جۋىردا عانا «سامۇرىق-قازىنا» ۇاق باسشىلىعىنان كەتكەن احمەتجان ەسىموۆ ەندى نۇرسۇلتان نازارباەۆتىڭ شتاتتان تىس كومەكشىسى بولىپ تاعايىندالدى. بۇل تۋرالى ەكس-پرەزيدەنتتىڭ ءباسپاسوز حاتشىسى ايدوس ۇكىباي مالىمدەدى. 

«قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ شەشىمىمەن ەسىموۆ احمەتجان سماعۇلۇلى قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ شتاتتان تىس كومەكشىسى بولىپ تاعايىندالدى»،- دەپ جازدى ول.

بۇعان دەيىن ەسىموۆ مىرزا پرەزيدەنت پەن پرەمەرلىكتەن باسقا لاۋازىمدى قىزمەتتىڭ بارلىعىندا بولدى دەۋگە بولادى. « ەكسپو-2017» ۇلتتىق كومپانياسىن، «سامۇرىق-قازىنا ۇلتتىق ءال-اۋقات قورىن» باسقاردى.

ال، kz.expert سايتى ونىڭ قازاقستاندىق اگروونەركاسىپ كومپانيالارىنىڭ جيىنتىعى «يۆولگا-حولدينگتىڭ» جاسىرىن يەسى بولعانىن جازادى. ودان بولەك، ەسىموۆ پەن ونىڭ كۇيەۋبالاسى عالىمجان ەسەنوۆتىڭ وتباسىلىق بيۋدجەتى 2,5 ملرد دوللاردان اساتىن كورىنەدى. ەسىموۆ-ەسەنوۆ وتباسىلىق كەلىسىم-شارتىنىڭ كىرىس كوزى نەگىزىنەن «اتف بانك»، سپورتتىق قورلار جانە ءار ءتۇرلى ەنشىلەس كومپانيالاردىڭ باسىن بىرىكتىرگەن «سامۇرىق-قازىنا» قورىنان تۇسكەن-مىس.

ءسويتىپ، ءتورت جىل «سامۇرىق-قازىنانىڭ» تىزگىنىن ۇستاعان ول، بىلتىر جىل اياقتالار ساتتە پرەزيدەنت توقاەۆقا «قوردىڭ تابىسى 436 ملرد تەڭگەگە جەتتى»، دەپ ەسەپ بەردى. ال، وسى جىلدىڭ ناۋرىز ايىندا ەسىموۆ ول قىزمەتتەن دە بوساتىلدى.

بۇعان دەيىن الەۋمەتتىك جەلىدە «سامۇرىق-قازىنا» باسشىلىعىنىڭ احمەتجان سماعۇلۇلىنىڭ قىزمەتتەن الىنۋىنىڭ سەبەبى -  «ەڭبەككە جارامسىز»، دەپ تۇسىندىرگەنى تۋرالى اقپارات تاراعان بولاتىن. ەندى، سول «ەڭبەككە جارامسىز» ەسىموۆ ەلباسىنا كومەك بەرەتىن كورىنەدى. ايتپاقشى، ەسىموۆتىڭ جاسى بيىل – 70-تە!

تاقىرىپقا تۇزدىق:

ەسىموۆ ەندى قايدا بارادى؟

Abai.kz