قازاقستانداعى ەڭ تومەنگى جالاقى دەڭگەيى قازىرگى تاڭدا 42500 تەڭگەنى قۇرايدى. بۇل 100 دوللار دەگەن ءسوز. پرەزيدەنت جىل سايىنعى حالىققا جولداۋىندا ونى كوتەرۋ تۋرالى باستاماسىن ايتتى. ەندىگى تاڭدا ەڭ تومەنگى جالاقى 60 مىڭ تەڭگەگە دەيىن كوتەرىلەدى. بۇل 2022 جىلى ىسكە اسادى. جالاقى كولەمى كوتەرىلگەن ساتتە، قازاقستان ەەو ەلدەرى اراسىندا ەڭ تومەنگى جالاقى دەڭگەيىنىڭ كولەمى بويىنشا ەكىنشى ورىنعا شىعادى. ءبىزدىڭ الدىمىزدا تەك رەسەي ەلى تۇر. الايدا 60 مىڭ تەڭگەنىڭ ءوزى اسا جوعارى ەمەس. بۇل قارجىعا نە ساتىپ الۋعا بولادى؟  

پرەزيدەنت ەڭ تومەنگى جالاقى دەڭگەيى "تمد-نىڭ بىرقاتار ەلدەرىنەن تومەن ەكەنىن" اتاپ ءوتىپ ەدى. ەڭ تومەنگى جالاقى 2018 جىلدان بەرى وزگەرگەن ەمەس. قازىرگى 42500 تەڭگە كولەمىندەگى ەڭ تومەنگى جالاقىمەن قازاقستان رەسەي، بەلارۋس جانە ارمەنيادان تومەن تۇر. بۇل دەگەنىمىز ورتاق ەكونوميكالىق وداقتا ءبىز تەك قانا قىرعىزستاننىڭ الدىندامىز دەگەندى بىلدىرەدى.

ەڭ تومەنگى جالاقى بۇل جۇمىسشىعا قالىپتى جاعدايدا جانە ايىنا قالىپتى جۇمىس ۋاقىتىمەن اقشالاي تولەمدەردىڭ كەپىلدەندىرىلگەن مينيمۋمى بولىپ تابىلادى. مەملەكەت بارلىق مەنشىك نىسانىنداعى كاسىپورىندارعا ءوز قىزمەتكەرلەرىنە اي سايىن ەڭ تومەنگى جالاقىدان كەم ەمەس مولشەردە تولەۋگە مىندەتتەيدى. وسىلايشا، ەڭ تومەنگى جالاقى - مەملەكەتتىك الەۋمەتتىك كەپىلدىك دەسەك تە بولادى.

2022 جىلدىڭ قاڭتارىنان باستاپ 60 مىڭ تەڭگە بولاتىن ەڭ تومەنگى جالاقىعى نە الۋعا بولادى؟ ونى ەكونوميكالىق وداقتاعى ەلدەرمەن بىرگە قاراستىرعان دۇرىس بولادى.

ەاەو ەلدەرى مەن وزبەكستانداعى ەڭ تومەنگى جالاقى كولەمى كەلەسىدەي:

قازاقستان - 60 000 تەڭگە

ارمەنيا - 58 783 تەڭگە

بەلارۋس - 51 020 تەڭگە

قىرعىزستان - 9866 تەڭگە

رەسەي - 74 480 تەڭگە

وزبەكستان - 29 791 تەڭگە

بۇل ارينە 2022 جىلدىڭ 1-قاڭتارىنان باستالاتىن كورسەتكىش، ياعني 60 مىڭ تەڭگەگە دەيىن كوتەرىلۋمەن ەسەپتەسەك. ال قازىرگى ۋاقىتپەن الساق 42500 تەڭگەمەن قازاقستان وزبەكستان مەن قىرعىزستاننىڭ عانا الدىنا شىعا الار ەدى. مىسالى ەڭ تومەنگى جالاقىعا  وزبەكستاندا ناندى كوپ ساتىپ الۋعا بولسا، ەتتىڭ كوپ بولىگىن بەلارۋستە، ال ءسۇتتى ارمەنيادا ساتىپ الۋعا بولادى ەكەن. بۇل اتالمىش مەملەكەتتەردە ءونىم باعاسىنىڭ ارزانداۋ بولۋىمەن دە تىكەلەي بايلانىستى.

ال شىنايى كورسەتكىشتى الىپ قارايتىن بولساق، وندا 60 مىڭ تەڭگەنىڭ ءوزى ءبىر ادامنىڭ ءومىر سۇرۋىنە جەتكىلىكسىز. وعان ينفلياتسيا دەڭگەيى مەن پاتەر اقىسى، جول جانە ازىق-تۇلىكتىڭ قىمباتتاۋىن قوسساق، وندا ءتىپتى از ەكەنىن تۇسىنەمىز. نارىقتاعى باعانى تۇراقتاندىرۋ مەحانيزمدەرى دۇرىس جۇمىس ىستەمەيتىن قازاقستان ءۇشىن، ەڭ تومەنگى جالاقىنىڭ 60 مىڭ تەڭگەگە كوتەرىلۋى نارىقتىڭ دا رەتسىز باعا كوتەرىلۋىنە اسەر ەتۋى مۇمكىن.

Abai.kz