سوڭعى ايدا كەزىندە قازاقستان سياقتى سوۆەت تۇرمەسىنەن شىققان قاتارىنان ەكى ەلدە بولىپ قايتتىم. ءبىرىنشىسى - رەسەي باسىپ العان قىرىم تۇبەگىن قايتارماق تاعدىرلاس ۋكراينا، ەكىنشىسى - سول رەسەي كومەگىمەن ارمەنيا 1990-جىلدارى قاراباقتاعى باسىپ العان جەرىن قايتارعان باۋىرلاس ءازىربايجان. بۇل ساپارلار بارىسىندا نازار اۋدارارلىق، ۇيرەنىپ-جيرەنەتىن تۇستار جەتىپ ارتىلادى. ول جايلى اللا قالاسا ءالى بايانداي جاتارمىن. ازىرشە ءبىر عانا تۇسقا كوڭىل ءبولۋدى ءجون كوردىم - ونىسى ۋكراينانىڭ بولسىن، ءازىربايجاننىڭ بولسىن، ءوز تىلدەرىنە دەگەن قۇرمەتى. سونداعىسى وسى اتاۋداعى ۇلتتاردىڭ مەملەكەتى ەكەنى اۋەجايدان باستاپ بىلىنەدى. ۋكراينادا ءتۇرىم ورىسقا ۇقساماسا دا، امالسىز ورىسشا سۇراعىما جەرگىلىكتى كەز-كەلگەن ازامات، اراسىندا ءوزىم كورگەن تاتار مەن وزبەك، قالىپتى تۇردە تەك ۋكراين تىلىندە جاۋاپ قايتاردى. ءازىربايجاندا بارلىق شەندى ءسوزىن ءوز تىلىندە باستايدى، بولماي بارا جاتسا عانا ورىسشاعا كوشەدى. بىزدە قالاي؟ مۇلدە باسقاشا. كىم كىنالى دەگەن سۇراق پايدا بولادى. كوپشىلىك ادەتتە بيلىكتى ايىپتايدى. مەيلى. تەك سول ۋكراينا مەن ءازىربايجان بالاسىنىڭ ءوز ءتىلىن قۇرمەتتەۋدە جوعارىعا قاراپ قالعانىن بايقامادىم. وزدەرىنىڭ قۇلقى. ەندەشە ءوز ەلىمىزدە ءجۇرىپ ءوز تىلىمىزدە سويلەمەۋى ءۇشىن باسقانى ايىپتاعاندى قالاي اتاۋعا بولادى؟

Ps. ستامبۋلدان ۇشار الدىندا اۋەجايدىڭ تەرمينالدارىندا ءتيىستى باعىتتا ۇشپاق جولاۋشىلاردىڭ ءوز تىلىندە سويلەگەنىن كوردىم. تەك قازاق تەرمينالىندا، تولعان قازاق بالاسى وتىرعان جەردە عانا بوتەن ەلدىڭ ءتىلى سالتانات قۇرىپ تۇردى. ەڭ وكىنىشتىسى - بۇنى مەن عانا ەمەس، ءبىزدىڭ ورىسقۇلدىقتى كورىپ باس شايقايتىن الەمنىڭ بارلىعى دا كورۋدە.

راسۋل جۇمالى

Abai.kz