جۋىردا داڭقتى دا ارداقتى اعامىز ءاسانالى ءاشىموۆ 75 جاسقا تولدى. ارتىنشا، «ءاسانالى ساحنادان كەتىپتى» - دەگەن اڭگىمە تارادى. ءمان-جايدى اعانىڭ وزىنەن بىلمەك بولدىق. الايدا اعامىز شەتەلدە دەمالىپ جاتقانىن ايتتى. اراعا ۋاقىت سالىپ تاعى حابارلاستىق. اۋرۋحانادا ەكەن. الاشتىڭ اتاقتى اكتەرىنىڭ كوڭىلىن سۇراپ اۋرۋحاناعا باردىق. از-كەم اڭگىمە بارىسىندا ءبىراز جايتقا قانىقتىق.

ءتىرى جۇرگەننەن كەيىن بىرنارسە جاساۋ كەرەك

جۋىردا داڭقتى دا ارداقتى اعامىز ءاسانالى ءاشىموۆ 75 جاسقا تولدى. ارتىنشا، «ءاسانالى ساحنادان كەتىپتى» - دەگەن اڭگىمە تارادى. ءمان-جايدى اعانىڭ وزىنەن بىلمەك بولدىق. الايدا اعامىز شەتەلدە دەمالىپ جاتقانىن ايتتى. اراعا ۋاقىت سالىپ تاعى حابارلاستىق. اۋرۋحانادا ەكەن. الاشتىڭ اتاقتى اكتەرىنىڭ كوڭىلىن سۇراپ اۋرۋحاناعا باردىق. از-كەم اڭگىمە بارىسىندا ءبىراز جايتقا قانىقتىق.

ءتىرى جۇرگەننەن كەيىن بىرنارسە جاساۋ كەرەك

- اكتەر ساحناعا كىرە ءبىلۋى كەرەك، سوسىن سودان كەتە ءبىلۋى كەرەك. جاس كەلدى، پارتنەرلار كەتتى. ولگەنى ءولدى. ولمەگەنى قارتايدى. جاستاردىڭ اراسىندا سالپاقتاپ جۇرە بەرۋگە دە ىڭعايسىز. تەكە سياقتى باس بولىپ جۇرۋگە دە بولادى ىشىندە. بىراق شايقالاقتاپ جاتىپ قالماي، اۋرە بوپ تەلەجكامەن ءجۇرىپ ويناپ، سوسىن جۇرت ساعان مۇسىركەپ قارايتىنداي جاعدايعا جەتكىزبەي كەتۋ كەرەك. ءوزىڭ سياقتى ءبىر جۋرناليستكە وسىنى ايتقام. سونى «ءاسانالى ساحنادان كەتەيىن دەپ جاتىر» دەپ باسقاشا جاريالاپ جىبەرىپتى. وعان ينتەرنەتتە بىرەۋلەر «جوق، كەتپەيدى» دەپ جازىپتى. ماعان سول كەرەك.
- دەمەك، كەتپەيسىز عوي؟
- كەتەم بە، كەتپەيمىن بە، ونى ءوزىم بىلەم. سوسىن دەنساۋلىعىم بىلەدى. كەتسەم، كەتە سالام. كەتكەن كۇندە دە جاستارمەن جۇمىس ىستەيمىن عوي. سپەكتاكل قويام. اقىل-كەڭەسىمدى ايتام. ساحنادان كەتكەن جوقپىن. ولمەگەننەن كەيىن بىرنارسە جاساۋ كەرەك قوي. سپەكتاكل ويناۋعا دا شاما كەلەدى. بىراق قيقالاقتاپ ءجۇرىپ ويناۋدىڭ نە كەرەگى بار؟ ساحنادا جۇرگەنىمە ەلۋ جىل بولدى. ءتۇپسىز دۇنيە بولمايدى. ول ءبىر كۇنى بىتەدى. سوندىقتان، سونى قۇرتىپ، قيقالاقتاتپاي، دۇرىس ءبىتىرۋ كەرەك. حالىققا سىيلى بولىپ وتسەڭ، سول - باقىت.
- ءبىر حابارلاسقانىمدا دۋبايدا دەمالىستا ەدىڭىز، بۇگىن اۋرۋحاناداسىز. سوعان قاراعاندا، دەمالىس پەن دەنساۋلىققا ەرەكشە كوڭىل بولەتىن سياقتىسىز؟
- قازىرگى جاس شامامىز سوعان ماجبۇرلەپ تۇر. ال سەندەي كەزىمىزدە دەمالىستىڭ نە ەكەنىن بىلگەن جوقپىز. سارتىلداتىپ جۇرە بەردىك. قازىر ەندى بالامدى سىلتاۋ قىلىپ، ايەلىم ۇشەۋمىز قىدىرعاندى جاقسى كورەمىز.
- سەكسەنگە كەلگەن ءبىر كىسى بار. ءالى كۇنگە شەيىن قىزمەتتە. جەكە فيرماسى بار. «جۇمىس جاساماسام، ءومىر سۇرگەنىمدى سەزىنبەيمىن» دەيدى. ءسىزدىڭ ساحنانى قيماۋىڭىزدى سىرى وسىعان ۇقساماي ما؟
- مەن ساحناعا شىققاندا راحات تابامىن. قازىر سونداي جاس شاماسىندامىن. سەندەردەي كەزىمىزدە قوبالجىپ، دىرىلدەيتىنبىز. ال قازىر باسقاشا. مىناۋ بۇلشىقەت، دەنەنى ەركىن ۇستاعان كەزدە، مي دا ەركىن جۇمىس ىستەيدى. بۇكىل اعزا ەركىن بولعان كەزدە، تەكستىمدى ۇمىتىپ قالام-اۋ دەگەن ۋايىم بولمايدى. قاسىڭداعى ادامدى كورۋ، جان-جاعىڭدا نە بولىپ جاتقانىن ەستۋ ءجۇز پايىز بولادى. ال تاجىريبە جوق كەزدە، ول ەلۋ پايىزداي بولاتىن. بۇرىن الدىڭداعىنى كورمەي، ءسوزىن ەستىمەي قالاتىن كەزدەر بولاتىن. قازىر، كەرىسىنشە. ساحناعا شىقسام - ءوزىم پاتشامىن.
- ءسوزىڭىزدى ۇمىتىپ قالمايسىز با؟
- ۇمىتىپ قالسام، باسقا سوزبەن اۋىستىرىپ جىبەرەم. باستىسى ميىم ەركىن جۇمىس ىستەيدى. مىسالى، «مەن ەرتەڭ كەلەمىن» دەگەن ءسوزدى ۇمىتىپ قالاتىن بولسام، «ءاي، مەن كەلەرمىن ساعان» دەي سالامىن. ودان ەشتەڭە وزگەرمەيدى. ال ەندى ەلۋ پايىزى ىستەپ وتىرعان ادام ءبىتتى. سپەكتاكلدىڭ بىت-شىتىن شىعارادى. قانشا تالانتتى بولسا دا ول اكتەرگە بىردەن كەلە قالمايدى. جىلداپ، تاجىريبەمەن كەلەدى. سوسىن ساحنا ادامدى تازارتادى. اسىرەسە جاقسى اكتەرلەردى سولاي جاسايدى. كوبىسى كەتىپ قالدى، بىراق فينالعا شىققانداردىڭ ءبىرازى - جاقسى ادامدار. ادامگەرشىلىگى جاقسى، تازارعان، كىرشىكسىز، بالا سياقتى بولادى. ايتقانعا سەنگىش. تازا ادامدى الداپ كەتۋ وپ-وڭاي. ويتكەنى ول سەنەدى. وندا ارامدىق جوق، سەنىم مول. ال ارام ادام - قۋ. «مىناۋ وتىرىك ايتىپ وتىرعان شىعار»، - دەپ كۇماندانادى.
- اكتەرگە شىندىق، تازالىق، ادالدىق اۋاداي قاجەت. الايدا، كەيبىر اكتەردەن بۇل قاسيەتتى بايقاي المايتىنىمىز بار.
- اكتەر تازالىقتى، شىندىقتى كىشكەنتاي بالادان ۇيرەنۋ كەرەك. بالا قۇمدا ويناعاندا قولىنداعى زاتتى ماشينا ەتىپ وينايدى. ءوزى سوعان سەنەدى. اكتەر دە بالا سياقتى قولىنداعى نارسەسىنە شىن سەنۋ كەرەك. وزگەنى دە سەندىرۋ كەرەك. ءوزى شىن سەنسە، كورەرمەن دە سەنەدى.
ال ادالدىقتى تىپتەن يتتەن ۇيرەنۋ كەرەك. يت يەسىن ءومىرى ساتپايدى. يەسى وعان قانداي قامقورلىق كورسەتسە، يت تە وعان سونداي ادال بولادى. تالاي پرەمەرلەر ءيتىن تاستاپ، ۇشاقپەن ۇشىپ كەتكەن. سولار ءبىر جىل اۋەجايدا ءجۇرىپتى. تاعى ءبىر مىسال. قيىر شىعىستىڭ ءبىر شەتىنەن بىرەۋ كوشپەك بولىپتى. الىپ جۇرۋگە قيىن بولىپ، مىسىعىن قالدىرىپ كەتىپتى. مىڭداعان شاقىرىم اسىپ كەتكەن. وزەن-سۋى، تەڭىز-مۇحيتى، ورمان-توعايى بار... ءبىر جىلدان كەيىن مىسىق يەسىنىڭ ءۇيىن تاۋىپ، ەسىگىن تىرناپ تۇر دەيدى. كوردىڭ بە، ادالدىعىن؟
ال ادامدا ادالدىق از دەگىڭىز كەلەدى عوي؟
كىسىگە ومىرىندە شىن دوس تابۋى قيىن. سوسىن ادال جار تابۋ قيىن. ادال جار تاپقان ادام - ول باقىتتى. مەن جار تاپتىم. مايرانى. 35 جىل تۇردىق. ادامگەرشىلىك وندا تەڭىزدەي ەدى. قايتىس بولدى. وسى دارەجەگە جەتۋىمنىڭ كوپ ۇلەسى سونىكى. كەيىن باعداتپەن وتاۋ قۇردىم. مايرا قايتىپ كەلدى. قازىر ءتورت جاسار ۇلىم بار.
كۇندەلىگىڭىزدە «ەكى كەمشىلىگىم، ەكى باقىتىم بار» دەپ جازىپسىز. اتاپ بەرە الاسىز با؟
كەمشىلىك تە كوپ، باقىت تا جەتەدى. بىراق، ەكى باقىتىم - باعدات پەن كىشكەنتاي ءاسانالىم بولىپ تۇر. ۇلىم بىردە مەنىڭ ورامالىمدى تاۋىپ الىپ، اۋزىمدى سۇرتكەنىمدى اينىتپاي قايتالاپ، قىران-كۇلكى قىلعان. سونى بايقاعانىن ايتساڭشى. سوسىن فيلوسوفيالىق ويى بار. مەن اۋرۋحانادا بولعانىمدا، ول شەشەسىنىڭ قاسىندا ۇيىقتار الدىندا اسپانعا قاراپ جاتىپتى. «اكەمدى ساعىندىم»، - دەپتى. شەشەسى: «ەرتەڭ بارامىز»، - دەپتى. ءبىراز جاتقاننان كەيىن تاعى دا: «انا، اكەم - اسپان عوي»، - دەپتى. ءتورت جاسار بالانىڭ ويىن قارا. تاعى ءبىراز جاتىپ: «انا، سەن - ايسىڭ، مەن - كىشكەنتاي عانا كۇنمىن»، - دەپتى. شەشەسى تاعى نە ايتار ەكەن دەپ: «ءيا، اناۋ جۇلدىزدار نەمەنە سوندا؟» - دەپ سۇراپتى. «ولار ءبىزدىڭ تۋىسقاندارىمىز عوي»، - دەپ جاۋاپ بەرىپتى. ۇلكەن ادام ايتپايتىن وي عوي!
- قازاقشاسى قالاي؟
- قۇدايعا شۇكىر، ەرتىسباەۆتى ەكى وراپ كەتەدى. بۇل - ۇلكەن جەتىستىك!

«مىڭ بالا» - اقاننىڭ شىڭى ەمەس

- سىزدىڭشە كينو قانداي بولۋى قاجەت؟
- كينودا اياعىنا شەيىن شىعاتىن جالعاسقان قىزىل سىزىق بولۋ كەرەك. باستاۋى بار، كوتەرىلەتىن، تۇسەتىن جەرى بار. اياعىنا جەتكەنشە سول سىزىقتان شىقپاۋ كەرەك. ال قازىرگى فيلمدەردىڭ، اسىرەسە، سەريالداردىڭ نە باسى، نە اياعى جوق. كەز كەلگەن جەرىنەن كورسەڭ، تۇسىنىكتى. ويتكەنى، بولەك-بولەك، كىبىرتىك-كىبىرتىك. سوندىقتان، كينو دا اباي ايتقانداي «تەپ-تەگىس جۇمىر كەلسىن اينالاسى» دەگەنگە ساي كەلەدى. سوندا عانا شىعارما كورىلەدى، ۇنايدى.
- ءوزىڭىز قانداي كينو كورەسىز؟
- كينو تارتىمدى، جوعارى ەستەتيكالى، تالعامدى بولۋى كەرەك. مەن سونداي كينونى جاقسى كورەم. كەيبىر كينودا بالشىق، لاس، كوزگە قوراش كورىنىستەر بايقالادى. «قىز جىبەكتەن» تاماق ىشكەن نە لاي-باتپاق سياقتى سۇرەڭسىز ساحنا كوردىڭدەر مە؟
- جوق...
- كينونى كورىپ وتىرىپ جاعىمسىز اسەر الساڭ، ول ونەر ەمەس. ال كينو - ەڭ الدىمەن ونەر. ويسىز ونەر - ولىك. ءومىر بولۋى مۇمكىن، بىراق ونەر از.
مىسالى، تراكتوريست جايىندا قىزىق كينو جاساۋ - وتە قيىن. ول تۋرالى كومەديا جاساۋعا بولادى. ءوزى ماي-ماي، بىراق بىرەۋگە عاشىق بولادى. سونداي سيتۋاتسياعا قۇرىلسا، قىزىق بولادى. ال جەردى جىرتىپ كەلە جاتقان كورىنىستى اكتەردەن گورى تراكتوريستىڭ ءوزى جاقسى وينايدى. ول - ءومىر. نەگىزى ءومىر ءسۇرىپ جاتقان ادامداردىڭ ءبارى - اكتەر. شەكسپيردىڭ ايتقانىنداي: «بۇل ءومىر - ساحنا». ادام دا - اكتەر.
- ءسىزدى كينوعا شاقىراتىندار بار ما؟
- شاقىرادى، بىراق بارامىن با، بارمايمىن با ويلانام! جامباسىما كەلىپ جاتقان كەيىپكەر بولسا، بارار ەدىم. وكىنىشكە قاراي، ونداي باقىت مەنىڭ ماڭدايىما جازىلماي تۇر. ال سەريالدارعا بارا المايمىن. ويتكەنى، ۇلكەن شىعارمادان كەيىن تومەن تۇسۋگە بولمايدى. قازىر «ءسىز كىمسىز كا مىرزا؟» ءفيلمىنىڭ سوڭعى سەرياسىن ءتۇسىرىپ كەتۋ - ارمانىم. شالدىڭ نە وتباسى، نە تۋىسى جوق. بىراق قازاقستاندى ەلىم دەپ كەلدى. ەندى نە ىستەيدى ول؟ سەكسەنگە تاياعان شال. بۇكىل الەمنىڭ ءتىلىن بىلەدى. ول - پلانەتارنىي ادام. الەمدەگى ناركوبيزنەستى بەس ساۋساعىنداي بىلەدى. ەندى ەلگە كەلگەندە ونىڭ پايداسى قالاي تيەدى؟ مۇنى ەل بىلمەيدى، بۇل ەلىن ءبىلۋى كەرەك. سول ەلىنە جۇمىس ىستەۋ كەرەك. كينو «ال» دەپ تۇسىرە سالاتىن نارسە ەمەس. جوباسىن جان-جاقتى كەلتىرۋ كەرەك. مەن اسىقپايمىن. اسىعىستىق - ونەردىڭ جاۋى. «ويباي» دەپ القىنعاننان ەشتەڭە شىقپايدى. سونىڭ جوباسىن ويلاپ ءجۇرۋدىڭ ءوزى - شىعارماشىلىق پروتسەسس.
- تەاتردا جاڭا سپەكتاكل دە وينامايسىز؟
- قاسىمداعىلار كەتىپ قالدى. پارتنەر جوق دەسەم، باسقالار وكپەلەۋى مۇمكىن. بىراق شىندىعىنداي - سولاي. ءبىر-اق سپەكتاكلىم بار، سونى وينايمىن. بالالارمەن سپەكتاكل قويامىن. اكادەميادا اكتەرلىك كۋرسىم بار. جۇمىس جەتەدى ەندى. ۇيدە بالاممەن جۇمىس ىستەيمىن. گۇل وسىرەمىن. اعاش ەگەم. سولاردى سۋارام. جۇمىس جەتەدى.
- كينو تۋرالى ايتىپ جاتىرمىز عوي. اقان ساتاەۆتىڭ «جاۋجۇرەك مىڭ بالا» ءفيلمى تۋرالى نە ايتاسىز؟
- ءتاۋىر فيلم، حالىقتىڭ رۋحىن قامشىلادى. جوڭعارمەن تالاي جىل سوعىسقانىمىز، قورلىق كورگەنىمىز راس. ءۇش ءجۇزدىڭ بالاسى جينالىپ، اڭىراقاي سوعىسىندا ۇلكەن سوققى بەرىپ قۇتىلدىق. ايتپەسە، جوڭعارلار ءيتىمىزدى شىعارعان عوي. ءتيىپ-قاشىپ، ەلدى جاۋلاپ، مالىمىزدى تارتىپ الىپ، ابدەن قورلىق كورسەتكەن. قازاق شىداماعاننان كەيىن جارىلىس جاسايدى. 1986 جىلعى جەلتوقسان، انەۋگۇنگى جاڭاوزەن. باسقا بارار جەر جوق. قازاق ءوزى شىدامدى حالىق. نان مەن سۋى بولسا، سونىمەن وتىرا بەرەدى. ال نان مەن سۋدى تارتىپ العان كەزدە، شىدامايدى. سوندا عانا بۇرق ەتەدى. وعان جىبەرتپەۋ كەرەك. مەملەكەتىمىز باي دەپ جاتىرمىز. «شۇكىر، بارلىعى جەتەدى، وعان شىداۋ كەرەك» دەپ اقىل ايتاتىن ادامدار دا تابىلدى.
- ءسوزىڭىز اۋزىڭىزدا، سىزدەن اقىل سۇراعاندار بولدى ما سول كەزدە؟
- حابارلاستى. بىرىنشىدەن، بالەنباي ادامدى ناشاقور، القاش دەپ بەرگەنىنە قوسىلمايمىن. ەكىنشىدەن، مۇنداي جاعدايدا بەيبىت ادامدارعا وق جاۋدىرعانعا كاتەگوريچەسكي قارسىمىن. سولاي دەپ ايتىپ بەردىم...
- سۇراعىمىزعا قايتا ورالساق؟
- ا، ءيا، جاستاردىڭ ىشىنەن ۇنايتىنى - وسى اقان ساتاەۆ. ول تۇسىرگەن «اداسقاندار»، «اعايىندار»، «ليكۆيداتور»، وسىلاردىڭ ءبارى - كينو. اقاندا كينو بار. باتاليا، ەففەكت كوپ، ارينە. سيتۋاتسياسى، فينالنىي ستسەناسى ۇنادى. سول جاعىنان «قىز جىبەكتەن» كەيىنگى تاريحي جاعدايعا بارا العان كىشكەنتاي العا جىلجۋ - وسى. ازىرگە اقاندا العا جىلجۋشىلىق بار. سوندىقتان مەن ونىڭ كەلەشەگىنەن ءۇمىت كۇتەمىن. «مىڭ بالا» اقاننىڭ شىڭى دەپ ويلامايمىن.
- «قىز جىبەككە» ۇقسايتىن جەرلەرىن بايقادىڭىز با؟
- تۋرا سونداي بولماعانمەن، شىعارمالاردا ۇقساستىق بولادى. ەكەۋى دە جوڭعار شاپقىنشىلىعى كەزەڭى. اتىس، ءولىم، جاۋىزدىق بولدى. ساتقىندىق بولدى. مۇنسىز تاعى سيتۋاتسيا قۇرىلمايدى. ترەۋگولنيك قىز جىبەك-تولەگەن-بەكەجان بولماسا فيلم قۇرىلمايدى. تەك تولەگەن مەن قىز جىبەكتى قالدىرساڭ، كونفەت بولىپ شىعادى. «مىڭ بالادا» دا ترەۋگولنيك بار. دراماتۋرگيانىڭ دامۋىنا قارسى كەلەتىن ءبىر نارسە تۇرماسا، تاعى بولمايدى. بولادى عوي، بىراق قىزىق بولمايدى. «قىز جىبەكتەگى» ۇتىپ تۇرعان نارسە - بەكەجان قاراقشى ەمەس. ول - رىتسار. قىزدى سۇيگەن جۇرەگى، ەل قورعاعان بىلەگى بار. ادامگەرشىلىك سيمپاتياسى بار. ءبىر شەتەلدىڭ ادامدارى «قىز جىبەك عاشىق بولاتىن ادامدى بىلمەيدى ەكەن» دەگەن ەكەن. ول - ماحاببات. تالعاممەن قالاي تالاساسىڭ؟
- ال جاس اكتەرلەردىڭ ونەرىن قالاي باعالايسىز؟
- اكتەرلەر بىلاي تۇر، بىلاي جۇرمەن جۇرگەن جاستار عوي. شەبەرلىگى شىڭدالماعان. بىراق، ءوزىنىڭ ورنىندا. ءرولدى اركىم دە وينايدى، ال كەيىپكەر جاساۋ اركىمنىڭ قولىنان كەلمەيدى.
سىزدىڭشە دارىندى اكتەر قانداي بولۋى قاجەت؟
ءاربىر نارەستە جارىق دۇنيەگە دارىندى بولىپ كەلەدى. ونىڭ الدىندا ەكى جول بار. ءبىرى - كەڭ، داڭعىل جول دا، ەكىنشىسى - جالعىز اياق سۇرلەۋ جول. ادامداردىڭ كوبىسى كەڭ دە كەدەرگىسىز داڭعىل جولمەن جۇرگىسى كەلەدى. ونداي ادامدار - توبىر. ال سۇرلەۋ، بۇرالاڭى كوپ جولعا مىڭنان، ميلليوننان ءبىرى عانا تۇسەدى. مىنە، سول ادام - دارىن! ناعىز دارىن - تاستى جارىپ شىققان گۇل سىندى. ونىڭ ەكىنشى ماعىناسى - نامىس. تالانتتى بيىكتەتەنىن دە نامىس. نامىس اركىمدە بولمايتىنى سەكىلدى، تالانت تا سيرەك.

شىندىقتى جازىپ قالدىرامىن
- كۇندەلىك جازىپ ءجۇرسىز بە؟
مۇمكىندىگىنە قاراي كۇندە جازۋعا تىرىسامىن. ول ماعان تاريح بولىپ قالدى. ءار ادامعا ءوزىنىڭ ءار كۇنى قىمبات. مىناۋ جارىق كۇندى امان-ەسەن كورگەنىمىز ءۇشىن دە تاۋبە ەتۋىمىز قاجەت. سوندىقتان، سول كۇنى ەشتەڭە بىتىرمەسەم دە كوڭىل-كۇيىمدى كۇندەلىگىمە جازىپ قويامىن. ول - مەنىڭ پىكىرىم، كوزقاراسىم. ونى كەلەشەك ۇرپاق ءوزى ەكشەپ الادى. شىندىقتى عانا جازامىن. ايتا المايتىن شىندىقتى، جازىپ قالدىرامىن. ىشىمدەگى شەردى شىعارۋىم ءۇشىن كۇندەلىك ماعان ۇلكەن كومەك. قازىر 8-ءنشى كىتابىمدى جازىپ جاتىرمىن. بىراق ول قولجازبا تۇرىندە قالادى.
- نەگە؟
- ءوزىمنىڭ ايتا الماعان ويىمدى سوندا بىلدىرەمىن. ول - مەنىڭ جەكە ويىم.
- وتكەن كۇندەردەگى كوڭىلدى ساتتەرىڭىزدى وقىعاندا كوڭىل-كۇيىڭىز بۇزىلماي ما؟
- قايتا شابىتتانامىن. ءار كۇنىمنەن، قورىتىندى جاسايمىن. سونىسىمەن دە جاقسى.
- «بىرەۋگە اتاق بەرگەن، ابىروي بەرمەگەن» دەپ جازىپسىز كىبابىڭىزدا. سىزدە وسىنىڭ ەكەۋى دە بار. قايسىسىن جوعارى باعالايسىز؟
- ەكەۋىن ايىرىپ الۋعا بولمايدى. ابىروي ارقىلى اتاق كەلەدى. اتاق ارقىلى ابىروي وسەدى. ابىرويىڭ بولسا، حالىقتىڭ ساعان دەگەن سالەمى دۇرىس. حالىق بارعان جەردە الاقانىنا كوتەرەدى. الاقاندا كوتەرەدى ەكەن دەپ، الاقانىندا وتىرىپ المايمىز عوي. ال حالىققا جۇعىمدى بولۋ - اركىمنىڭ مىندەتى.
سۇحباتتاسقان سەرىكبول حاسان

«جاس قازاق» گازەتى