ابايلاڭدار دەگەنىم ءۇشىن قانشا قارعاپ سىلەگەندەر، سوڭىندا زاڭدى كومەك بەرمەگەنىم ءۇشىن سوگىپ شىقتى! جالپى كەيبىر ادامدارعا ابايلاڭدار، ءبىرىنشى دۇرىستاپ زەرتتەپ الىڭدار دەپ ەسكەرتسەڭ باسىڭ بالەگە قالادى!

“لومبارد24, ، “ينديگو”، “امانات حوۋم” سەنىمسىز قومپانيالار، ياعني الاياقتار دەپ ايتقانىمدا ءبارى جان-جاقتان قارعاپ سىلەگەن ەدى. كوبىنەسە ينستاگرامدا تىكەلەي ەفيرگە شىعىپ ەسكەرتىپ وتىراتىنمىن!

ءبىر كۇنى كوپ بالالى ءبىر ايەلدەن مىنانداي حات كەلىپتى: “قازاقتىڭ بايىعانىن كورە المايتىن سالداقى، سەن سياقتىلار بيلىكتە وتىرىپ حالىقتى بايىتقىسى كەلمەيدى” دەپ! قۇرىسىن وزدەرىنەن كورسىن باستارىنا تيمەي بۇلار توقتامايدى دەپ ۇندەمەي قويا سالدىم. بۇكىل اعىسقا جالعىز ءوزىڭ قارسى ءجۇزۋىڭ مۇمكىن ەمەس! تەك ءوز جاقىن تانىستارىمدى الدىن الا ساقتاپ قالدىم.
ول كەزدە “لومارد24” ءتىڭ جارناماسى قاتتى ءجۇرىپ جاتقان. انشىلەر مەن اكتەرلەر ، ەل الدىندا ساۋىق سايران قۇرىپ جۇرگەندەردىڭ ءبىرازى سوڭىندا ءجاي كەشىرىممەن قۇتىلىپ كەتتى. زار جىلاپ قالعان قاراپايىم حالىق!

بۇگىندە “ميلليونەر بولۋعا شاقىرىپ جاتقاندارعا” ۇندەمەي وتىرسام بولار ەدى وزىمە جاۋ جيناماي! مۇگەدەك اپايدىڭ “اقشامدى قايتارىڭدار كومىر الايىن “، دەگەن داۋسى قۇلاعىمنان كەتەر ەمەس! تاعى دا قولىما قالام الىپ جازىپ، دابىل قاعۋىما تۋرا كەلىپ تۇر! “ايگۇل سىزدەردىڭ بايىعاندارىڭىزدى، سىزدەردىڭ ميلليونەر بولعاندارىڭىزدى كورە المايدى دەپ شىعاتىن شىعار ەندىگى ساباقتارىندا.

باي بولىڭىزدار، بار بولىڭىزدار! ماعان حالىقتىڭ جىلاماعانى كەرەك، ءاربىر ءىستى باستار كەزدە جەتى رەت ولشەپ، ءبىر رەت كەسىڭىزدەر! بيزنەس باستاماس بۇرىن ىشتەگى نارىقتى زەرتتەڭىزدەر! سىزدەردەن بۇرىن باستاعان ادامدار دا بار ەكەنىن ەسكەرىڭىزدەر!

كوۋچتار مەن “پسيحولوگتار” ءوز ساباقتارىندا بۋمەرانگ جايلى كوپ ايتادى. سول كوۋچ، “پسيحتارعا” مەن دە اقىل ايتايىن مۇگەدەكتەردى، شاراسىز ادامداردى جىلاتقاندارىڭ ءۇشىن قۇداي وسى ومىردە جازاسىن بەرەدى!
ءوز تىلدەرىڭدە جازىپ بەرەيىن وقىڭدار!

مۇسىلماننىڭ ءوزى مەن ءسوزى تۋرا بولعان سوڭ ءىسى دە تۋرا بولۋى ءتيىس. مۇسىلماننىڭ ىسىندە قۋلىق پەن ايلاكەرلىك ورىن الماۋى كەرەك. ءابۋ ھۋرايرا (ر.ا.) ريۋايات ەتكەن حاديستە: «پايعامبارىمىز (ساللاللاھۋ ءالايھي ءۋا ءساللام) ءبىر كۇنى ءبىر بيداي ءۇيىندىسىن كورەدى. قولىن ونىڭ ىشىنە سالعان كەزدە بيدايدىڭ ۇستىڭگى جاعىنىڭ قۇرعاق، ال استىڭعى جاعىنىڭ سۋلى ەكەنىن بايقاپ، بيدايدىڭ يەسىنەن: «بۇل نە؟» – دەپ سۇرايدى. ساتۋشى: «وعان جاڭبىر ءتيدى» دەگەندە، پايعامبارىمىز (ساللاللاھۋ ءالايھي ءۋا ءساللام): «ول سۋ بولىگىن ادامداردىڭ كورۋى ءۇشىن ۇستىنە قويساڭ قايتەدى. ءبىزدى الداعان بىزدەن ەمەس»، – دەيدى».

حالىقتىڭ اقشاسىن الىپ ، حالىقتى بۇلاي بايىتپاي-اق قويىڭدار!

ايگۇل ورىنبەك

Abai.kz