بۇگىن الماتىعا اۋعانستاننان ەۆاكۋاتسيالانعان 42 جولاۋشى كەلىپ قوندى. بۇل تۋرالى قر قورعانىس مينيسترلىگى حابارلادى. 

«الماتى، 2021 جىلعى 18 تامىز – بۇگىن ساعات 17.00-دە قر ااك س-295 اسكەري-كولىك ۇشاعى اۋعانستاننان ەۆاكۋاتسيالانعان 42 جولاۋشىمەن الماتىعا ءساتتى قوندى. قازاقستانعا 25 قر ازاماتى، ونىڭ ىشىندە 15 ەرەسەك ادام جانە 10 بالا، سونداي-اق قر ەلشىلىگىنىڭ قىزمەتكەرلەرى كەلدى.

ودان باسقا، وسى بورتپەن قىرعىز تاراپىنىڭ ءوتىنىشى بويىنشا قىرعىز رەسپۋبليكاسىنىڭ 14 ازاماتى ەۆاكۋاتسيالاندى. گۋمانيتارلىق وپەراتسيا رەتىندە وسى ۇشاقپەن قر ەلشىلىگىنە كومەك سۇراپ جۇگىنگەن 1 رەسەي ازاماتى مەن 1 ليتۆا ازاماتى اير-دان شىعارىلدى»،- دەلىنگەن مينيسترلىك حابارلاماسىندا.

بۇعان دەيىن قازاقستان اۋعانستاننان 15 قىرعىز ازاماتىن ەۆاكۋاتسيالاۋعا كومەكتەسكەنى حابارلانعان بولاتىن. بۇل تۋرالى قىرعىزستان سىرتقى ىستەر مينيسترلىگى حابارلاعان.

ايتا كەتەيىك، 15 تامىزدا «تاليبان» سودىرلارى (قازاقستاندا جوعارعى سوتتىڭ شەشىمى بويىنشا قوزعالىسقا تىيىم سالىنعان) كابۋلعا كىرىپ، ەلدە بيلىكتى ءوز قولىنا العانىن جاريالادى. ۇكىمەتتىڭ ءبىر بولىگى مەن پرەزيدەنت اشراف عاني اۋعانستاننان كەتتى.

Abai.kz