گرۋزيانىڭ ەكس-پرەزيدەنتى ميحايل سااكاشۆيلي باتىسقا بەت بۇرعان ساتتە پۋتين وسەتيا مەن ابحازيانى باسىپ العانىن بىلەمىز. سول كەزدە ابحازدار مەن وسەتياندىقتاردىڭ كرەملدىڭ باسقىنشىلىق ارەكەتىن قانشالىقتى قولداعانىن بىلمەدىك. گرۋزياعا ماڭداي تىرەگەنىمىزدە جەرگىلىكتى حالىقتان وسى ماسەلەنى سۇرادىق. سونداعى جەرگىلىكتى حالىقتىڭ ايتقان اڭگىمەسى مىناۋ:

– پۋتين باسقىنشىلىق ارەكەتىن جۇزەگە اسىرعاندا وسەتيا مەن ابحازيادا تۇراتىن حالىقتىڭ 3 پايىزى عانا ورىستاردى قولدادى. ال قالعاندارى گرۋزيانىڭ تۇتاستىعىن جاقتادى. ءوز كەزەگىندە ورىستار وسى جاعدايدى ەسكەرىپ، اسكەري وپەراتسياسىن جۇزەگە اسىرعاندا اسكەري اۋە كۇشتەرىن پايدالاندى. ابحازدار مەن وسەتياندار ورىس اسكەرىمەن تىزە قوسىپ، گرۋزياعا قارسى سوعىسقان جوق. قازىر ابحازدار مەن وسەتياندار الەۋمەتتىك جاعداي وتە ناشار. گرۋزياعا قوسىلعىس كەلەدى. بىراق كرەمل ولارعا ونداي مۇمكىندىك بەرمەۋدە، – دەدى جەرگىلىكتى تۇرعىندار.

كوپشىلىكتىڭ ابحازدار مەن وسەتياندىقتارعا قارسى اناۋ ايتقانداي وكپە-رەنىشىن بايقامادىق. بايقاعانىمىز، يمپەريالىق دەرتى قوزعان پۋتين حالىقتىڭ وتە از بولىگى ورىستى قولداسا (بار بولعانى 3 پايىز) سونى جەلەۋ قىلىپ كەز كەلگەن ەلگە اسكەر كىرگىزۋگە ارلانبايتىنىن ۇدايى ەستە ۇستاۋىمىز كەرەك ەكەن.

سوڭعى ۋاقىتتارى ءپۋتيننىڭ بۇل دەرتى اسقىنىپ تۇر. بۇگىندە ءاربىر باسقىنشىلىق ارەكەتى ونىڭ ساياسي مانسابىن ۇزارتاتىن ءادىس-امالعا اينالعانى جاسىرىن ەمەس. قىرىم مەن دونباستا دا وسى ءۇشىن باسىپ كىرگەنى انىق.

ەرتەڭگى كۇنى جيريك پەن فەدروۆتاردىڭ ءسوزىن شىندىققا اينالدىرۋ ءۇشىن پۋتين اتقا قونسا، تاڭقالماڭىز. ەگەر پۋتين قازاقستاننان ءوزىنىڭ 3 پايىز قولداۋشىلارىن ىزدەپ جاتسا، تايشىبەكوۆ سىندى ورىسقۇل قازاقتاردىڭ وزدەرى 3 پايىزدىق مەجەنى ءاپ-ساتتە تولتىرا سالۋى مۇمكىن. سوندىقتان رەسەيدىڭ گرۋزيا مەن ۋكرايناعا باسىپ كىرۋىنەن بيلىك تە، حالىق تا ساباق الۋ كەرەك.

قازاقستانمەن بىرگە يادرولىق قارۋدان باس تارتقان، «بۋداپەشت كەلسىمىنە» قول قويعان ۋكرايناعا قانداي سويقان سالعانىن بىلەسىز. ال مۇندايدا قازاقتاردى ايايدى دەيسىز بە؟

نۇرلان جۇماقانوۆتىڭ جازباسى

Abai.kz