قر اۋىل شارۋاشىلىعى مينيسترلىگى ماڭعىستاۋ وبلىسىنداعى قۇرعاقشىلىققا بايلانىستى حالىقتان كومەك سۇراپ، وتانداستارىمىزدى قولداۋعا شاقىردى.

«اۋا-رايىنىڭ قولايسىزدىعى مەن ونىڭ سالدارى وڭاي بولماي تۇر. قازاقستاننىڭ كوپتەگەن وڭىرلەرىندەگى ەرەكشە ىستىق اۋا رايى قۇرعاقشىلىققا اكەپ سوقتى. جاۋىن-شاشىننىڭ ازدىعىنان ماڭعىستاۋ وبلىسى قاتتى زارداپ شەكتى.

ۇكىمەت پەن جەرگىلىكتى اتقارۋشى ورگاندار زارداپ شەككەن ايماققا قولداۋ كورسەتىپ، قاجەتتى جۇمىستاردى اتقارىپ جاتىر. بۇكىل ەل بويىنشا ەرىكتىلەر دە قوماقتى ۇلەس قوسۋدا»،- دەلىنگەن مينيسترلىك حابارلاماسىندا.

وسىعان وراي، مينيسترلىك قىزمەتكەرلەرى ءبىر كۇندىك جالاقىلارىن تابيعي قۇبىلىستاردان زارداپ شەككەن تۇرعىندار مەن فەرمەرلەرگە كومەك رەتىندە ماڭعىستاۋ وبلىسى اكىمدىگىنىڭ ۇيىمداستىرۋىمەن قۇرىلعان ارنايى شوتقا جىبەرگەن.

سونداي-اق، ۆەدومستۆو وكىلدەرى ەلىمىزدەگى بارلىق ەڭبەك ۇجىمدارىن وسى ىسكە ات سالىسۋعا شاقىرىپ، رەكۆيزيتتەرىن جاريالادى.

«مينيسترلىك بارلىق مەنشىك نىسانىنداعى ەڭبەك ۇجىمدارىن قيىن جاعدايعا تاپ بولعان وتانداستارىمىزدى قولداۋعا جانە قولدان كەلگەنشە كومەك كورسەتۋگە شاقىرادى»،- دەپ مالىمدەدى مينيسترلىك.

باق وكىلدەرىنىڭ حابارلاۋىنشا، ماڭعىستاۋ وبلىسىندا 850 مىڭ مال باسى بار. بيىل بولعان قۋاڭشىلىق سالدارىنان وڭىردە 1400-گە تارتا مال قىرىلعان.

اۋىلشارۋاشىلىعى مينيسترلىگى ماۋسىم ايىندا ايماقتاعى قۋاڭشىلىق ماسەلەسىن شەشۋ ءۇشىن ءوڭىر قازىناسىنان 200 ملن تەڭگە بولىنگەنىن حابارلاعان. ال، شىلدە ايىندا ماڭعىستاۋ حالقىنا كومەك بەرۋ ءۇشىن رەسپۋبليكالىق رەزەرۆتەن 1,9 ملرد تەڭگە ءبولىندى. Khabar.kz-ءتىڭ اقپاراتىنشا, اتالعان قاراجات 10 تامىز كۇنى ماڭعىستاۋ وبلىسىنا جەتكىزىلگەن.

- ۇكىمەتتىك رەزەرۆتەن مال ازىعىن ارزانداتۋ ماسەلەسىنە 1,9 ملرد تەڭگە ءبولىندى. جەم-ءشوپ اقتوبە وبلىسى مەن باتىس قازاقستان وبلىسىنان ساتىپ الىنىپ، ماڭعىستاۋ وبلىسىنىڭ اۋداندارىنا جونەلتىلەدى. قىستا ءشوپ جەتپەي جاتسا، قوسىمشا قور رەتىندە پايدالانىلادى،- دەدى مينيستر ە.قاراشوكەەۆ.

نۇربيكە بەكسۇلتانقىزى

Abai.kz