وسىدان 23 جىل بۇرىن الەم جۇرتشىلىعى جاڭا باسكەتبول جۇلدىزىنىڭ عاجايىپ ونەرىنە قول سوقتى. بۇل لوس-اندجەلەستە وليمپيادا ويىندارى وتكەن 1984 جىل ەدى. 22 جاسار مايكل باپكەرلەر كەڭەسى تاڭداپ العان 36 ۇمىتكەردىڭ اراسىنان جارقىراي كورىنىپ، اقش-تىڭ ۇلتتىق قۇراماسىنىڭ قاتارىنان ويىپ تۇرىپ ورىن الدى. ازۋلى ەلدىڭ باس كومانداسىن وسى وليمپيادادا دجوردان مەن پاتريك يۋينگ كەزەك-كەزەك كاپيتان رەتىندە العا سۇيرەپ وتىردى. ءوز جەرىندە وتكەن ءدۇبىرلى جارىستى اسا ءساتتى اياقتاعان اقش باسكەتبول قۇراماسى التىن جۇلدەنى جەڭىپ السا، وسى ۇجىمنىڭ ساپىنداعى ەڭ ناتيجەلى ويىنشى مايكل دجوردان وليمپيادلىق ءتۋرنيردىڭ ۇزدىك باسكەتبولشىسى بولىپ تانىلدى. قالىڭ ەلدى دجورداننىڭ الاڭداعى سەكىرۋى تاڭ قالدىردى. ول بەينە ءبىر قاناتتى قۇس سياقتى اۋەدە قالىقتايتىن.

وسىدان 23 جىل بۇرىن الەم جۇرتشىلىعى جاڭا باسكەتبول جۇلدىزىنىڭ عاجايىپ ونەرىنە قول سوقتى. بۇل لوس-اندجەلەستە وليمپيادا ويىندارى وتكەن 1984 جىل ەدى. 22 جاسار مايكل باپكەرلەر كەڭەسى تاڭداپ العان 36 ۇمىتكەردىڭ اراسىنان جارقىراي كورىنىپ، اقش-تىڭ ۇلتتىق قۇراماسىنىڭ قاتارىنان ويىپ تۇرىپ ورىن الدى. ازۋلى ەلدىڭ باس كومانداسىن وسى وليمپيادادا دجوردان مەن پاتريك يۋينگ كەزەك-كەزەك كاپيتان رەتىندە العا سۇيرەپ وتىردى. ءوز جەرىندە وتكەن ءدۇبىرلى جارىستى اسا ءساتتى اياقتاعان اقش باسكەتبول قۇراماسى التىن جۇلدەنى جەڭىپ السا، وسى ۇجىمنىڭ ساپىنداعى ەڭ ناتيجەلى ويىنشى مايكل دجوردان وليمپيادلىق ءتۋرنيردىڭ ۇزدىك باسكەتبولشىسى بولىپ تانىلدى. قالىڭ ەلدى دجورداننىڭ الاڭداعى سەكىرۋى تاڭ قالدىردى. ول بەينە ءبىر قاناتتى قۇس سياقتى اۋەدە قالىقتايتىن.
مايكل 1962 جىلى برۋكليندە ومىرگە كەلەدى. بىراق كوپ ۇزاماي ونىڭ وتباسى سولتۇستىك كارولينا شتاتىنا قاراستى شاعىن قالا ۋيلمينگتونعا قونىس اۋدارادى. بالالىق شاعى تۋرالى داڭقتى باسكەتبولشى بىلاي دەپ وي تەربەيدى: «بەس جاسىمدا مەن العاش رەت باسكەتبول ويىنىنا كۋا بولىپ، ۇبل - داعى (نبا) كاسىپقويلار سياقتى دوپتى شىعىرشىققا ۇستىنەن سالۋعا قاتتى قۇمارتتىم. مەن سەگىزىنشى سىنىپتا وقىپ جۇرگەنىمدە، ول كەزدە بويىمنىڭ ۇزىندىعى نەبارى 173 سم. بولاتىن تۇڭعىش رەت دوپتى شىعىرشىققا توبەسىنەن ەنگىزدىم. بۇعان دەيىنگى جاتتىعۋلاردىڭ بىردە-بىرەۋىندە ءدال بۇلايشا بيىككە سەكىرىپ كورگەن ەمەس ەدىم. ال سول جولعى ويىندا وزىمە-ءوزىم سەنە المادىم، قانات بىتكەندەي تىم بيىككە كوتەرىلىپ، دوپتى شىعىرشىققا اتىپ ۇردىم. اۋىر ەڭبەك، ءوز مۇمكىندىگىمە دەگەن سەنىمدىلىك جانە ءوزىمدى كۇننەن كۇنگە كوبىرەك جۇمىس ىستەۋگە بەيىمدەي ءبىلۋدىڭ ارقاسىندا مەن ارمانىمداعى باسكەتبولشىعا اينالا الدىم».
شىنىمەن دە مايكل دجوردان تەك ءوزىنىڭ قيالىنداعى ەمەس، سونداي-اق باسكەتبول دوبىن قولىنا العان سان مىڭداعان سپورتشى ارمانداعان ۇلى باسكەتبولشىعا اينالدى. ميلليونداعان جانكۇيەردىڭ جۇرەگىن جاۋلاعان ول تەك امەريكانىڭ ەمەس كۇللى الەم باسكەتبولىنىڭ شوق جۇلدىزى رەتىندە تانىلدى.
مايكلدىڭ اناسى دا ۇلىنىڭ بالالىق شاعىنان-اق داڭقتى باسكەتبولشى بولۋعا تالپىنعانىن راستايدى: «ول شامامەن 11-12 جاسىندا ءوزىنىڭ قايتكەندە دە وليمپياداعا قاتىساتىندىعىن ايتىپ ۋادە بەردى. ارمانى 1984 جىلى ورىندالدى، مايكل بار بولعانى 22 جاستا ەدى».
داڭقتى ۇلىن اكەسى دجەيمس تە ماقتان تۇتادى: «ول ءوزىنىڭ تۋعان اعاسى لارريمەن ۇنەمى بىرگە ءبىر باسكەتبول وينايتىن. ارينە وزىنەن ءتورت جاس كىشى ءىنىسىن لارري ۇتىپ كەتەتىن. بىراق جىل وتكەن سايىن مايكل ەسەپ ايرماسىن ايتارلىقتاي قىسقارتىپ وتىردى. ال ون بەسكە تولعان شاعىندا ول ءوزىنىڭ اعاسىن ۇتا باستادى».
مايكلدىڭ اتا-اناسى تۋرالى ءسوز قوزعاعاندا، ونىڭ اناسىنا تارتقاندىعىن ايتا كەتكەن ابزال. ويتكەنى دجورداندار تۇقىمىندا بويشاڭ ادامدار استە بولعان ەمەس. ولاردىڭ ەڭ ۇزىن دەگەنىنىڭ ءوزى 183 سانتيمەتردەن اسپاعان كورىنەدى. سونداي-اق مايكلدىڭ ءوزى دە بويىنىڭ ۇزىن بولۋى ءۇشىن ايانباي تەر توگىپ، وسى ماقساتقا ارنالعان جاتتىعۋلاردى ۇزبەي جاساپ وتىرعان. كىم بىلەدى، سونىڭ ارقاسى بولار 18 -دەن 19- عا قاراعان جىلى ونىڭ بويى 12,5 سانتيمەترگە ءبىر-اق سەكىرىپ، 198 -گە جەتەدى.
ونىڭ مەكتەپ قابىرعاسىنداعى جاتتىقتىرۋشىسى فرەد لينچ بىلاي وتكەندى بىلايشا ەسكە الادى: «مايكل 9- سىنىپتا وقىپ جۇرگەنىندە بويىنىڭ ۇزىندىعى 183 سم. بولدى. سول كەزدىڭ وزىندە ول الاڭعا مەكتەپتىڭ نەگىزگى قۇرامىندا شىققىسى كەلەتىن. بىراق ول سول تۇستا جوعارى سىنىپ وقۋشىلارى اكەلەتىندەي ناتيجەگە قول جەتكىزە المايتىن-دى. ايتسە دە مايكل ءوزىنىڭ تاباندىلىعىنىڭ ارقاسىندا ءبىر جىلعا جەتەر-جەتپەس ۋاقىتتىڭ ىشىندە نەگىزگى قۇرامنان كوماندانىڭ بەلدى ويىنشىسى رەتىندە ورىن الدى. ال 11-12- سىنىپتاردا وقىپ جۇرگەن شاعىندا ول تەك مەكتەبىمىزدىڭ ەمەس، سونداي-اق بۇكىل سولتۇستىك كارولينا شتاتىنىڭ ۇزدىك ويىنشىسى بولىپ تابىلدى. ال كەيىنىرەك اقش وقۋشىلارى اراسىنداعى ۇزدىك ون باسكەتبولشىنىڭ قاتارىندا مايكلدىڭ دا ەسىمى اتالدى».
مەكتەپتى بىتىرىسىمەن مايكل باسكەتبول باعدارلاماسىنا جەتە كوڭىل بولىنگەن سولتۇستىك كارولينا ۋنيۆەرسيتەتىندە وقۋعا شەشىم قابىلدايدى. ونىڭ مىقتى باسكەتبولشى رەتىندە قالىپتاسىپ، ۇلكەن جەتىستىكتەرگە جەتۋىنە وسى ءبىلىم ورداسىنىڭ كوپ كومەگى ءتيدى دەۋگە تولىق نەگىز بار. بۇل جەردە دە مايكل ءۇشىن وقۋدان گورى ءوزىنىڭ سۇيىكتى ويىنى باسكەتبول ماڭىزدىراق بولعانى جاسىرىن ەمەس. دەگەنمەن ول ۋنيۆەرسيتەتتىڭ نەگىزگى قۇرامىنا بىردەن الىنا قويمادى.مۇنداعى باپكەرلەر نازارىن وزىنە اۋدارتۋ ءۇشىن تاعى دا ءبىراز تەر توگۋىنە تۋرا كەلدى. اقىرى 1982 جىلى جوعارى وقۋ ورىندارى اراسىنداعى تۋرنيردە ول كوپشىلىكتى مويىنداتتى. دجوردجتاۋن ۋنيۆەرسيتەتىمەن فينالدىق كەزدەسۋدە باسەكەگە تۇسكەن سولتۇستىك كارولينا ۋنيۆەرسيتەتى جيىرما جاسار، ءبىرىنشى كۋرستىڭ ستۋدەنتى مايكل دجوردان سالعان شەشۋشى گولدىڭ كومەگىمەن جەڭىسكە جەتتى. وسى وقۋ ورداسىنىڭ قابىرعاسىندا-اق مايكل ۇشاتىن، اۋە دجوردانى دەگەن لاقاپ اتتارعا يە بولدى. سولتۇستىك كارولينا ۋنيۆەرسيتەتىنىڭ باسكەتبولى مايكل دجوردان مەن سەم پەركەنسوننىڭ ارقاسىندا اقش جوو-لارىنىڭ اراسىندا ءۇش جىل بويى، ۇلكەن ناتيجەلەرگە يەك ارتتى.
مايكل دجوردان ءومىرىنىڭ جارقىن بەتتەرى ايگىلى «چيكاگو بۋللز» كومانداسىمەن تىكەلەي بايلانىستى ەكەنى داۋسىز.  وسى كوماندانىڭ كاپيتانى بولا ءجۇرىپ ول ۇلكەن بيىكتەردى باعىندىردى، تالايدى تامساندىردى. مايكلدىڭ كەلۋىمەن وتكەن ون ءۇش ماۋسىمدا «چيكاگو بۋللز» ۇلتتىق باسكەتبول ليگاسىنىڭ التى دۇركىن جەڭىمپازى اتاندى. التى رەت ۇبل فينالدارىنىڭ ەڭ پايدالى ويىنشىسى رەتىندە تانىلدى. 1988 جىلى ول ۇبل -نىڭ ۇزدىك قورعاۋشىسى دەگەن قۇرمەتتى اتاققا يە بولدى. 1986 جىلدىڭ ءساۋىر ايىندا «بوستونمەن» وتكەن كەزدەسۋدە مايكل 63 ۇپاي جيناپ، ۇلكەن سەنساتسيا جاسادى. ونىڭ وسى رەكوردى ءالى كۇنگە دەيىن جاڭارعان جوق. ون رەت ۇبل -دىڭ ۇزدىك سۇرمەرگەنى بولدى. 1992 جىلعى بارسەلونا وليمپياداسىندا اقش ۇلتتىق قۇراماسى تاعى دا باس جۇلدەنى جەڭىپ الدى. ارينە بۇل رەتتە دە اقش باسكەتبولشىلارىنىڭ جەڭىسى تىكەلەي دجورداننىڭ ەسىمىمەن بايلانىستى. بىراق مۇنىڭ ءبارى دە وعان حالىقتىڭ ءوزى بەرگەن «باسكەتبولداعى عاسىر ۇزدىگى» دەگەن رەسمي ەمەس اتاقتىڭ قاسىندا تۇككە تۇرعىسىز ەكەنى ءسوزسىز.    
1993 جىلى مايكل «چيكاگو بۋللزدىڭ» ساپىندا تاعى دا چەمپيون اتاندى. بىراق ءدال وسى جىل ول ءۇشىن قارالى بولدى. اكەسى سولتۇستىك كارولينادا قىلمىسكەرلەردىڭ قولىنان قازا تاپتى. 6 -قازان كۇنى مايكل سپورتپەن قوشتاساتىنىن مالىمدەدى. جانكۇيەرلەر بۇل حاباردى جابىرقاپ قابىلدادى. ويتكەنى الاڭداعى ارپالىس كەزىندە ۇنەمى ءتىلىن شىعارىپ جۇرەتىن، قارسىلاستارىنىڭ قيتىعىنا تيەتىن جانە ەركىن دە كوركەم قيمىلىمەن، ەڭ باستىسى وزىنە عانا ءتان  سەكىرۋ ەرەكشەلىگىمەن كورەرمەن كوڭىلىنە جول تابا بىلگەن وسىناۋ باسكەتبولشىمەن قوشتاسۋعا ەشكىمنىڭ قۇلقى جوق ەدى. ونى باسكەتبول سۇيەر قاۋىم ءالى دە ويىننان كورگىسى كەلەتىن. بىراق ول ءوز دەگەنىنەن قايتپادى. سپورتتان كەتتى... دەگەنمەن 1995 جىلدىڭ 19 ناۋرىزىندا دجوردان قايتا ورالدى. سۇيىكتى كومانداسى «چيكاگو بۋللزدىڭ» جەيدەسىن كيگەن ول باسەكەگە بەلسەنە ارالاستى. ءوز كومانداسىنىڭ ساپىندا تاعى ءۇش رەت چەمپيوندىق اتاقتى جەڭىپ الدى. 1999 جىلدىڭ قاڭتارىندا مايكل دجوردان ۇلكەن سپورتپەن ەكىنشى رەت قوشتاستى. الايدا 2001 جىلدىڭ سوڭىنا تامان ول الاڭعا قايتا شىعىپ، بۇل جولى «ۆاشينگتوننىڭ» جەيدەسىن كيەدى. پلەي-وفف سەرياسىنا شىعۋ مىندەتتەمەسىن العان كوماندا جاڭا ويىنشىنىڭ ارقاسىندا چەمپيوناتتى ءتاپ-ءتاۋىر باستايدى. بىراق مايكلدىڭ جاراقات الىپ قالۋىنا بايلانىستى «ۆاشينگتون» كوپ ۇزاماي ساتسىزدىككە ۇشىرايدى. بۇل مايكلدىڭ باسكەتبولداعى ومىرىندەگى العاشقى ساتسىزدىك ەدى. 2003 جىلى دا ۆاشينگتوندىقتار پلەي-وففتان تىس قالدى. اقىرى 40 جاسار دجوردان باسكەتبولمەن ءبىرجولاتا قوشتاستى.

2009 جىل.