بۇكىل الەمدى الاڭداتقان كوروناۆيرۋس ىندەتى كەشەندى كۇرەس شارالارىن قاجەت ەتەدى. سوندىقتان دا ەلىمىزدە COVID-19-عا قارسى قاۋىپسىزدىك شارالارىن كۇشەيتۋ ءۇشىن ازاماتتىق ۇيىمدارمەن بىرگە اسكەريلەر دە اتسالىسپاق. مۇنداي بىرلەسكەن جۇمىس ءوز ناتيجەسىن دە بەرىپ ۇلگەرگەن.

قازىرگى تاڭدا قازاقستان قارۋلى كۇشتەرى كوروناۆيرۋستىڭ جەكە قۇرام اراسىندا تارالماۋىن بولدىرماۋ  جانە COVID-19-بەن كۇرەسۋ شارالارى بويىنشا كەشەندى جۇمىستاردى ىسكە اسىرىپ كەلەدى.

ماسەلەن، قازىرگى ۋاقىتتا اسكەري مەكەمەلەر مەن اسكەري بولىمدەر ىندەتكە قارسى سونداي-اق، سانيتارلىق-پروفيلاكتيكالىق ءىس-شارالار وتكىزىپ، مەديتسينالىق مۇلىكپەن جانە قورعانىس قۇرالدارىمەن قامتاماسىز ەتىلۋدە. ارنايى ماماندار ناۋقاستارمەن بايلانىسى انىقتالعان جانە ىندەتتىڭ بەلگىلەرى بار ادامدار انىقتالعان كەزدە دەر كەزىندە ارەكەت ەتۋ ءۇشىن اسكەري قۇرامنىڭ دەنساۋلىق جاعدايىنا ۇنەمى ساراپتاما جۇرگىزىپ وتىرادى.

بۇل ىندەتتەن ءوزىڭىز بەن جاقىندارىڭىزدى قورعاۋدىڭ ەڭ دۇرىس جانە جالعىز جولى – ەكپە سالدىرۋ. مۇنى بۇگىن وتكەن ەپيدەميولوگيالىق جاعداي جونىندەگى كەڭەستە مەملەكەت باسشىسى – قارۋلى كۇشتەردىڭ جوعارعى باس قولباسشىسى  قاسىم-جومارت كەمەلۇلى توقاەۆ تا اتاپ وتكەن بولاتىن. سەبەبى، الەمدىك مەديتسينا ءالى باسقا ادىستەردى ۇسىنعان جوق. جاقىن بولاشاقتا ۇسىنۋى دا ەكىتالاي.

بۇگىنگى تاڭدا ەكپە الۋ پروتسەسى قارۋلى كۇشتەردىڭ جەكە قۇرامىندا قارقىندى جالعاسۋدا. سوڭعى كورسەتكىش بويىنشا، ەكپە العانداردىڭ سانى 100%-عا جەتتى. ولاردىڭ 99 پايىزى ءبىرىنشى كومپونەنتتى قابىلداعاندار بولسا، 92 پايىزى ەكىنشى كومپونەنتتى العاندار.

قر قك باس اسكەري-مەديتسينالىق باسقارماسى سانيتارلىق-ەپيدەميولوگيالىق قاداعالاۋ باسقارماسىنىڭ باستىعى، پولكوۆنيك البەك ماناباەۆتىڭ ايتۋىنشا، ەكپە العان اسكەري قىزمەتشىلەردىڭ اۋرۋى جەڭىل تۇردە وتەدى. مۇنى تالداۋ كورسەتكىشى دە دالەلدەپ وتىر. ال، ولاردىڭ بارلىعى امبۋلاتورلىق ەم قابىلداپ جاتقان كورىنەدى.

ودان بولەك، قازىرگى جاعدايدى ەسكەرە وتىرىپ، اسكەري دارىگەرلەر دە ازاماتتىق ۇيىمداردا قىزمەت اتقاراتىن ارىپتەستەرىنە كومەككە كەلۋگە دايار. ماسەلەن، وسى جىلدىڭ ءساۋىر ايىنان باستاپ نۇر-سۇلتان مەن الماتى قالالارىندا اسكەري گوسپيتالدەر بولىنگەن. ال، نۇر-سۇلتانداعى باس اسكەري كلينيكالىق گوسپيتال شىلدە ايىنان باستاپ كوروناۆيرۋسپەن اۋىرعانداردى ەمدەۋدى باستاعان بولاتىن.

پولكوۆنيك البەك ماناباەۆتىڭ سوزىنشە، قازىرگى كەزدە ءۇش قالادا اسكەري ەمدەۋ مەكەمەسى ازاماتتاردى قابىلداۋعا دايىن.

-اۋىر ناۋقاستانعان ازاماتتار كەلىپ تۇسكەن جاعدايدا جانساقتاۋ بولىمشەلەرى دايىندالعان. وندا پۋلسوكيسمەترلەرمەن، وتتەگى كونتسەنتراتورلارىمەن، وكپەنى جاساندى جەلدەتۋ اپپاراتتارىمەن، سونداي-اق، باسقا دا مەديتسينالىق جابدىقتارمەن جابدىقتالعان، - دەدى قر قك باس اسكەري-مەديتسينالىق باسقارماسى سانيتارلىق-ەپيدەميولوگيالىق قاداعالاۋ باسقارماسىنىڭ باستىعى، پولكوۆنيك البەك ماناباەۆ.

سونىمەن قاتار، سانيتارلىق-ەپيدەميولويالىق ورتالىقتىڭ ەكى فيليالى بار. ءبىرى – “استانا”، ەكىنشىسى – “باتىس”. قازىر ونداعى مامانداردىڭ سانى ارتقان. جانە، اتالعان فيليال ماماندارىنىڭ قۇرامىندا ۆيرۋسولوگتار مەن زەرتحاناشىلار، باكتەريولوگتار مەن ەپيدەميولوگتار بار.

سونداي-اق، قازىرگى تاڭدا سەمەي، تالدىقورعان، اياگوز بەن سارىوزەكتىڭ اچكەري گوسپيتالدارىندا قوسىمشا ءتورت ينفەكتسيالىق يزولياتور جۇمىس ىستەيدى. ودان بولەك، الماتى مەن نۇر-سۇلتاندا ەكى ستاتسيونارلىق پتر-زەرتحانا، ال، سەمەي مەن اقتاۋدا پتر-تەستتى وتكىزۋ مۇمكىندىگى بار ءموبيلدى زەرتحانالىق كەشەندەر جۇمىس ىستەپ جاتىر.

الداعى ۋاقىتتا قارۋلى كۇشتەردىڭ سانيتارلىق-ەپيدەميولوگيالىق قىزمەتىنىڭ ماماندارى قىسقا مەرزىم ىشىندە شالعايدا، الشاقتا ورنالاسقان اۋدانداردىڭ حالقىنا دارىگەرلىك-مەيىرگەرلىك بريگادامەن بىرگە كومەكتەسۋگە جىبەرىلۋ جوسپارلانىپ وتىر.

بۇل دا قارۋلى كۇشتەر قىزمەتىنىڭ كوروناۆيرۋس ىندەتىمەن كۇرەسكە قوسقان ۇلەسى بولماق.

Abai.kz