جۇما, 29 ناۋرىز 2024
انە، كوردىڭ بە؟ 5668 31 پىكىر 24 ماۋسىم, 2021 ساعات 15:12

رەسەي تۋىن ىلگەندەرگە قانداي جازا قولدانىلادى؟

قازاقستاننىڭ قوستاناي وبىسىندا جىتىقارا دەيتىن اۋدان بار. 2019 جىلعى دەرەك بويىنشا، 48 مىڭعا جۋىق تۇرعىنى بار. ۇلتتىق قۇرامى جاعىنان 44,76% قازاقتار، 37,69% ورىس ەتنوسى دەپ كورسەتىلگەن. قالعانى ۋكراين، نەمىس، تاتار، باشقۇرت، كورەي، بەلارۋس قاتارلى وزگە ۇلتتار.

كەشەلى-بەرى قازاق ينتەرنەت كەڭىستىگىنىڭ قىزۋ تالقىسىن تۋدىرعان وقيعا - ءۇيىنىڭ توبەسىنە رەسەي فەدەراتسياسىنىڭ تۋىن ءىلىپ قويعان ازاماتتىڭ ارەكەتى بولىپ وتىر. «YouTube» جەلىسىنە تاراعان شاعىن ۆيدەودان ۇققانىمىز، وقيعا جاڭاعى قوستاناي وبلىسىنىڭ جىتىقارا اۋدانىندا بولعان. الدەبىر ازامات (بولجاممەن قازاقستان ازاماتى) ءوز ءۇيىنىڭ توبەسىنە رەسەي فەدەراتسياسىنىڭ مەملەكەتتىك تۋىن ءىلىپ قويعان. بۇل جايت جەلى قولدانۋشىلارىنىڭ اشۋىن تۋدىرعان. كەيبىرەۋلەرى ءىلىنىپ تۇرعان تۋدى جۇلىپ تاستاۋ كەرەكتىگىن ايتسا، ەندى بىرەۋلەرى پوليتسيا شاقىرۋ كەرەك دەپ ۇسىنىستاعان.

«بۇل ەر ادام رەسەي تۋىمەن قازاقستاندا تۇرادى»، - دەيدى كادر سىرتىنداعى داۋىس.

«Google» ىزدەۋ جۇيەسىندە «روسسيسكي فلاگ ناد كازاحسكيم دوموم» دەگەن اتپەن ونشاقتى ماتەريال جاريالانىپتى. بارلىعى دەرلىك قوستاناي وبلىسىنىڭ جىتىقارا اۋدانىنداعى وقيعا جايلى قىسقا عانا اقپاراتتار.

ەستەرىڭىزدە بولسا، وسىدان 5-6 جىل بۇرىن استانا قالاسىندا تۇراتىن جاندوس قۇرمانباەۆ دەيتىن ازامات بالكونىنا تۋ ىلگەنى ءۇشىن كىنالى سانالىپ، ايىپپۇل تولەۋگە ءماجبۇر بولعان.

بوكسشى گەننادي گولوۆكيننىڭ كەزەكتى جەڭىسىنە قاتتى قۋانعان ول ءوزى تۇراتىن كوپ قاباتتى ءۇيدىڭ بالكونىنا ەلىمىزدىڭ كوك بايراعىن ءىلىپ، جەلبىرەتىپ قويادى. بار «بۇلدىرگەنى»  - وسى. بىراق، جاندوستىڭ مۇنداي پاتريوتتىعىن جاقتىرماعان الدەكىم تاپ سول كەزدە قالالىق اكىمشىلىككە قوڭىراۋ شالىپ، ماسەلەنىڭ ءمان-جايىمەن قۇلاعدار ەتىپ ۇلگەرەدى. ال، الگىندەي حابار العان اكىمشىلىك قىزمەتكەرلەرى قاراپ قالسىن با، «مەملەكەتتىك رامىزدەردى زاڭسىز پايدالانعانى ءۇشىن» جاندوستىڭ جانىن شىعارماسا دا، زاڭدى كولدەنەڭ توسىپ، ونى ايىپپۇلعا جىققان ەدى. بۇل وقيعا قازاق قوعامىندا قىزۋ تالقى بولدى. جۇرت نارازىلىعىن تۋدىردى.

ال بىلتىر قازان ايىندا پرەزيدەنت توقاەۆ قازاقستاننىڭ مەملەكەتتىك رامىزدەرىن پايدالانۋ تۋرالى زاڭدى قايتا قاراۋ كەرەگىن ايتتى.

«پارلامەنتتىڭ بىرقاتار دەپۋتاتتارى مەن پاتريوت ازاماتتاردىڭ ەلىمىزدىڭ مەملەكەتتىك رامىزدەرىن، اتاپ ايتقاندا، قر مەملەكەتتىك تۋىن كەڭىنەن قولدانۋ تۋرالى ۇسىنىسىن قولدايمىن.

قولدانىستاعى زاڭنامادا تۋىمىزدى پايدالانۋعا قاتىستى شەكتەۋلەر بار. مىسالى، پاتەرلەردىڭ بالكونىنا نەمەسە ۇيلەردىڭ قابىرعاسىنا تۋ ىلۋگە تيىم سالىنعان. زاڭنامالىق جانە نورماتيۆتىك اكتىلەردى، ەڭ الدىمەن، مەملەكەتتىك رامىزدەردى پايدالانۋ قاعيدالارىن قايتا قاراۋ قاجەت»، - دەگەن ەدى توقاەۆ.

كەيىن جەلتوقسان ايىندا ۇكىمەت باسشىسى اسقار مامين ارنايى قاۋلىعا قول قويىپ، مەملەكەتتىك تۋدى بالكونعا ىلۋگە رۇقسات بەرىلەتىن بولدى.

ال «قازاقستان رەسپۋبليكاسىنىڭ مەملەكەتتىك رامىزدەرى تۋرالى» قر 2007 جىلعى 4 ماۋسىمداعى N 258 كونستيتۋتسيالىق زاڭىندا (5 باپ), «قازاقستان رەسپۋبليكاسىنىڭ مەملەكەتتiك تۋىن جانە باسقا دا تۋلاردى قازاقستان رەسپۋبليكاسىنىڭ اۋماعىندا ءبىر مەزگىلدە پايدالانۋ» تۋرالى:

«قازاقستان رەسپۋبليكاسىندا اككرەديتتەلگەن ديپلوماتيالىق وكىلدىكتەردى، كونسۋلدىق مەكەمەلەردى، حالىقارالىق ۇيىمداردى جانە (نەمەسە) ولاردىڭ وكىلدىكتەرىن قوسپاعاندا، قازاقستان رەسپۋبليكاسىنىڭ اۋماعىندا قىزمەتىن جۇزەگە اسىراتىن شەتەلدىك ۇيىمدار مەن وكىلدىكتەر پايدالاناتىن شەت مەملەكەتتەردىڭ تۋلارى قازاقستان رەسپۋبليكاسىنىڭ مەملەكەتتىك تۋىمەن ءبىر مەزگىلدە ورنالاستىرىلادى»، - دەپ تايعا تاڭبا باسقانداي جازىلعان.

تۋ ءىلۋدىڭ دە ءتارتىبى بار. قازاقستان رەسپۋبليكاسىنىڭ مەملەكەتتىك تۋىن شەت مەملەكەتتەردىڭ، قوعامدىق بىرلەستىكتەردىڭ جانە باسقا دا ۇيىمداردىڭ تۋلارىمەن ءبىر مەزگىلدە كوتەرگەندە (تىككەندە، ورنالاستىرعاندا) قازاقستان تۋىنىڭ كولەمى باسقا تۋلاردىڭ كولەمىنەن كىشى بولماۋعا ءتيىس. باسقا تۋلاردان تومەن ورنالاستىرىلمايدى.

ال وزگە مەملەكەتتىڭ تۋىن ءۇيىنىڭ توبەسىنە ىلگەن ازاماتقا قانداي شارا قولدانىلماق؟ قۇزىرلى ورگاندار ماسەلەنىڭ اق-قاراسىن انىقيتادى ما؟ رەسمي جاۋاپ كۇتەمىز...

Abai.kz

31 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3559