كرەمل جوسپارى: «بەلورۋس مايدانى» اشىلا ما؟
ماسكەۋ ۋكرايناعا قارسى سوعىستىڭ جاڭا ستسەناريىن ازىرلەپ جاتىر ما؟ سولتۇستىكتەن، ياعني بەلارۋس تەرريتورياسىنان جاڭا سوققى بەرۋ قاۋپى قانشالىقتى جوعارى؟
بەلارۋس وپپوزيتسياسىنىڭ ليدەرى، ەكس-ساياسي تۇتقىن نيكولاي ستاتكەۆيچ بۇل جاعدايعا قاتىستى دابىل قاعۋدا. ونىڭ ايتۋىنشا، كرەمل كۇزدەگى پارلامەنتتىك سايلاۋدان كەيىن جاڭا موبيليزاتسيا تولقىنىن باستاپ، 500 مىڭنان 1 ميلليونعا دەيىن جاڭا سارباز جيناۋدى جوسپارلاپ وتىر.
رەسەي مەن بەلارۋس بيلىگى ءال-ازىردەن دايىندىقتى باستاپ كەتكەن. وعان دالەل بولارلىق بىرنەشە فاكتى دە بار. سونىڭ ەڭ ماڭىزدىسى – شەكاراداعى ينفراقۇرىلىس: ۋكراينا شەكاراسىنا جاقىن ورنالاسقان بەلارۋس اۋماعىندا اسكەري ينفراقۇرىلىستى بەلسەندى تۇردە سالۋ جۇمىستارى ءجۇرىپ جاتقانى بايقالادى.
سالدارى قانداي بولماق؟ ەگەر بۇل پلاتسدارم شابۋىل ءۇشىن پايدالانىلسا، گومەل، برەست، موزىر جانە پينسك سياقتى ءىرى قالالار سوعىس ءورتىنىڭ ورتاسىندا قالۋى مۇمكىن. بۇل جاعداي 1654–1667 جىلدارداعى ماسكەۋ اسكەرىنىڭ بەلارۋس اۋماعىنداعى ارەكەتتەرىن ەسكە تۇسىرەدى. تاريح قايتالانا ما؟
«ءبىر وتباسىنىڭ «بانكەتتى جالعاستىرعانى» ءۇشىن تولەيتىن باعاسى — بۇكىل مەملەكەتتىڭ، ۇلتتىڭ جانە ميلليونداعان بەلارۋستاردىڭ تاعدىرى بولۋى مۇمكىن»، - دەيدى ستاتكەۆيچ.
بۇل تەك ساياسي ويىن با، الدە ايماقتىق ۇلكەن قاقتىعىستىڭ جاڭا كەزەڭى مە؟ رەجيم ماسكەۋدىڭ قىسىمىنا قانشالىقتى توتەپ بەرە الادى؟
رەسەي مايدانداعى وراسان زور شىعىننىڭ ورنىن تولتىرا الماي، تىعىرىققا تىرەلدى. ەندى كرەملگە شۇعىل تۇردە ونداعان مىڭ دايىن سارباز قاجەت. ال بۇل رەسۋرستى ماسكەۋ قايدان الماق؟
«ستراتەگيا XXI» گلوباليستيكا ورتالىعىنىڭ قاۋىپسىزدىك باعدارلامالارىنىڭ جەتەكشىسى پاۆەل لاكيچۋك ماڭىزدى تالداۋ جاساپتى. ساراپشىنىڭ ايتۋىنشا، ۋكراينا قازىر جاۋدى ەكى باعىتتا شارشاتۋ ستراتەگياسىن ءساتتى جۇرگىزىپ جاتىر:
- ءبىرىنشىسى — رەسۋرستان، وق-دارىدەن جانە ازىق-تۇلىكتەن ايىرۋ;
- ەكىنشىسى — ءتىرى كۇشتى جۇيەلى تۇردە جويۋ.
قازىرگى ۋاقىتتا ۋكراينا ساربازدارى اي سايىن 30-35 مىڭ باسقىنشىنىڭ كوزىن جويادى. رەسەيدىڭ موبيليزاتسيالىق اپپاراتى دا ايىنا ءدال وسىنداي مولشەردە ادام جيناي الادى. وسىلايشا، رف قازىر ەكى وتتىڭ ورتاسىندا تۇر: نە تەك شىعىننىڭ ورنىن جابۋ كەرەك، نە جاڭا رەزەرۆ جيناۋ كەرەك. ەكەۋىن قاتار اتقارۋعا كۇشى جەتپەيدى.
كرەملدىڭ «ا پلان» جانە «ب پلان» شەشىمدەرى:
- سولتۇستىك كورەيا فاكتورى: كيم چەن ىن بۋعان دەيىن 10-11 مىڭ اسكەر بەرىپ، باعىن سىناپ كوردى. ەندى ول پۋتينمەن ساۋدالاسىپ جاتىر. كەلىسىمگە كەلۋ ىقتيمالدىعى وتە جوعارى.
- بەلارۋس ستسەناريى: پۋتينگە شۇعىل ارادا 40-60 مىڭ دايىن سارباز كەرەك. لۋكاشەنكو ءوز اسكەرىن مايدانعا جىبەرگىسى كەلمەي، بارىنشا قارسىلاسىپ باعۋدا. بيلىكتەگى «باسشىنىڭ» ەركىنە قاراماستان، پۋتين بەلورۋس ارمياسىن ءوزى تارتىپ الۋى مۇمكىن.
رەسەي كۇزگە قاراي موبيليزاتسيا جاريالاعان كۇننىڭ وزىندە، ونىڭ ناتيجەسى 2027 جىلدىڭ كوكتەمىنە قاراي بىراق بىلىنەدى. ال قازىرگى مايدانداعى دەفيتسيتتى جابۋ ءۇشىن ماسكەۋ كورشىلەرىن اشىقتان-اشىق سوعىسقا سۇيرەۋگە ءماجبۇر.
Abai.kz
