«قازاتومونەركاسىپتىڭ» بۇرىنعى باسشىسى، اتوم ءوندىرىسى سالاسىنىڭ مامانى مۇحتار جاكىشەۆ قازاقستانعا اەس سالۋ ماسەلەسىنە قاتىستى پىكىرىن ءبىلدىرىپتى. مۇحتار جاكىشەۆ «Facebook-تاعى» جەكە پاراقشاسىندا اەس قۇرىلىسى ماسەلەسىنە قاتىستى قازاقستان حالقىنىڭ پىكىر بىلدىرۋدە بەلسەندى بولۋى كەرەكتىگىن ايتقان.

«قۇرمەتتى دوستار! ارمانجان بايتاسوۆپەن بىرگە ەنەرگەتيكا تاقىرىبىندا سۇحبات جازدىق. اتوم ەنەرگەتيكا الەمدەگى ەنەرگەتيكانىڭ جالپى دامۋ تەندەنتسياسى، قازاقستاندا اەس سالۋ مۇمكىندىگى تۋرالى سۇراقتار بولدى. ەۋرووداقتا تالقىلانىپ جاتقان كومىرقىشقىل گازىنىڭ قالدىقتارىنا سالىناتىن سالىقتار جانە باسقا دا تاقىرىپتار تۋرالى ءسوز قوزعادىق. كۇردەلى ماسەلەلەردى قاراپايىم تىلدە تۇسىندىرۋگە تىرىستىم. بۇل قولىمنان كەلدى دەپ ويلايمىن.

مەن اتوم ءوندىرىسى سالاسىنىڭ مامانىمىن، مەنەدجەرمىن. ال اەس  قۇرىلىسى تۋرالى ماسەلە – ءبىرىنشى كەزەكتە اتوم ەنەرگەتيكاعا قاتىستى ماسەلە. مەن بۇل سالامەن تانىسپىن. بىراق، مەن بۇل جەردە بىلىكتىلىگى جوعارى مامان ەمەسپىن.

جالپى قازاقستاندا اەس سالۋعا قاتىستى ماسەلە ەلدىڭ ءاربىر ازاماتىنىڭ دەربەس ويىمەن شەشىلۋى كەرەك. ءاربىر ازامات بۇل قادامعا قاتىستى ءوز ويىن قالىپتاستىرۋى كەرەك. دەسە دە، ازاماتتاردىڭ پىكىرلەرى راستالماعان اقپارات نەگىزىندە ەمەس، ناقتى  كوزدەردەن الىنعان فاكتىلەرگە نەگىزدەلۋى كەرەك»، - دەيدى جاكىشەۆ مىرزا.

ءتۇيىن: 2021 جىلى اەس سالۋ يدەياسى قايتا تالقىلىنا باستادى. مامىر ايىندا پرەزيدەنت اەس سالۋدا اسىقپاۋ كەرەكتىگىن، الايدا ۋاقىتتان دا قالماۋ قاجەتتىگىن ايتقان بولاتىن. ال جولداۋدا بەيبىت اتومعا قاتىستى ءسوز قوزعاپ، رەسەي فورۋمىندا اەس كەرەكتىگىن ايتتى. دەگەنمەن اەس-ءتى سالۋدان بۇرىن، ونى كىم سالادى دەگەن سۇراق ماڭىزدى بولىپ قالۋدا. قازاقستان بيلىگى بۇعان دەيىن وڭتۇستىك كورەيامەن، جاپونيامەن، رەسەيمەن، فرانتسيامەن كەلىسسوزدەر جۇرگىزگەن بولاتىن. دەگەنمەن تالقىلاۋلار مەن ساراپشىلاردىڭ پىكىرلەرىنە سۇيەنسەك، اەس-تى رەسەي تاراپى سالۋى مۇمكىن. رەسەيدى بۇل تۇرعىدان تاجىريبەسى كوپ، بىراق جوعارى تەحنولوگياعا يە ەمەس. مىسالى تۇركياعا سالىپ جاتقان اەس-ءىنىڭ قابىرعاسى ەكى مارتە جارىلىپ، قۇرىلىسى توقتاپ قالدى. چەرنوبىل اپاتىن جاساپ، الەمدى دۇرلىكتىرگەن ماسكەۋدىڭ بەيبىت اتومدا الدا دەگەنگە سەنۋ قيىن.

Abai.kz