارى جوق!

نۇربيكە بەكسۇلتانقىزى

Abai.kz