قازاقستاندا ءار تۋعان بالاعا ءبىر رەتتىك 2 جارىم ميلليون تەڭگە بەرىلۋى ءتيىس. نۇر-سۇلتاندا باس قوسقان وپپوزيتسيا وكىلدەرى وسىنداي تالاپتى قارار رەتىندە ازىرلەپ، بيلىككە جىبەردى. بەلسەندىلەر ەلىمىزدەگى كەز كەلگەن بالاعا 18 جاسقا دەيىن 42 500 تەڭگە تولەنۋى كەرەك دەگەن ۇستانىمدا.

جينالعاندار انا مەن بالاعا بەرىلەتىن كومەكتى شىعىن ەمەس، مەملەكەت قاۋىپسىزدىگىنىڭ كەپىلى دەپ قاراستىرۋ كەرەك دەيدى. ال بەلسەندىلەردىڭ بيلىككە قويعان تالابى ورىندالماسا، ولار حالىقتى جيناپ باس كوتەرۋگە بەكىنىپ وتىر.

تۇركىستان وبلىسىندا تۇراتىن ءجاميلا شادمانوۆا – ۇكىمەت بەكىتىپ بەرگەن مەكەنجاي بويىنشا بەرىلەتىن الەۋمەتتىك تولەمدى دۇرىس الا الماي وتىرعانداردىڭ ءبىرى. ويتكەنى وڭتۇستىكتەگى بىرنەشە اۋدان مەن اۋىلدىق ايماقتا انالاردىڭ ءتيىستى اقشاسىن بەرمەي، اكىمدىكتەگى ماماندار قۇجاتتى دۇرىس راسىمدەمەيتىن كورىنەدى.

«30 213 مىڭ تەڭگە شىققان اناعا قولىنا 19 مىڭ تەڭگە العان. ااك-ءتى ەندىگى توقساندا شىعاراتىن بولساڭدار، ونىڭ 10 پايىزىن بىزگە وتكىزەسىڭدەر دەيدى ەكەن»، –  دەدى بەلسەندى انا فەرۋزا ساپار.

وپپوزيتسيا وكىلدەرى مەكەنجاي بويىنشا بەرىلەتىن كومەكتى انالاردىڭ اۋشىن باسۋ ءۇشىن تاعايىندالعان ۇكىمەتتىڭ كەزەكتى كوزبوياۋشىلىعى دەپ وتىر. ويتكەنى سوڭعى كەزدە تولەمنىڭ بۇل ءتۇرىن الۋدىڭ ءوزى بارلىق جەردە قيىنداپ كەتكەن. بۇعان دالەل – وتكەن اپتادا عانا ەلوردالىق انالاردىڭ شەرۋلەپ مينيسترلىك الدىنا جينالۋى. جەرگىلىكتى اكىمىدىك بيۋدجەتىنەن بەرىلەتىن بۇل قاراجات اركىمنىڭ قولىنا تيمەستەن بۇرىن، ونى الۋ ءۇشىن ءۇش اي سايىن قۇجات جيناپ دالەلدەۋىڭ قاجەت.

«قازىر نەشە ءتۇرلى تولىپ جاتقان باعدارلامالاردى الىپ تاستاۋ كەرەك. ونىڭ ىشىندە ااك، بالا قاراعانى نەمەسە تۋعانى ءۇشىن بەرىلەتىن تولەم. مۇنىڭ ءبارى كەرەك ەمەس. ءار بالاعا 18 جاسقا تولعانشا اي سايىن 42500-دەن بەرىلىپ تۇرۋ كەرەك. ەلىمىزدە اقشا بار»، – دەدى قوعام قايراتكەرى ادىلەت عابدۋللا.

بۇدان بولەك، بەلسەندىلەر ءار تۋعان بالاعا انا كاپيتالى رەتىندە 2,5 ميلليون تەڭگە بەرىلۋ كەرەك دەيدى. بۇل بالانىڭ الاڭسىز ءومىر سۇرۋىنە ارنالعان كەپىلدىكتىڭ العاشقى جارناسى بولماق. ياعني، جاڭا تۋعان نارەستەگە بەرىلگەن قاراجاتتى وتباسى ءۇيدىڭ باستاپقى جارناسى رەتىندە پايدالانىپ نەمەسە بولاشاقتا بالانىڭ وقۋى مەن دەنساۋلىعىنا دا قولدانسا بولادى. بەلسەندىلەردىڭ ايتۋىنشا، انا مەن بالانىڭ قاۋىپسىزدىگى – تۇگەل ۇلتتىڭ تىنىشتىعى.

«قازاقستاندىقتاردىڭ سانى كوبەيمەيتىن بولسا بۇل ءبىزدىڭ قاۋىپسىزدىگىمىزگە كەلەتىن ءبىر ۇلكەن قاۋىپ. رەزوليۋتسيادا جازۋىمىز كەرەك بۇل ۇلتتىق قاۋىپسىزدىك ماسەلەسى دەپ»، – دەدى تىركەلمەگەن «ەل تىرەگى» پارتياسىنىڭ توراعاسى نۇرجان التاەۆ.

جينالعاندار ءبىلىم جانە عىلىم مينيسترلىگىنەن مەكتەپ باعدارلاماسىن قايتا قاراۋدى دا تالاپ ەتىپ وتىر. بەلدى بەكەم بۋعان بەلسەندىلەر بيلىكتەن ناقتى جاۋاپ كۇتپەك. ال ەگەر جوعارىداعىلار ءۇنسىز قالسا سوزگە قۇلاق اسار كوپتى جيناپ اتوي سالىپ الاڭعا شىقپاق. وسىلايشا دىتتەگەنىمىزگە جەتپەي قويمايمىز دەگەن قازاقستاندىق وپپوزيتسيا وكىلدەرى «ەستۋشى» بيلىككە قالاي دا بولسا ۇندەرىن جەتكىزبەك.

Abai.kz