جۇما, 17 قىركۇيەك 2021
بيلىك 1280 1 پىكىر 12 شىلدە, 2021 ساعات 13:44

«اباي ءۇيى» الەمنىڭ تاعى ءۇش ەلىندە اشىلماق

دانا ابايدىڭ كوشەلەرى مەن كىتاپحانالارى، ەڭسەلى ەسكەرتكىشتەرى الەمنىڭ كوپتەگەن ەلدەرىندە بار. اباي مۇراسىن تانىتۋ، ناسيحاتتاۋ ماڭىزدى. ويتكەنى اباي يدەياسى مەن كوزقاراسى تەك قانا قازاققا عانا ءتان ەمەس، كۇللى ادامزاتقا ءتان دەسەك تە بولادى. 2021 جىلدىڭ 12 شىلدەسىندە نۇر-سۇلتان قالاسىندا «شەتەلدە تۇراتىن قانداستارمەن مادەني-گۋمانيتارلىق بايلانىستاردى نىعايتۋ تۋرالى» تاقىرىبىندا بريفينگ وتكەن ەدى. ءىس-شاراعا «وتانداستار قورى» كەاق ۆيتسە-پرەزيدەنتى ماعاۋيا سارباسوۆ تا قاتىستى.

بريفينگ بارىسىندا م.سارباسوۆ شەتەلدە تۇراتىن وتانداستارمەن مادەني-گۋمانيتارلىق بايلانىستاردى نىعايتۋعا باعىتتالعان جوبالار تۋرالى جانە قر اقدم مەن قر ءسىم قولداۋىمەن ىسكە قوسىلعان «Abai Uii» مادەني-ىسكەرلىك ۇيلەرىن دامىتۋ جوباسى ءساتتى جۇزەگە اسىرىلىپ جاتقاندىعى جونىندە ايتىپ بەردى.

«قازىرگى تاڭدا «Abai Uii» 5 مەملەكەتتە رەسمي تۇردە اشىلىپ، جۇمىس ىستەپ جاتىر. ەندى 2021 جىلدىڭ ەكىنشى جارتى جىلدىعىندا «Abai Uii» الەمنىڭ تاعى ءۇش ەلىندە، اتاپ ايتقاندا موڭعوليا، رەسەي جانە قىرعىزستاندا اشۋ جوسپارلانعان. وسى ورايدا قوعام شەتەلدەگى قانداستاردى قولداۋ شارالارىن بارلىق ەتنيكالىق قازاقتارعا قاتىستى جۇزەگە اسىرىپ كەلەدى. قازىر الەمدە 250-گە جۋىق قازاق مادەني ورتالىقتارى بار. بۇگىندە «وتانداستار قورى» كەاق مادەني-گۋمانيتارلىق شارالار ۇيىمداستىرۋ ماقساتىندا 71 قازاق مادەني ورتالىعىمەن ءوزارا ىنتىماقتاستىق تۋرالى مەموراندۋمعا قول قويدى»، - دەدى ماعاۋيا سارباسوۆ.

سونىمەن قاتار «وتانداستار قورى» كەاق ۆيتسە-پرەزيدەنتىنىڭ ايتۋىنشا تاعدىردىڭ تالكەگىمەن الەمنىڭ سان ەلىنە شاشىراپ كەتكەن شەتەلدە تۇراتىن قازاقتار ءۇشىن قازاق ءتىلىن ۇيرەتۋ بويىنشا 31 ونلاين-سىنىپ اشىلعان. ولارعا قاتىسۋشىلار سانى 1163 ادامدى قۇرايدى. ارينە بۇل اسا كوپ بولماسا دا، جاقسى كورسەتكىش دەۋگە تولىق نەگىز بار. اتالمىش كۋرس شەڭبەرىندە 333 تەگىن ونلاين-ساباق وتكىزىلىپ، 400-گە جۋىق قانداس سەرتيفيكاتتارعا يە بولدى. 2021 جىلى 440 ونلاين ساباق وتكىزىلىپ، 900 ادام ءوز بىلىمدەرىن ارتتىردى.

سونىمەن بىرگە قازاقستان بيلىگى شەتەلدەگى قانداستارىمىزعا ارنايى گرانتتار ءبولىپ، ەلىمىزدىڭ جوو-رى مەن كوللەدجدەرىندە تەرەڭ ءبىلىم الۋىنا جاعداي جاساپ كەلەدى. جىل وتكەن سايىن گرانتتار سانىن ارتتىرۋ دا ىسكە اسۋدا.

Abai.kz

1 پىكىر