«ۇلتتىق مۇددەگە قايشى كەلسە – ونداي ءدىندى ايىپتاۋدان قورىقپا، مۇنداي شاتاق ءدىننىڭ سويىلىن سوعۋشىلاردى ەش تايسالماي اشكەرەلە، سوندا قور بولمايسىڭ، قازاق ۇعلى!» دەيدى الەۋمەتتىك جەلىدەگى جازبالاردىڭ بىرىندە.

قاسيەتتى قۇران ي كارىمنىڭ قاي جەرىنەن ۇلتتىق مۇددەگە قايشىلىق تاۋىپ العانىن بىلمەدىك. وسى سارىنداعى پيعىلداردا يمامدار نەگە ساياساتپەن اينالىسپايدى دەگەن ءبىر تەرىس ۇعىم بار سياقتى. قازاقستان مۇسىلماندارى ءدىني باسقارماسى دا كادىمگى جازۋشىلار وداعى، سۋرەتشىلەر وداعى، كومپوزيتورلار وداعى سياقتى قوعامدىق ۇيىم عوي. قازاقستاندا قاي قوعامدىق ۇيىم جەر ماسەلەسىمەن اينالىسىپ ەدى؟

اۆتوردىڭ ويىنشا سوندا مولدا مەن يمام ساياساتپەن اينالىسىپ قازاقستاندى اۋعانستانعا اينالدىرۋى كەرەك پە؟ يسلام – تىنىشتىقتىڭ، بەيبىتشىلىكتىڭ ءدىنى. ول ادامداردىڭ اراسىندا كوركەم مىنەز تاربيەلەۋگە باعىتتالعان. يسلامدى قابىلداۋ نەمەسە قابىلداماۋ اركىمنىڭ ءوز شارۋاسى.

اللا تاعالا مەن ءسىزدىڭ اراڭىزدا مولدا مەن يمام دەلدالدىق قىزمەت اتقارمايدى. ءمىناجات ەتەمىن دەسەڭىز قۇران ۇيرەنىپ، جاينامازدا نامازبەن تىكەلەي ساجدە جاساي بەرىڭىز. مولدا مەن يمام ءسىزدىڭ كۇناڭىزدى موينىنا المايدى، ءسىز دە ولار ءۇشىن جاۋاپتى ەمەسسىز. ال قاجەت ەتپەسەڭىز اتەيست بولۋ ەركىڭىزدە. ال بىراق مولدا مەن يمامنان ولاردىڭ قۇزىرەتىنە كىرمەيتىن جاۋاپكەرشىلىكتەردى تالاپ ەتۋدىڭ قاجەتى جوق!

حاكىم اباي ايتپاي ما:

«ماحابباتپەن جاراتقان ادامزاتتى

سەن دە ءسۇي ول اللانى جاننان ءتاتتى.

ادامزاتتىڭ ءبارىن ءسۇي باۋىرىم دەپ

جانە حاق جولى وسى دەپ ادىلەتتى» دەپ. ءوزىن ابايدان ۇلى، ابايدان دانىشپان سەزىنۋدىڭ نە قاجەتى بار؟ «اقىلدى ادامدا يمان بار، يماندى ادامدا عيبادات بار» دەگەن. ىنىلەرىمىز اسىلىق پىكىرى ءۇشىن اللا تاعالادان كەشىرىم سۇرار، اباي اتامىز نۇسقاعان جولعا تۇسەر دەپ ۇمىتتەنەمىز. تۇسپەسە تاعى ونى جازعىرمايمىز.

ايتپاۋعا بولمايتىن ءبىر شىندىق، ارۋاق قازاققا قۇداي بولا المايدى. جۇرتتى شاتاستىرمايىق! قۇراندا: «تاڭىرلەرىڭ ءبىر-اق ءتاڭىر» (ناحىل سۇرەسى، 23 ايات). «دۇنيە تىرشىلىگىندەگى قارسىلىقتارىڭنىڭ زيانى وزدەرىڭە عانا. سونان سوڭ بارار جەرلەرىڭ ءبىز جاق» (يۋنىس سۇرەسى، 100 ايات) دەلىنگەن.

مارات ءبايدىلداۇلى

Abai.kz