بەيسەنبى, 29 شىلدە 2021
دابىل 3059 4 پىكىر 30 ناۋرىز, 2021 ساعات 11:44

ەرالى توعجانوۆ ەسكەرۋى كەرەك!

وتكەن بەيسەنبى ياعني، ناۋرىزدىڭ 25-كۇنى نۇر-سۇلتان قالاسىندا جانە وزگەدە ايماقتاردا جەر رەفورماسى جونىندەگى كوميسسيانىڭ العاشقى وتىرىسى وتكەنى بەلگىلى.

ونلاين تۇردە قاشىقتان بايلانىسقان وسى كوميسسيانىڭ مۇشەسى، «قازاق ادەبيەتى» گازەتىنىڭ باس رەداكتورى داۋرەن قۋات مىرزا اۋىل شارۋاشىلىعى جەرلەرىن پايدالانۋ ماقساتتارىندا «تاريحي-مادەني مۇرالاردىڭ» قورعالۋىن تولىق قامتاماسىز ەتۋدى زاڭمەن رەتتەۋ كەرەكتىگىن ۇسىنىس رەتىندە جولدادى. دەگەنمەن كوميسسيا توراعاسى ەرالى توعجانوۆ مىرزا «تاريحي-مادەني مۇرالاردى» قورعاۋ باسقا زاڭمەن رەتتەلەتىنىن ايتىپ، سونىمەن بۇل ۇسىنىس ەسكەرۋسىز قالعانداي بولدى.

تۋراسىن ايتۋ كەرەك، بۇل جەردە داۋرەن قۋات مىرزا وتە وزەكتى ماسەلەنى قوزعاپ وتىر. ويتكەنى «قازاقستان رەسپۋبليكاسىنىڭ تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى» 2019 جىلعى 26 جەلتوقسانداعى №288-VI زاڭدا ەسكەرتكىشتەرگە قاتىستى تەك قۇرىلىس سالۋدى رەتتەۋ جاعى عانا قاراستىرىلعان. قۇرىلىس سالاتىن كومپانيالار نەمەسە جەر قويناۋىن پايدالانۋشىلار وزدەرى جالعا العان جەرلەرىن پايدالانار الدىندا تاريحي-مادەني ساراپتاما جاساتۋعا مىندەتتەلەدى. بىراق بۇل جەردە اۋىل شارۋاشىلىعى جەرلەرىن پايدالانۋ كەزىندە تاريحي-مادەني مۇرا وبەكتىلەرىن قورعاۋ تۋرالى ءبىر دە ءبىر ءسوز جوق. سوندىقتان اتالعان زاڭ ءىرى قۇرىلىس سالاسى مەن جول قۇرىلىسىمەن اينالىساتىن سونداي-اق جەر قويناۋىن پايدالانۋشىلارعا عانا قاتىستى سياقتى بولىپ قالا بەرمەك.

جىل سايىن ءارتۇرلى جوبالارمەن ەل ارالاپ ءىسساپاردا جۇرگەنىمدە اۋىل شارۋاشىلىعى جەرلەرىندە تالاي ەسكەرتكىشتەردىڭ بۇزىلىپ، قيراپ جاتقانىن كوردىم، مەنىڭ ارىپتەستەرىم دە سونداي كەلەڭسىزدىكتەردى كورىپ ءجۇر. ونىڭ نەگىزگى سەبەبى: جەرگىلىكتى اكىمشىلىكتەردەن باستاپ قاراپايىم شارۋالارعا دەيىن تاريحي-مادەني ەسكەرتكىشتەردى قورعاۋ دەگەندى بىلمەيدى. جەرگىلىكتى شارۋالارعا جەرىمىزدىڭ قاسيەت كيەسى، تاريحي-مادەني ەسكەرتكىشتەردىڭ قۇندىلىعى تۋرالى ءتۇسىندىرۋ جۇمىستارى جۇرگىزىلمەيدى. ولار كەيدە شىنىمەن بىلمەي، كەيدە بىلە-تۇرا وسى ەسكەرتكىشتەردى قازىپ تاستايدى. سونىمەن قاتار ديحاندار ەگىستىك جىرتقاندا مىڭداعان ەسكەرتكىشتەردى سوقالارمەن قوپارىپ تاستاعانىن نەمەسە جەرمەن جەكسەن ەتىپ تەگىستەپ تاستاعانىن دا كوردىك.

پرەزيدەنتىمىز قاسىم-جومارت كەمەلۇلى توقاەۆ وتان تاريحىن قايتا جازۋ تۋرالى تاپسىرما بەرىپ، ول جۇمىستارعا عالىمدار مەن زەرتتەۋشىلەر جۇمىلدىرىلىپ جاتقان ساتتە ەسكەرتكىشتەردى قورعاۋ ءىسى كۇن تارتىبىنەن تۇسپەۋى كەرەك. ونىڭ ارعى جاعىندا ەلدىگىمىزدىڭ ماسەلەسى تۇرعاندىعى جانە بەلگىلى.

سوندىقتان «جەر كودەكسىنە» تاريحي-مادەني مۇرا وبەكتىلەرىن قورعاۋدى مىندەتتەيتىن ارنايى ءبىر پۋنكت ەنگىزىلۋى كەرەك. سونىمەن قاتار عارىشتىق مونيتورينگ تۇراقتى تۇردە جانە رەسپۋبليكالىق دەڭگەيدە جۇرگىزىلگەنى ءجون. ول جەردە دە ەسكەرتكىشتەردىڭ ساقتالىنۋىن ۇنەمى قاداعالايتىن جۇيە ەنگىزىلۋى كەرەك دەپ ويلايمىن. ال بۇل ماسەلەنى جەر كوميسسياسىنىڭ توراعاسى ەرالى توعجانوۆ مىرزا مىقتاپ ەسكەرۋى كەرەك!

فوتودەرەك:

1-سۋرەت. ەلەكە سازى جايلاۋىنداعى تونالعان قورعاندار.

2-سۋرەت. ەلەكە سازى جايلاۋىنداعى تونالعان قورعاندار.

3-سۋرەت. پياننىي يار-1 قورعاندار توبىنداعى سوقامەن تەگىستەلگەن قورعان.

4-سۋرەت. ارشالى-1 قورعاندار توبىنداعى تاستارىن قۇرىلىسقا پايدالانۋ ءۇشىن قوپارىلعان قورعان.

5-سۋرەت. پەسچانكا-1 قورعاندار توبىنداعى سوقامەن تەگىستەلگەن قورعاندار.

6-سۋرەت. ميحايليچەنكو قورعاندار توبىنداعى سوقامەن تەگىستەلگەن قورعاندار.

7-سۋرەت. كوندراتەۆكا-4 قورعاندار توبىنداعى سوقامەن تەگىستەلگەن قورعاندار.

8-سۋرەت. كوندراتەۆكا-8 قورعاندار توبىنداعى سوقامەن تەگىستەلگەن قورعاندار.

ەردەن ورالباي، ارحەولوگ

Abai.kz

4 پىكىر