بۇگىن پرەزيدەنت قاسىم-جومارت توقاەۆ ۇكىمەتتىڭ وتىرىسىن وتكىزدى. جيىن ونلاين فورماتتا ءوتىپ، مەملەكەت باسشىسى سان ءتۇرلى ماسەلەنى قوزعادى. مينيسترلەردى سىنعا الدى، سوكتى، ءتىپتى ورنىنان الدى. ورنىنان الىنعان قر اۋىل شارۋاشىلىق ءمينيسترى ساپارحان وماروۆ بولاتىن. 

اۋىل شارۋاشىلىق مينيسترىنە دەگەن سىن وتە كوپ. سوڭعى ۋاقىتتا ەسەلەپ ارتتى. نەگىزسىز ەمەس. سەبەبى بار جانە ناقتى.

جەر ساتۋدى قولداعان مينيستر

بىرىنشىدەن، اۋىل شارۋاشىلىق ءمينيسترى جەر رەفورماسىندا جەكە مەنشىك جەردى حالىققا ساتۋعا قارسىلىق تانىتپادى. كەرىسىنشە، اشىق قولدادى.

«ءوزىنىڭ بيزنەسىن ءتيىمدى دامىتقىسى كەلەتىن قازاقستاندىقتارعا ۇزاق مەرزىمگە جالعا الۋمەن قاتار اۋىل شارۋاشىلىعى جەرلەرىن جەكە مەنشىككە ساتىپ الۋعا رۇقسات بەرۋ مۇمكىندىگى بولۋى كەرەك. سوندىقتان اۋىل شارۋالىشىعى مينيسترلىگىنىڭ ۇستانىمى: جەردى پايدالانۋدىڭ ەكى ينستيتۋتىن دا, قازاقستاندىقتار ءۇشىن ۇزاق مەرزىمگە جالعا الۋدى دا, ساتۋدى دا ساقتاپ قالۋ قاجەت. قازاقستاندىق جەر پايدالانۋشىلاردىڭ اۋىل شارۋاشىلىق القاپتارىنا جەكە مەنشىك قۇقىعى مەن جالعا الۋ قۇقىعىنىڭ ەكونوميكالىق نەمەسە شارۋاشىلىق تۇرعىسىنان قايسىسى قولايلى بولسا سونى ءوز بەتىنشە تاڭداي الۋ قۇقىعى بولۋى ءتيىس دەپ سانايمىز. ەگەر ءبىز اشىق باسەكەلەستىك پەن ءتيىمدى كاسىپكەرلىك قۇرۋعا ۇمتىلساق، ەرتە مە كەش پە قازاقستاندا اۋىل شارۋالىشىعى جەرىنە تولىققاندى جەكە مەنشىك جانە ونى ساتىپ الۋ، ساتۋ بويىنشا ەركىن نارىق پايدا بولادى», دەگەن ەدى مينيستر.

قۋاڭشىلىققا قارسى جەدەل ارەكەت ەتپەدى

ەكىنشىدەن، ەلدەگى قۋاڭشىلىققا بايلانىستى ناقتى ءارى جەدەل شەشىم شىعارا المادى. ەلىمىزدىڭ باتىس وڭىرىندە مال شارۋاشىلىعى قۋاڭشىلىق سالدارىنان ۇلكەن زارداپ شەگۋدە. ماڭعىستاۋ مەن قىزىلوردادا ءتىپتى جۇت بولىپ جاتىر. پرەزيدەنت توقاەۆتىڭ ءوزى بۇگىنگى جيىندا ءبىر عانا ماڭعىستاۋدا رەسمي 3 مىڭ باس مالدىڭ قىرىلعانىن ايتتى. ال بەيرەسمي تۇرعىدان ونىڭ قانشالىقتى كوپ ەكەنىن ەلەستەتۋدىڭ ءوزى قيىن. قىزىلوردا وڭىرىندە دە ءدال سولاي. ءشوپ پەن جەم تاپشىلىعى بايقالۋدا. شارۋالار بىرنەشە ەسە قىمباتتاعان ءشوپتى ساتىپ الۋعا ءماجبۇر. بۇل تەك قانا ەكى وبلىسقا ەمەس، تۇتاس قازاقستانعا ءتان كورىنىس. ارينە، مۇنداي جاعدايدا جەدەل شەشىم شىعارىپ، ارەكەت ەتپەگەن ءمينيستردى ورنىنان الۋ ادىلەتتى دەۋگە تولىق نەگىز بار.

ازىق-تۇلىك قاۋىپسىزدىگىن قامتاماسىز ەتپەدى

ۇشىنشىدەن، ازىق-تۇلىك قاۋىپسىزدىگىن قامتاماسىز ەتە المادى. ەلىمىزدىڭ كوپتەگەن وڭىرلەرىندە الەۋمەتتىك ماڭىزى بار ازىق-تۇلىك تۇرلەرىنىڭ قىمباتتاۋى ورىن الدى. اتاپ ايتقاندا كارتوپ، پياز، ءسابىز. بۇل تىكەلەي اۋىل شارۋاشىلىق ءمينيسترىنىڭ جاۋاپكەرشىلىگىندەگى ماسەلە بولاتىن. قويماداعى كوكونىستى ارزانعا ساتىپ، وزگە ەلدەن ءۇش ەسە قىمباتقا ساتىپ الۋ ارقىلى دوسقا كۇلكى، دۇشپانعا تابا بولعان قازاقستان، نارىقتاعى باعانى شارىقتاتۋ ارقىلى ەل حالقىنىڭ قالتاسىنا سوققى جاسادى.

ارينە، ايتا بەرسەك كىنا كوپ، ولقىلىق وراسان. مينيستر ورنىنان كەتتى. بۇل شەشىمدى ادىلەتتى دەۋگە نەگىز بار. الايدا بۇرىنعى ءمينيستردىڭ قاتەلىكتەرىن قايتالامايتىن جاڭا مينيستر كىم بولماق؟ مىنە، ەندىگى ماسەلە وسى.

اسحات قاسەنعالي

Abai.kz