كۇنى كەشە گرۋزيانىڭ باتۋمي قالاسىندا تاريحي ماڭىزى بار كونفەرەنتسيا ءوتتى. كونفەرەنتسياعا گرۋزيا، مولدوۆا جانە ۋكراينا باسشىلارى مەن ەۋروپالىق كەڭەس باسشىسى قاتىستى. «ايماقتىق ترانسفورماتسيا جانە ەو-نىڭ تارتىلىس كۇشى» دەپ اتالاتىن كونفەرەنتسيا بارىسىندا ءۇش ەل باتىسقا بەت الاتىنىن ناقتى ءبىلدىرىپ، ارنايى قۇجاتقا قول قويدى. 

ۋكراينا باسشىسى زەلەنسكيدىڭ گرۋزياعا ساپارى قارساڭىندا گرۋزيا تاراپى قاماۋدا بولعان ەكى ۋكراين تەڭىزشىسىن بوساتتى. تەڭىزشىلەردى 2020 جىلدىڭ قاراشاسىندا گرۋزيا تاراپى شەكارانى بۇزدى دەپ تۇتقىنداعان بولاتىن. زەلەنسكي تەڭىزشىلەردىڭ بوساتىلۋىن جىلى قابىلداپ، «ارىپتەستىككە جاساعان ناقتى قادام» دەپ اتادى. زەلەنسكيدىڭ ۇشاعى تەڭىزشىلەر بوساعانى جايلى حابارلاما كەلگەن سوڭ، گرۋزياعا بەتالدى. زەلەنسكي گرۋزياعا كەلە سالا، رەسەي تاراپى وككۋپاتسيالاپ العان ابحازيا ايماعىن باقىلاۋ ماقساتىندا اتالمىش اۋدانعا اتتانىپ كەتتى.

ابحازيا اۋماعىن اباستۋماني باقىلاۋ بەكەتى ارقىلى قاراعان زەلەنسكي رەسەيدىڭ اگرەسسياسىنا بىرلەسە كۇرەسۋگە شاقىردى.

«رەسەيدىڭ ابحازيادا اسكەر سانى ارتۋدا، ادام قۇقىعى تاپتالىپ جاتىر»، - دەدى زەلەنسكي.

گرۋزيا پرەزيدەنتى سالومە زۋرابيشۆيلي ەۋروپالىق كەڭەس توراعاسى شارل ميشەلمەن كونفەرەنتسيا الدىندا كەزدەسۋ ۇيىمداستىردى.

«بۇگىن گرۋزيا ءۇشىن وتە ماڭىزدى كۇن. ويتكەنى ءبىز ەۋروپالىق بولاشاق جايلى تالقىلايمىز. ەۋروپالىق كەڭەس باسشىسىنىڭ بۇعان قاتىسىپ جاتقانىنا العىس بىلدىرەمىن. گرۋزياعا ەو كىرگەن سايىن گرۋزيانىڭ دامۋى جىلدامداپ، كەدەرگىلەرگە قاراماستان يالعا جىلجيتىن بولادى»، – دەپ جازدى زۋرابيشۆيلي ءوزىنىڭ Twitter پاراقشاسىنا.

باتۋمي كونفەرەنتسياسىنا گرۋزيا مەن ۋكراينا باسشىسىنان بولەك، مولدوۆا پرەزيدەنتى دە كەلدى. 11 شىلدە كۇنى مولدوۆادا پارلامەنتتىك سايلاۋ ءوتىپ، وندا ەۋروپامەن ارىپتەستىكتى جاقتايتىن كۇشتەر جەڭىسكە جەتكەن بولاتىن. سايلاۋعا 20 پارتيا قاتىستى. «كوممۋنيستەر مەن سوتسياليستەر» اتتى بلوكقا مايا ساندۋدىڭ «ارەكەت جانە كەلىسىم» پارتياسى قارسى تۇردى. وسىلايشا ساندۋ جاقتاستارى باسىمدىقپەن جەڭىسكە جەتىپ، رەسەيدى جاقتايتىن كۇشتەر كۇيرەي جەڭىلگەن ەدى.  مىنە، سول جەڭىستەن كەيىن ساندۋ گرۋزياعا كەلىپ، «گرۋزيانىڭ ەۋروپالىق جولى» اتتى باسقوسۋعا قاتىستى.

كونفەرەنتسيادا ءۇش ەل باسشىلارى ورتاق «باتۋمي كەلىسىمىن» جاساستى. وندا بىلاي دەپ جازىلعان:

«ءبىز ەو-عا ينتەگراتسيالانۋ جولىنداعى شەشىمىمىزدىڭ ناقتى ەكەنىن راستاي وتىرىپ، ەۋروپالىق ستاندارتتارعا ساي زاڭىمىزدى، دەموكراتيالىق ينستيتۋتتارىمىزدى رەفورمالاۋدى جالعاستىراتىنىمىزدى مالىمدەيمىز. ءبىز ناقتى جانە تۇبەگەيلى ناتيجەگە قول جەتكىزگەنگە دەيىن وسى باعىتتى ۇستانامىز. 

ءۇش ارىپتەس ەلگە ەۋروپالىق قۇندىلىقتاردى ۇسىنۋ دامۋ مەن وركەندەۋگە ۇلكەن ستيمۋل بولماق. ءبىز ەو-مەن كەلىسىم بويىنشا جاساسقان كەلىسىمشارتتىڭ 49 بابىنا سايكەس گرۋزيا، مولدوۆا جانە ۋكراينا ەۋروپا ەلدەرى بولا وتىرىپ، ەو-عا مۇشەلىككە ۇسىنىس تاستاي الاتىنىن راستايمىز. 

ەو-نىڭ ۋكراينا، مولدوۆا، گرۋزيا ايماقتارىن حالىقارالىق زاڭ شەڭبەرىندە مويىنداپ، اۋماقتىق تۇتاستىقتى ساقتاۋعا جاساپ جاتقان ارەكەتى ءۇشىن العىس بىلدىرەمىز.  ءبىز ەو مەن ارىپتەستىكتى ارتتىرىپ، گيبريدتى قاۋىپتەرگە قارسى كۇرەستە كومەكتەسۋگە دايىنبىز. رەسەيدىڭ گرۋزيا ايماعىن زاڭسىز باسىپ الۋى مەن ۋكراينا شىعىسىندا سوعىس باستاۋى، قىرىمنىڭ ۋاقىتشا وككۋپاتسياسى مەن مولدوۆاداعى پريدنەستروۆە ماسەلەسىنىڭ شەشىلمەۋى ەۋروپا ەلدەرى ءۇشىن قاۋىپ ءتوندىرىپ وتىر»، - دەلىنگەن قۇجاتتا.

ياعني قۇجات بويىنشا ءبىز رەسەيدىڭ جابايى جاۋلاۋشىلىق ارەكەتىنە قارسى كۇرەسەتىن تاعى ءبىر پلاتفورمانىڭ پايدا بولعانىن كورىپ وتىرمىز.

كەزدەسۋدەن كەيىن ۋكراينا باسشىسى زەلەنسكي:

«مەنىڭ حالقىم ەۋروپالىق ستاندارتتارمەن ءومىر سۇرۋگە لايىقتى»، - دەدى. الەۋمەتتىك جاعدايى جاقسى ەۋروپا ەلدەرىنىڭ ءومىر ءسۇرۋ دەڭگەيىن مەڭزەپ وتىرعانى انىق.

كا مىرزا

Abai.kz