اتامىزدىڭ سۇيەگى قايدا قالعانىن ءالى كۇنگە دەيىن انىقتاي الماي وتىرمىز

وتكەن عاسىردىڭ 30-شى  جىلدارىنداعى بولشەۆيكتەردىڭ قىرعىنى ءبىزدىڭ ۇلتتىق تراگەديامىز. وكىنىشكە وراي، ءالى كۇنگە دەيىن قىزىلداردىڭ ءبىر ۇلتتىڭ الدىنداعى گەنوتسيدتىك ساياساتىنا ساياسي باعا بەرىلمەي وتىر. وتكەن كۇننىڭ قاسىرەتىن ەسكە الىپ، جازىقسىز قۇربان بولعان جانداردىڭ ەسىمىن ۇرپاق جادىندا قالدىرۋىمىز كەرەك.

تاريح بەتتەرىن، اقيقاتتىڭ بەتىن اشاتىن كەزەڭ كەلدى. ول ءۇشىن ءبىرىنشى كەزەكتە ءتيىستى ورىنداردا ساقتالعان مۇراعاتتارعا جول اشىلۋى كەرەك. وكىنىشكە وراي، ەلەكتروندىق نۇسقاسى جاسالدى دەگەن سىلتاۋمەن، تۇپنۇسقاداعى قۇجاتتاردى زەرتتەۋگە ءالى دە بوگەت كوپ. ال ەلەكتروندىق نۇسقا تەك انىقتاما رەتىندە جازىلعان.

ماسەلەن، ەلدەگى سولاقاي ساياساتقا قارسى شىققانى ءۇشىن 86 جاسىندا «حالىق جاۋى» اتانىپ، سوتتالعان اتامىز يسا قاجىنىڭ سۇيەگى قايدا قالعانىن ءالى كۇنگە دەيىن انىقتاي الماي وتىرمىز.

اكەلەرى ۇستالعاننان كەيىن قاجىنىڭ ۇرپاعى قۋعىنعا ءتۇستى. 25 جىل شەتەلدە بوسقىن بولىپ، تالاي اۋىر كۇندەردى باستان كەشىردى. شىعىس تۇركىستان جەرىندە ءومىر سۇرگەن شيرەك عاسىر ىشىندە يسا قاجىنىڭ وتباسىنان ون شاقتى ادام قايتىس بولىپتى. اتالارىمىز 1955 جىلى ەلگە قايتا ورالىپ، 30 جىل بويى «قىتاي» اتاندى. بۇل تەك ءبىر اۋلەتتىڭ باسىنان وتكەن قاسىرەت...

داۋلەت تىلەۋبەردى

Abai.kz