اۋىر اتلەتيكادان تالدىقورعاندا ءوتىپ جاتقان ازيا چەمپيوناتىنىڭ بەيسەنبىدەگى باسەكەلەرى ءبىزدىڭ ەل قۇراماسى ءۇشىن بەرەكەلى بولدى. وسىنىڭ الدىندا جازعانىمىزدا، سول كۇنى قازاقستان قۇراماسىنىڭ قورجىنىنا ءبىر قولا مەن ەكى التىن ءتۇسىپ، جەرلەستەرىمىزدىڭ جۇلدەلەرىنىڭ سانى تورتكە جەتكەنىن ايتقان بولاتىنبىز. بەيسەنبى كۇنى كەشكىسىن ساعات 19-دا «وركەن» سپورت كەشەنىنىڭ جارىس زالىنداعى تايتالاس الاڭىنا شىققان 94 كەلى سالماق دارەجەسىندەگىلەر اراسىندا توپ جارعان ۇشتوبەلىك ۇلان ۆلاديمير سەدوۆ التىندار سانىن ۇشكە، جۇلدەلەر سانىن بەسكە جەتكىزدى. ەندى بىزدەر ءۇشىن جۇلدە جاۋعان كۇن بولىپ تابىلعان بەيسەنبىدەگى باسەكەنىڭ جاي-جاپسارىنا ەگجەي-تەگجەيلى توقتالىپ كورەلىك.

اۋىر اتلەتيكادان تالدىقورعاندا ءوتىپ جاتقان ازيا چەمپيوناتىنىڭ بەيسەنبىدەگى باسەكەلەرى ءبىزدىڭ ەل قۇراماسى ءۇشىن بەرەكەلى بولدى. وسىنىڭ الدىندا جازعانىمىزدا، سول كۇنى قازاقستان قۇراماسىنىڭ قورجىنىنا ءبىر قولا مەن ەكى التىن ءتۇسىپ، جەرلەستەرىمىزدىڭ جۇلدەلەرىنىڭ سانى تورتكە جەتكەنىن ايتقان بولاتىنبىز. بەيسەنبى كۇنى كەشكىسىن ساعات 19-دا «وركەن» سپورت كەشەنىنىڭ جارىس زالىنداعى تايتالاس الاڭىنا شىققان 94 كەلى سالماق دارەجەسىندەگىلەر اراسىندا توپ جارعان ۇشتوبەلىك ۇلان ۆلاديمير سەدوۆ التىندار سانىن ۇشكە، جۇلدەلەر سانىن بەسكە جەتكىزدى. ەندى بىزدەر ءۇشىن جۇلدە جاۋعان كۇن بولىپ تابىلعان بەيسەنبىدەگى باسەكەنىڭ جاي-جاپسارىنا ەگجەي-تەگجەيلى توقتالىپ كورەلىك.
تۇسكە دەيىن 85 كەلى ەرلەر اراسىندا تىم تارتىستى باسەكە ءورىس الدى. مۇنداعى باستى تايتالاستان بۇعان دەيىن بوي بەرمەي كەلە جاتقان قىتايلىقتار مەن كورەيالىقتار تىسقارى قالدى دەۋگە بولادى. جۇلقا كوتەرۋدە 160 كەلىنى يگەرىپ، وسى سالماقتى كوتەرگەن تورتتىكتىڭ قاتارىنان تابىلعانىمەن، الدىنا ءۇش بىردەي مىقتىنى جىبەرىپ قويعان الماس وتەشوۆكە ارتىلعان سەنىم سەلدىرەي باستاعانىمەن، سەرپە كوتەرۋدە سۇرىنبەس دەپ ۇمىتتەندىك. ال جۇلقا كوتەرۋدەگى الدىڭعى ۇشتىككە كەلەر بولساق، ولار مىنالار: يراندىق شوحرات مورادي 168 كەلىنى كوتەرسە، وزبەكستاندىق مانسۋربەك شاشەموۆ 164 كەلىنى، قىتايلىق دي لي 162 كەلىنى باعىندىردى. 105 كەلى سالماق دارەجەدە سەرگەي يستومين 187+210=397 كەلىنى باعىندىرىپ، التىن الدى. سەرپە كوتەرۋدەگى تارتىس وسى تورتتىك اراسىندا ءوربىدى. مۇندا دا مورادي ەشكىمگە دەس بەرمەدى. ول ءۇش مۇمكىندىگىن دە پايدالانىپ، 193, 197 جانە 199 كەلىلەردى باعىندىردى. مانسۋربەك تە ودان قالىسقان جوق. ءبىر كەلىگە عانا ەسە جىبەرىپ، ەكىنشى ورىنعا تۇراقتادى. ءبىزدىڭ الماس بولسا، العاشقى ەكى مۇمكىندىگىندە 190 جانە 197 كەلىنى قينالماي باعىندىرعاننان كەيىن، تاۋەكەلگە بەل بۋىپ، 203 كەلىگە تاپسىرىس بەرگەن ەدى. ەگەر وسى سالماقتى كوتەرگەندە ول قوسسايىس قورىتىندىسىندا كۇمىس القا الۋى مۇمكىن بولاتىن. وكىنىشكە قاراي، قازاقستاندىققا بۇل سالماق باعىنبادى. ال قىتايلىق سپورتشى ءبىرىنشى مۇمكىندىگىندەگى 192 كەلىدەن اسا المادى. وسىلايشا 85 كەلى سالماق دارەجەسىندەگى ساڭلاقتار اراسىنداعى ازيا چەمپيونى اتاعى قوسسايىس بارىسىندا 367 كەلىنى يگەرگەن يران سپورتشىسىنا بۇيىرسا، وزبەكستاندىق شاشەموۆ (164+198=362 كەلى) ءوز ەلى قۇراماسىنىڭ ەسەبىنە كۇمىس القانى جازدى. ءبىزدىڭ جىگىت 160+197 =357 كەلىمەن قازاقستان قورجىنىنا جارىس باستالعاننان بەرگى ەكىنشى قولا جۇلدەنى سالدى.
بىلتىرعى جازعى وليمپيادا ويىندارىنا قازاقستان قۇراماسى ساپىندا بارىپ، سوڭعى ساتتە رەسەيلىك سپورت فۋنكتسيونەرلەرىنىڭ كەسىرىنەن جارىستان شەت قالعان، بۇگىندە الماتى وبلىسىنىڭ اتىنان سىنعا ءتۇسىپ جۇرگەن سۆەتلانا پودوبەدوۆا ءوزىنىڭ باستى قارسىلاسى، قىتايلىق كاو لەيدى بۇل جولى مۇلدە ماڭايلاتپادى دەسەك تە بولادى. جۇلقا كوتەرۋدە ءبىزدىڭ قىز ءۇش مۇمكىندىگىن دە تاماشا پايدالانىپ، 120, 125 جانە 130 كەلىنى (ازيا رەكوردى) باعىندىرسا، كاو لەي 115-ءتى ارەڭ يگەردى. بۇل جاتتىعۋداعى ءۇشىنشى ورىن كورەيالىق ليم جي-حۋەگە بۇيىردى. سۆەتلانا تابىستى تايتالاسىن ودان ارى ساتىمەن جالعاستىرىپ، سەرپە كوتەرۋدە 150 كەلىنى ەركىن ەڭسەردى. قىتايلىق بۇل جولى دا 10 كەلىگە قالىپ قويدى. مۇنداعى كىشى قولا مەدال 128 كەلىنى كوتەرگەن تايلاندتىق ۆاەچاراۆادە راعا بۇيىردى. وسىلايشا سۆەتلانا پودوبەدوۆا قوسسايىس قورىتىندىسىندا قارسىلاستارىن، اتاپ ايتقاندا، كۇمىس القانى العان قىتايلىق سپورتشىنى 22 كەلىگە، تايلاندتىق شتانگاشىنى 55 كەلىگە ارتقا تاستاپ، وزىنە ءۇمىت ارتقان قازاقستاندىقتاردىڭ سەنىمىن ارتىعىمەن اقتادى.
ءبىراز جىل ۇلكەن سپورتپەن قوشتاسىپ، بالالى-شاعالى بولعاننان كەيىن جارىس الاڭىنا قايتا ورالعان تاتيانا حروموۆا ءوزىنىڭ جەڭىسكە دەگەن جىگەرىمەن تالايدى كورگەندەردىڭ ءوزىن تاڭعالدىردى. ايەلدەر اراسىنداعى ەڭ اۋىر سالماقتا سىنعا تۇسكەن ول دا قارسىلاستارىنان اناعۇرلىم جاقسى ونەر كورسەتتى. حروموۆا جۇلقا كوتەرۋدە باستى قارسىلاسى، قىتايلىق ۆۋ جياننان ەك كەلى ارتىق سالماقتى يگەرىپ، 115 كەلىنى باعىندىردى. مۇنداعى ءۇشىنشى ناتيجە تاعى ءبىر تايلاندتىق سپورتشى اننيپا موونتاردىڭ ەنشىسىنە جازىلدى. ءبىرىنشى جاتتىعۋدا الدان كورىنگەن تاتيانا وسى ارتىقشىلىعىن سەرپە كوتەرۋدە دە ساقتاپ قالدى. بۇل جولى 143 كەلىنى كوتەردى. قىتايلىق قىز تاعى دا ەكى كەلىنى كەم باعىندىردى. وسىلايشا قوسسايىس قورىتىندىسىندا 258 كەلى سالماقتى ەڭسەرگەن شىمكەنتتىك حروموۆا ازيانىڭ چەمپيونى اتاندى. وعان ءتورت كەلى ۇتىلعان قىتايلىق شتانگاشى كۇمىس القا السا، تايلاندتىق قايسار قىز 247 كەلىمەن قولانى يەلەندى.
بەيسەنبى كۇنى كەشكە دەيىن قازاقستاندىقتار ءۇش مەدال الدى. بىراق سپورت كەشەنىندەگى جانكۇيەرلەردىڭ مۇرتى دا بۇزىلعان جوق. ويتكەنى ولار الماتى وبلىسىنداعى ۇشتوبە قالاسىنىڭ تۋماسى، وزدەرىنىڭ سەنىم ارتقان جەرلەستەرى، جاستىعىنا قاراماستان، قارسىلاستارىن مويىنداتىپ ۇلگەرگەن ۆلاديمير سەدوۆتىڭ سول كۇنى التىن القا الاتىنىنا ۇلكەن سەنىم ارتىپ، ۇمىتتەنگەن ەدى. سپورت كەشەنىنىڭ اۋلاسىندا جولىعىپ قالعان الماتى وبلىسى سپورت سالاسىنىڭ جەتەكشىسى تۇراتبەك شاراپيەۆ تە تولقىنىسى مەن قۋانىشىن جاسىرا الماي: «تالدىقورعاندا ءوتىپ جاتقان ازيا چەمپيوناتى قازاقستان قۇراماسى ءۇشىن بۇگىن تىم ءساتتى بولىپ تۇر. سونىمەن بىرگە بىزدەر الماتى وبلىسى جۇرتشىلىعى ءۇشىن تىپتەن مەرەيدى تاسىتتى دەسەم، ارتىق ايتقاندىق بولا قويماس. سەيسەنبى كۇنى مايا مانەزا 63 كەلىدە جۇلدەگەر اتانىپ، قازاقستان قۇراماسىنىڭ قورجىنىنا العاشقى قولانى سالىپ ەدى، بۇگىن، مىنە، سۆەتلانا پودوبەدوۆا التىن القالى بولىپ، ابىرويىمىزدى اسىردى. كەشكىسىن سەدوۆ شىعادى سايىسقا. بەيجىڭدەگى وليمپيادالىق دودادا تاجىريبەسىزدىگى سالدارىنان قولدا تۇرعان جۇلدەدەن ايىرىلىپ قالعان جەرلەسىمىزدىڭ ازيانىڭ التىنىن الاتىنىنا سەنەمىن» دەگەن ەدى. بىلىكتى باسشى قاتەلەسپەپتى...
94 كەلى سالماقتا بىردەن سۋىرىلىپ العا شىققاندار اراسىندا قىتاي مەن قازاقستاننان قوس-قوس سپورتشىدان بولدى. سونداي-اق قىرعىزستان مەن يران، قىتايلىق تايپەي مەن تايلاند شتانگاشىلارى دا وزدەرىنىڭ جۇلدەدەن ءۇمىتتى ەكەنىن بايقاتتى. جۇلقا كوتەرۋدەگى العاشقى بەستىكتىڭ قۇرامى تومەندەگىدەي بولدى. ءۇش مۇمكىندىگىن دە قۇر جىبەرمەي، 175, 180 جانە 183 كەلى سالماقتاردى ەش قينالماستان باعىندىرعان ۆلاديمير سەدوۆ كىشى التىندى يەلەنسە، ءۇش مۇمكىندىك بارىسىندا 175 كەلىنى يگەرگەن قىتايلىق حۋانگ جونگ ەكىنشى ورىننان كورىندى. ءۇشىنشى جانە ءتورتىنشى ورىندارعا تاعى ءبىر قىتايلىق ۆۋان ايجۋن مەن قازاقستاندىق ەكىنشى سپورتشى يگور ۆوششانوۆ (170 كەلى) ورنالاستى. 169 كەلىمەن توقتاعان يراندىق ناسير جەلال ناۆاد بەسىنشى ناتيجە كورسەتتى. مىنە، وسى بەستىك سەرپە كوتەرۋدە دە بارلارىن سالىپ، جۇلدەلى ورىنداردى بولىسكە سالدى. قىتاي سپورتشىسى حۋانگ جونگ تاپسىرىستى 205 كەلىدەن باستادى جانە وسى سالماقتى يگەرگەننەن سوڭ، قالعان مۇمكىندىكتەرىندە 210 جانە 215 كەلىنى كوتەرە المادى. ءبىزدىڭ سەدوۆ تا بىردەن 205 كەلىگە تاپسىرىس بەرىپ، ونى ەش قينالماستان باعىندىرى. سودان كەيىن كەزەك-كەزەگىمەن 210 جانە 215 كەلى سالماقتاردى باسىنان اسىردى. قىتايلىق ەكىنشى سپورتشى ۆۋان ايجۋن 200 كەلىدەن سوڭعى تاپسىرىستارىن ورىنداي المادى. ءبىزدىڭ ەكىنشى مىقتىمىز ۆوششانوۆ ءۇش مۇمكىندىگىن دە ورىنداپ، 195, 200 جانە 201 كەلى سالماقتاردى يگەردى. جۇلقا كوتەرۋدە وسى ەكى اۋىر اتلەتتەن قالىپ قويعان يراندىق سپورتشى سەرپە كوتەرۋدەگى ءۇشىنشى مۇمكىندىگىندە 207 كەلىنى بىراق كوتەرىپ، سونىڭ ارقاسىندا قوسسايىس قورىتىندىسىندا ازيا چەمپيوناتىنىڭ قولا جۇلدەگەرى اتاندى. ال ۆلاديمر سەدوۆ 183+215=398 كەلىمەن قۇرلىق چەمپيونى اتاندى. مۇنداعى كۇمىس القانى العان قىتاي اۋىر اتلەتى حۋانگ جونگ ودان ون سەگىز كەلىگە قالىپ قويدى. وسىلايشا بەيسەنبى كۇنى قازاقستاندىق اۋىر اتلەتتەر ايدى اسپانعا بىراق شىعارىپ، ءبىر كۇندە ءۇش التىن جانە ءبىر قولا مەدالدى قورجىنىمىزعا سالدى.

بەت قاتتالىپ جاتقاندا:
جۇما كۇنى كەشكىسىن تالدىقورعانداعى ازيا چەمپيوناتى اياقتالدى. قۇرلىقتىق دودانىڭ سوڭعى كۇنى ەرلەر اراسىنداعى 105 جانە +105 كەلى سالماق دارەجەسىندەگى الىپتار كۇش سىناستى. 105 كەلى سالماقتا سىنعا تۇسكەن سەرگەي يستومين بارلىق قارسىلاستارىن قاپى قالدىرىپ، التىننان القا تاقسا، +105 كەلىدە تاعى ءبىر جەرلەسىمىز ياكوۆ بەرح ەل قۇراماسىنىڭ قورجىنىنا كەزەكتى قولانى سالدى. وسىلايشا قازاقستان اۋىر اتلەتيكا قۇراماسى ءوز تاريحىندا تۇڭعىش رەت تولايىم تابىسقا قول جەتكىزدى. قازاقستان قۇراماسىنىڭ جالپى ەسەبىندە ءتورت التىن جانە ءۇش قولا جۇلدە بار. ازىرگە بەلگىلى بولعانداي، قىزدارىمىز كوماندالىق ەسەپتە ءبىرىنشى ورىندى يەلەنىپتى. قر اۋىر اتلەتيكا فەدەراتسياسىنىڭ پرەزيدەنتى قايرات تۇرلىحانوۆتىڭ اكەسى «بولات تۇرلىحانوۆ اتىنداعى» قايىرىمدىلىق قورىنىڭ وكىلدەرى جەتىسۋلىق ازيا چەمپيوندارى سۆەتلانا پودوبەدوۆا مەن ۆلاديمير سەدوۆتى بولات تۇرلىحانوۆ اتىنداعى ارنايى جۇلدەلەرمەن ماراپاتتادى.

بولات اباعان، الماتى وبلىسى
«ايقىن» گازەتى 18.05.2009 جىل