قازاقستان ەاەس-تەن شىعاتىن بولدى ما؟ ونى بىلمەيمىن، بىراق ماسكەۋ-استانا اراسىندا سوڭعى جىلدارى ساياسي سالقىندىق ارتىپ كەلە جاتىر دەپ ويلايمىن (مۇمكىن قاتەلەسەرمىن). وعان بىرنەشە سەبەپتەر دە بار سياقتى.

1. وتكەن جىلى رەسەيدىڭ بىزگە جاساعان يدەولوگيالىق شابۋىلى وراسان بولدى. پۋتين باستاپ، نيكونوۆ، جيريك، فەدوروۆ، مەدينسكي قوستاپ، ءبىراز ەلىمىزدىڭ تۇتاستىعىنا قاۋىپتى سوزدەر ايتىلدى. بۇل ءسوزسىز ءبىزدىڭ يستەبليشمەنتتى ويلاندىرىپ تاستادى.

2. قازاقستان "رۋحاني جاڭعىرۋ" باعدارلاماسىنان باستاپ لاتىن ءالىپبيى نەگىزىندە جاسالعان الىپبيگە كوشۋ پروتسەسىن باستادى. 2025 جىلى ءبىرىنشى كلاسس بالالارى سول الىپبيمەن وقي باستايدى. ءبىز ونى ء"تىلدى دامىتۋ ءۇشىن" دەپ اتايمىز، ال ماسكەۋ "كيريلليتسادان باس تارتۋ - بىزگە قارسىلىق" دەپ تۇسىنۋدە.
3. قازاقستان كوشە، ەلدى-مەكەن اتتارىن قازاق تىلىنە اۋىستىرىپ، تاريحي اتاۋلارىن بەرىپ جاتىر. ونى رەسەي مەمدۋماسى ۇلكەن كۇيزەلىسپەن قابىلداۋدا. باج-بۇج ەتۋدە.

4. رەسەي قازاقستانداعى گەنوتسيد جايلى ايتۋدى ۇناتپايدى. تاقىرىپ جابىق قالسا دەيدى. بىراق سوڭعى ۋاقىتتا بيلىك اقىرىنداپ بۇل تاقىرىپقا نازار اۋدارا باستادى. ەسكەرتكىشتەر قويىپ، زەرتتەۋلەر جاساپ، كوميسسيالار قۇرىپ، فيلمدەر ءتۇسىرىپ جاتىرمىز. از، بىراق جىلجۋ بار. ارحيۆتەر اشىلۋدا، اقيقاتقا ءساۋلe تۇسۋدە. ماسكەۋگە بۇل ۇنامايدى. نەگە ەكەنى دە بەلگىلى.

5. قازاقستاندا تۇركى ەلدەرىمەن اسكەري جانە ەكونوميكالىق وداقتار قۇرۋ يدەياسى ايتىلۋدا. ارينە ونىڭ جاقىن ارادا بولۋى نەعايبىل، بىراق سونداي كوپتەگەن ۇسىنىستاردىڭ ءوزى رەسمي كرەملدى تىتىركەندىرەدى.

قازاق ەلىندە رەسەيدىڭ ىقپالى جوعارى. وتە. بىراق ءبىز ول ىقپالدى قالامايتىنىمىزدى، قارسى ەكەنىمىزدى كورسەتىپ سيگنال جىبەرۋدەمىز. نە نارسە دە سيگنالدان باستاۋ الادى. بۇل ءتۇبى بولاتىن پروتسەسس قوي. ءتۇبى قازاقستان-رەسەي ەكونوميكالىق، ساۋدا قاتىناسىندا بولاتىن، ساياسي-اسكەري وداقتاستىق السىرەيتىن ءسات كەلۋى مۇمكىن. قازاق بيلىگىنە قانشا سىن ايتىلسا دا، قازىرگى قادامى دۇرىس دەپ ويلايمىن. بۇل قاتتى باسساڭ مورت سىناتىن تاقىرىپ قوي. اقىرىنداپ، مايدان قىل سۋىرعانداي ماسەلەنى بايىپپەن شەشۋ كەرەك. ەڭ باستىسى پروتسەسستى توقتاتپاۋ.

اسحات قاسەنعالي

Abai.kz