اۋعانستانداعى اسكەري جاعدايعا بايلانىستى حالىق بوسقىنعا اينالدى. پاكىستان 3 ملننان استام اۋعان بوسقىنىن قابىلداعانىن ايتىپ، ەندى بوسقىنداردى قابىلدامايتىنىن ەسكەرتتى. اقش ەلدەن 110 مىڭنان استام اۋعانستاندىقتى الىپ شىقتى. 

اۋعانستاندا ەتنيكالىق قازاقتار دا تۇرادى. ولاردىڭ ناقتى سانى قانشا ەكەنى بەلگىسىز. ءبىر دەرەكتەر 30 مىڭعا جۋىق دەسە، رەسمي بيلىك ولاردىڭ سانى 200 شاماسىندا دەپ وتىر. اۋعان ۇكىمەتى مەن تالىبتەر اراسىندا سوعىس قىزعان شاقتا اۋعانستانداعى قازاقتار ەلگە كوشۋگە كومەك كورسەتۋىن سۇراپ، ۇندەۋلەر جاريالادى. ولار اۋعانستانداعى جاعدايدىڭ تىم ۋشىعىپ كەتكەنىنەن ەلدە تاپشىلىق پايدا بولعانىن ايتۋدا. قازاقستان بيلىگى اۋعانستاندا قانشا قازاقتىڭ بارىن ناقتى بىلمەيتىنىن، الايدا ولاردى ەلگە كوشىرۋ ماسەلەسى قاراستىرىلىپ جاتقانىن مالىمدەگەن بولاتىن.

ەندى مىنە اۋعانستاندا تۇراتىن 200-دەن استام ەتنيكالىق قازاق ەلگە اكەلىنۋى مۇمكىن ەكەنى ايتىلۋدا. بۇل تۋرالى قازاقستان پرەزيدەنتىنىڭ اۋعانستان بويىنشا ارنايى وكىلى تالعات قاليەۆ مالىمدەمە جاسادى.

ەلشىلىك مالىمەتىنشە، اۋعان ەلىندە شامامەن 13 وتباسى بار ەكەن. ول 200-دەن استام ادام دەگەن ءسوز. بۇل ەسەپكە الىنعان ادامدار عانا.

ازىرگە ونداعى ەتنيكالىق قازاقتاردىڭ ناقتى سانىن ءبىلۋ قيىن. سوندىقتان اۋعان جەرىنەن ەلگە كوشىرىلەتىندەر سانى ارتۋى دا مۇمكىن دەيدى قاليەۆ.ەۆاكۋاتسيالاۋ جۇمىسىن جەدەلدەتۋ ءۇشىن ارنايى كوميسسيا قۇرىلعان. ءبىرىنشى كەزەكتە ەلگە قونىس اۋداراتىن ازاماتتاردىڭ قازاق نەمەسە قازاقستاندىق ەكەنىن راستايتىن قۇجاتتار جيناقتالۋى كەرەك. ال ولاردىڭ قازاقستانعا كەلۋ-كەلمەۋى ءوز ەرىكتەرىندە بولىپ قالا بەرمەك.

“قازىر قازاق دياسپوراسىنىڭ بەلسەندىلەرى سونداعى ەتنيكالىق قازاقتاردى ىزدەۋگە كىرىسىپ، ەلشىلىك قىزمەتكەرلەرىنە قول ۇشىن بەرۋدە. ولار اۋعانستاننىڭ ءار بۇرىشىنداعى قازاقتاردى تابۋعا تىرىسىپ جاتىر. قاجەت بولعان جاعدايدا، ۇشاق جونەلتىلىپ، تاسىمال ۇيىمداستىرىلادى. بۇل جۇمىستارعا قازىرگى اۋعان بيلىگى كەدەرگى كەلتىرمەيدى دەپ ويلايمىز”, – دەدى تالعات قاليەۆ.

ال اۋعانستانداعى ەتنيكالىق قازاقتار بۇل تۋرالى بىلمەيمىز دەپ وتىر.

“ەستىدىك. كابۋلدان 13 وتباسىنى الىپ كەتەتىنىن، 200-دەي ادام بار دەپ ەستىدىك. بىزگە ءالى ەشقانداي اقپارات، جاڭالىقتار كەلگەن جوق. سىزدەرگە ءوتىنىش ءبىزدى ەلگە الىپ كەتىڭىزدەر. وتە قيىن جاعدايدا قالدىق”, – دەيدى اۋعانستانداعى ەتنيكالىق قازاق ازيمۋللا.

بۇعان دەيىن جەلىدە "قازاقستانعا كەلەتىن قازاقتاردى تىزىمگە قوسۋ ءۇشىن قارجى سۇرايدى ەكەن" دەگەن اقپارات شىققان ەدى، الايدا ونىڭ جالعان ەكەنى رەسمي وكىلدەر مالىمدەگەن بولاتىن.

Abai.kz