الماتىنىڭ ايدىك بولعان «باراحولكاسىنداعى» «راحات» بازارىنا قاتىستى داۋ ءالى باسىلماي تۇر. بيىل ناۋرىز ايىنىڭ باسىندا باق پەن الەۋمەتتىك جەلىدە: «الماتىدا 300-گە تارتا كاسىپكەر جۇمىستارىنان ايىرىلىپ قالۋى مۇمكىن»، دەگەن اقپارات جاريا بولدى. وندا الماتىداعى «راحات» بازارىنىڭ جەر ۋچاسكەسى وزگە كومپانيانىڭ قولىنا ءوتىپ كەتكەنى تۋرالى ايتىلعان. بۇل تۋرالى Abai.kz اقپاراتتىق پورتالىندا ەگجەي-تەگجەيلى جازدىق.  

«جەردى جالعا العان جاڭا كومپانيا ەسكى بازاردى ءسۇرىپ تاستاپ، ورنىنا جيھاز فابريكاسىن سالماق»، دەگەن ساۋداگەرلەر نارازىلىقتارىن ءبىلدىرىپ، ميتينگكە دە شىققان. بۇل قوعامدا قىزۋ تالقى بولدى.

«الماتى اكىمدىگى  ول بازاردى جاۋىپ، ورنىنا جيھاز فابريكاسىن سالۋدى كوزدەپ وتىر. ءوز ارەكەتتەرى زاڭسىز، «تكم» جشس-ءنىڭ جەرگە ارتىقشىلىق قۇقىعىنا نۇقسان كەلتىرەتىنى ەكەنىنە قاراماستان، زاڭ تالاپتارىن ورەسكەل بۇزىپ، جەردى «Almaty CPS» جشس-نە بەرىپ وتىر. بۇل شەشىمدى قابىلداۋدا جەردىڭ سانيتارلىق-قورعاۋ ايماعىندا ورنالاسقانى، قالا اۋماعىندا ءوندىرىس قۇرىلىسىن سالۋ ءۇشىن كونكۋرس جاريالاۋ قاجەتتىگىن، ايماقتىق ۇيلەستىرۋ كەڭەسى عانا جوبانى ينۆەستيتسيالىق دەپ تانىپ، مەملەكەت تاراپىنان گرانت رەتىندە عانا بەرۋ قاجەتتىگىنىڭ ىسىرىپ تاستاپ، شەشىم قابىلداپ وتىر»، - دەگەن «تكم» جشس وكىلدەرى مەن زاڭگەرلەر بۇگىن الماتىداعى ادام قۇقىقتارى جونىندەگى قازاقستاندىق حالىقارالىق بيۋرونىڭ ءباسپاسوز ورتالىعىندا ءباسپاسوز جيىنىن وتكىزدى.

وعان جەر قۇقىعى سالاسىنداعى زاڭگەر – باقىتجان بازاربەك، «تكم» جشس-ءنىڭ وكىلى، زاڭگەر – جاميليا تۋلەنوۆا، زاڭگەر – جانيبەك باشانوۆ قاتىسىپ، ءسوز سويلەدى.

«زاڭ نورمالارى ساقتالا ما، قۇقىقتار سوت بيلىگىمەن قورعالا ما» دەگەن سۇراقتىڭ جاۋابىن الا الماي جۇرگەن «راحات» بازارىنىڭ كاسىپكەرلەرى اكىمدىك پەن سوت جول بەرىپ وتىرعان زاڭسىزدىقتاردىڭ ءمان-جايىن قوعام الدىندا جاريا ەتۋ مۇمكىندىگىن پايدالانا وتىرىپ قانا ادىلدىككە قول جەتكىزۋدى كوزدەيتىندىكتەرىن ايتادى.

سوت ادىلدىكتى جاقتاۋعا ەمەس، الماتى اكىمدىگىن اقتاۋعا تىرىسىپ جاتىر

جاميليا تۋلەنوۆا، «تكم» جشس-ءنىڭ وكىلى، زاڭگەر:

- «راحات» بازارىندا قازىر جەكە كاسىپكەرلەر ءوز جۇمىستارىن جالعاستىرۋدا.  ناۋرىز ايىندا ساۋداگەرلەر نارازىلىققا شىققان.  ونىڭ سەبەبى – «Almaty CPS-ءتىڭ» سوتقا بەرگەن جەردى بوساتۋ تۋرالى تالابى ەدى. ولاردىڭ تالابى سوت شەشىمىمەن قاناعاتتاندىرۋسىز قالدىرىلدى. بىراق، سوت شەشىمدەرى، مىنە، ءۇش جىلدان اسىپ بارادى، وسى كۇنگە دەيىن ءوزىنىڭ زاڭدى شەشىمىن تاپپاي وتىر.

ويتكەنى، سوت تاراپىنان «Almaty CPS-ءتىڭ» مۇددەسىنە قاراي بەت بۇرۋ جانە جەرگىلىكتى اتقارۋ ورگاندارىنىڭ لاۋازىمدى تۇلعالارىنىڭ پوزيتسياسىن اشىق قورعاۋ ورىن الىپ وتىر. سوندىقتان، ءبىز وسى ءۇش جىلدان استام ۋاقىت بويى سوت بيلىگىنە سەنبەيمىز دەۋمەن كەلەمىز.

سوتتا ءبىزدىڭ اكىمدىك جانە ۋاكىلەتى ورگاندار – قالالىق جەر قاتىناستارى باسقارماسى، قالالىق جوسپارلاۋ (ۋربانيستيكا) باسقارماسى جانە كاسىپكەرلىك باسقارمالارىنىڭ شەشىمدەرىن زاڭسىز دەپ تانۋ تۋرالى تالاپ ارىزىمىز قارالدى. سوت شەشىمى شىقتى. سوت ءىستى قاراۋى كەزىندە «Almaty CPS-ءتىڭ» جەردى بوساتۋ تۋرالى تالاپ-ارىزىن، ياعني ەكى ءىستى ءبىر وندىرىسكە قوسىپ، زاڭسىز شەشىم شىعىپ وتىر. ءبىز ول بويىنشا شاعىمدانعان ەدىك. 27 قىركۇيەكتە الماتى قالاسىنىڭ اپپەلياتسيالىق سوت القاسى سول شەشىمدى ءوز كۇشىندە قالدىرۋ تۋرالى تاعى ءبىر شەشىم قابىلدادى. ەندى اپپەلياتسيالىق  سوت القاسىنىڭ بۇل شىعارعان قاۋلىسىنا ءبىز نارازى بولىپ وتىرمىز. ويتكەنى سوت تالاپ-ارىز شەڭبەرىنەن شىعىپ، «تكم-ءدى» «كاسىپكەرلەر اراسىندا الەۋمەتتىك نارازىلىق تۋدىردى جانە زاڭسىز، نەگىزسىز تابىس تاۋىپ وتىر»، - دەپ ايىپتاپ وتىر. ەشبىر دالەلسىز، دايەكسىز جاساپ وتىرعان وسى سوت تۇجىرىمى ءبىزدىڭ نارازىلىعىمىزدى تۋردىردى.

بۇل ءوز كەزەگىندە الماتى قالاسىنداعى كەيبىر سۋديالاردىڭ ادىلەتسىز شەشىم شىعارۋعا دايىن ەكەنىنىنىڭ ءبىر دالەلى.

اۋەلدە ولاردىڭ («Almaty CPS-ءتىڭ») بەرگەن تالاپ-ارىزى قاناعاتتاندىرۋسىز قالدىرىلعان. نەگە؟ زاڭ بويىنشا، «تكم» جەر ۋچاسكەسىنە وزگە تۇلعالاردىڭ الدىنداعى ارتىقشىلىق قۇقىعىن قورعاۋ ماقساتىندا سوتقا جۇگىنىپ كەلدى. بۇل ءوز شەشىمىن تاپقانشا «Almaty CPS» جەردى بوساتۋ تۋرالى تالاپ قويا المايدى. ول تۋرالى اۋدانارالىق ەكونوميكالىق سوتتىڭ سۋدياسى قازىمبەتوۆا وسى شەشىمگە ءوز باعاسىن بەرگەن.

ءبىزدىڭ اپەلياتسيالىق سوت القاسىندا اكىمنىڭ 6 ماۋسىم 2019 جىلعى ««Almaty CPS-كە» جەردى بەرۋ جانە ول جەر تەلىمىنە «تكم جشس-نىڭ» بارلىق قۇقىعىن ايىرۋ تۋرالى» قاۋلىسىن زاڭسىز دەپ تانۋدى تالاپ ەتىپ، ارىزىمىزدى جولداعانبىز. ال مىناۋ سوۋديا ابسەمەتوۆا شىعارعان قاۋلىعا قاراساق، ول ارىز-شاعىمىمىز بويىنشا شاعاراتىن بولاشاق قاۋلىنىڭ تاعدىرىن الدىن-الا شەشىپ قويعان. سوندىقتان، سۋديانىڭ شىعارعان شەشىمى زاڭعا كەرەعار. ويتكەنى، ەرتەڭ ازاماتتىق پروتسەستىك كودەكستىڭ 76 بابىنا سۇيەنىپ، وسى قاۋلىنىڭ نەگىزىندە ءبىزدىڭ تالابىمىز بويىنشا تەرىس شەشىم شىعاتىنىنا سەنىمدىمىز.

قازىر بىزگە جالا جابىلىپ وتىر. «مەملەكەتكە نۇقسان كەلتىرىپ وتىر، مەملەكەت مەنشىگىندەگى جەردى زاڭسىز پايدالانىپ وتىر، جەكە كاسىپكەرلەردى پايدالانىپ وتىر، الەۋمەتتىك نارازىلىق تۋدىرىپ وتىر»، - دەگەن باعا بەرىپ وتىر. بۇل اۋىر ايىپتاۋ. بۇل نارازىلىق تۋدىراتىن جايت.  سەنىپ كەلگەن سوت بيلىگى وسىنداي ارەكەتكە بارىپ وتىرسا، ءارى قاراي قانداي بيلىككە سەنۋگە بولادى؟ ءبىز تىعىرىققا تىرەلىپ  وتىرمىز. ويتكەنى زاڭ ءوز بيلىگىنەن جوعارى شەشىم قابىلداپ وتىر. قازىر بىزگە قارسى بىرلەسىپ ارەكەت ەتۋدىڭ قۇربانى بولىپ وتىرمىز.

ءدال قازىر ءبىز جەردىڭ سالىعىن تولەي المايمىز. سەبەبى – زاڭ جۇزىندە جەردىڭ پايدالانۋشىسى «Almaty CPS». ال بىراق، «راحات» بازارى ورنالاسقان جەردە ءوزىنىڭ ساۋدا ورىندارى بار جەكە كاسىپكەرلەر ءوز كاسىپتەرى، ونداعى مۇلىكتەرى ءۇشىن اي سايىن سالىقتارىن تولەپ وتىر. ولاردىڭ اي سايىنعى سالىقتارىنىڭ وزەرىنە، جۇمىسكەرلەرىنە دەر كەزىندە ءتۇسۋىن قاداعالاپ وتىرعان ماماندار بار. سوندىقتان، «مەملەكەتتىك بيۋدجتكە قاراجات تۇسپەي جاتىر»، - دەگەن سوتتىڭ تۇجىرىمى مۇلدە نەگىزسىز.

سوتتىڭ قاۋلىسى قولىمىزدا. قاۋلىدا جەر پايدالانۋ مەرزىمى «Almaty CPS-كە» 4 جىل 11 ايعا بەرىلگەن. «سونىڭ 2 جىل 4 ايى ءوتىپ كەتتى»، - دەپ وتىر. سوتتان ونى ەشكىم سۇراعان جوق. ودان كەيىن « وسى ۋاقىتقا دەيىن «تكم» ول جەردى بوساتپاي وتىر»، - دەيدى. «تكم-ءنىڭ»  بۇل جەرگە قويىپ وتىرعان تالابى مۇلىكتىك تالاپ ەمەس، قۇقىقتىق تالاپ! سوت ونى تۇسىنبەيدى دەپ ويلامايمىن. ەكەۋىنىڭ ايىرماسى جەر مەن كوكتەي. «تكم-نىڭ» ول جەرگە قۇقىعى بار. ال قازىرگى سوت تۇجىرىمى زاڭدى ورەسكەل بۇزۋ بولىپ تابىلادى. سودان كەيىن، ««Almaty CPS-ءتىڭ» جەردى بوساتۋدى تالاپ ەتۋگە قۇقىعى بار»، - دەيدى. «اكىمدىك پەن پروكۋراتۋراعا جەردىڭ يەسى رەتىندە شاعىمدانۋعا قۇقىعى بار»، - دەيدى. «Almaty CPS-ءتىڭ» تالابى بۇل ءىستىڭ ىشىندە قارالماۋى كەرەك ەدى. ويتكەنى، ازاماتتىق پروتسەستىك كولدەكستە تالاپ قويۋ ءتارتىبى جانە زاڭسىز ارەكەتتەردى شاعىمدانۋ تۋرالى انىق جازىلعان. ال سوت ەكى ءوندىرىستىڭ ءىسىن ءبىر ىسكە بىرىكتىرىپ وتىر. ءبىزدىڭ شاعىم بەرۋىمىزدىڭ سەبەبى دە سول ەدى. ءبىرىنشى ساتىداعى سوت شەشىمى وزگەرتۋگە جاتادى. ويتكەنى ءارتۇرلى ەكى وندىرىستەگى ءىس بىرگە قارالدى. «Almaty CPS-ءتىڭ» تالابى «تكم» تالاپتارى بويىنشا ناقتى شەشىم شىققانشا قارالۋعا جاتپايدى.

سوت ءوزىنىڭ وسى ءبىر تۇجىمىمەن «Almaty CPS-ءتىڭ» الداعى ۋاقىتتاعى قادامدارىن ايقىنداپ، قانداي ارەكەت جاساۋى كەرەكتىگىن كورسەتىپ بەرىپ وتىر. «Almaty CPS» وسى 2 جىل 4 ايدا بازارعا كەلىپ، «ءبىزدىڭ وسىنداي قۇقىعىمىز بار، مىناداي جوسپارىمىز بار»، - دەپ كاسىپكەرلەرمەن سويلەسكەن دە جوق. ولار تەك ءبىز ءوز قۇقىعىمىزدى تالاپ ەتىپ سوتقا جۇگىنگەندە عانا پايدا بولدى. سوتتىڭ شەشىمى بەلگىلى ءبىر دالەلدەمەگە نەگىزدەلۋى كەرەك.

ءبىز باۋىرجان بايبەكتى ءۇشىنشى تۇلعا رەتىندە سوتقا شاقىردىق.  ويتكەنى، قاۋلىعا قول قويعان – بايبەك. بايبەكتىڭ قول قويعان قاۋلىسىندا قانداي زاڭ نورمالارى بۇزىلعانىنا نازار اۋداردىق. ول قۇجاتتاردىڭ بارلىعىن كورسەتىپ، ىسكە قاتىستىرۋعا شاقىردىق. بىراق، سۋديا قازىمبەتوۆا ءوز ۇيعارىمىمەن، ءوز ەركىمەن بايبەكتى ءۇشىنشى تۇلعالار قاتارىنان شىعارىپ تاستادى. بۇل دا زاڭسىز. ويتكەنى، ازاماتتىق پروتسەستىك كودەكستە ونداي نورما جوق. سوت ءوزى شاقىرا الادى. ال تالاپكەردىڭ شاقىرعان ادامىن قاتىسۋشىلار ساناتىنان شىعارا المايدى.

300 ساۋداگەر، ولاردىڭ ارتىنداعى مىڭداعان ادام (وتباسى مۇشەلەرى) قازاقستان پرەزيدەنتى قاسىم-جومارت توقاەۆتان كومەك سۇرايدى. ويتكەنى ەرتەگى كۇنگە دەگەن سەنىم جوق. «Almaty CPS» ءبىر كۇنى كەلىپ، «مىنا جەردى تۇگەل بوساتامىز»، - دەسە، ول ناعىز الەۋمەتتىك نارازىلىقتىڭ ورداسىنا اينالادى. نە بولماسا، باسقا دا ارانداتۋشىلىق ارەكەتتەر بولاتىن بولسا، ونى توقتاتاتىن كۇش جوق. ويتكەنى، جەرگىلىكتى اتقارۋشى ورگان بارلىعىن سوتقا يتەرىپ، تەك باقىلاۋشى بولىپ وتىر. ال سوت جەرگىلىكتى اتقارۋ ورگاندى اقتاپ الۋ ءۇشىن بارلىق امالدى جاساپ وتىر.

الماتى قالاسىندا سوتتار اكىمدىككە تاۋەلدى!

باقىتجان بازاربەك، زاڭگەر:

- 3 جىلعا كەتىپ بارا جاتىر، سوتتا قورعاپ جاتقانىمىز – «راحات» بازارىنداعى جەكە كاسىپكەرلەرىنىڭ قۇقى. 2019 جىلى قاۋلى شىقتى، سول ساتتەن باستاپ كاسىپكەرلەر سوتقا بەرە باستادى.

ءبىز سوتقا ونشاقتى تالاپ-ارىز بەرگەنبىز. ءتۇرلى-ءتۇرلى تالاپ-ارىزدار. تالاپ-ارىز بەرگەن كەزدە  ازاماتتىق ءىس جۇرگىزۋ كودەكسىنە سايكەس، بىرىنشىدەن الماتى قالاسى اكىمدىگىنىڭ جەر قاتىناستارى باسقارماسى، قالالىق ساۋلەت-قۇرىلىس باسقارماسىنىڭ ارەكەتىن زاڭسىز دەپ تانۋ تۋرالى تالاپ بەردىك. بىراق، سۋديالار ءوزىنىڭ جۇمىسىن دۇرىس بىلمەي مە، ايتەۋىر ءبىزدىڭ تالاپ-ارىزدارىمىزدى بىرنەشە مارتە قايتارىپ تاستادى. سول تالاپ-ارىزىمىزدى بەرۋ كەزىندە-اق، ءبىز بۇل جەردە اۋداندىق دەڭگەيدەگى سوتتار الماتى قالاسى اكىمدىگىنە تولىعىمەن تاۋەلدى ەكەنىن بايقاعانبىز. سوتتىڭ تاۋەلسىزدىگى دەگەن ۇعىمعا الماتىنى كەلتىرە المايمىز. ءبىز ءىس بارىسىندا بۇرىنعى اكىمدى، اكىمنىڭ ورىنباسارلارىن، جەر كوميسسياسىنىڭ مۇشەلەرىن ت.ب. شاقىرعانبىز. ال سۋديالار ولاردى بارىنشا اراشالاپ وتىرۋعا تىرىستى. ارينە، قورقادى. سەبەبى جەر كوميسسسياسىنىڭ مۇشەسى ەگەر سۇراققا الىنسا، سوت بارىسىندا قانداي سۇراقتار قويىلاتىنىن ولار بىلەدى. ەرتەڭ قانداي بىلىقتار شىعا كەلەتىنىن ولار جاقسى تۇسىنەدى. سوندىقتان دا سۋديالار ءبىزدىڭ تالاپتارىمىزدى قاناعاتتاندىرماۋعا تىرىسقان.

2019 جىلى ءبىر قاۋلىمەن «تكم» جشس-عا ۋاقىتشا جەر پايدالانۋ قۇقىعىن ۇزاتپاي، مەرزىمىن توقتاتادى دا، ۋاقىتشا جەر پايدالانۋ قۇقىعىن «Almaty CPS» مەكەمەسىنە بەرەدى. ءبىر قاۋلىمەن عانا. بۇل زاڭ شەڭبەرىنەن تىس دۇنيە.

ەكىنشىدەن، جەر كودەكسىنىڭ 37 بابىنا سايكەس، جالعا الۋ شارتىن كەيىنگى مەرزىمگە ۇزارتۋ تۋرالى ماسەلە جەر كوميسسياسىندا قارالمايدى. جەر كودەكەسىنىڭ 37 جانە 43 باپتارىنا سايكەس، ول اكىممەن تىكەلەي قارالۋى ءتيىس. بىراق، جەر  قاتىناستارى باسقارماسى زاڭسىز تۇردە جەر كودەكسىنىڭ 37, 43 باپتارىن بۇزا وتىرىپ، ونى جەر كوميسسياسىنىڭ قاراۋىنا شىعارادى. شىندىعىندا، 2017-2020 جىل ارالىعىندا 80-گە جۋىق جەردى جالعا الۋ مەرزىمىن كەيىنگە ۇزارتۋ ماسەلەسى جەر كوميسسياسىندا قارالعان. الماتى قالاسىنىڭ 2017-2020 جىلدار ارالىعىنداعى جەر كوميسسياسىندا قارالعان بارلىق ارىزدار جانە ماتەريالدار قايتا قارالىپ، تەكسەرىلۋى ءتيىس.

ۇشىنشىدەن، جەر كودەكسىنىڭ  43 بابىندا ناقتى جازىلعان. ەگەر قانداي دا ءبىر قۇرىلىس نىسانىن سالاتىن بولسا، بۇل ماسەلەسى جەر كودەكسىنىڭ 44/1 بابىمەن رەتەلەدى. ياعني، زاڭنىڭ ءوزى بۇل باپپەن ەمەس، 44/1 دەگەن باپپەن بەرىلەتىنىن ايتىپ تۇر.

ودان كەيىن ينۆەستيتسيالىق جوبا بويىنشا، جەر كودەكسىنىڭ 48 بابىمەن، جەردى ساۋدا-ساتتىقسىز بەرىپ وتىر. بىراق، ەلىمىزدە ينۆەستيتسيالىق جوبالارعا جەر بەرۋ ەرەجەسى قابىلدانباعان. ءبىز قۇزىرلى ورگانداردان، مينيسترلىكتەن ارنايى انىقتاما الدىق. بۇل جەردە ءتيىستى كوميتەت ناقتى جاۋاپ بەردى. ينۆەستيتسيالىق جوبامەن بەرىلەتىن جەر ءۇشىن ارنايى اۋماقتىق كوورديناتسيالىق كەڭەستىڭ رۇقساتى بولۋى ءتيىس. بىراق، الماتى اكىمدىگى «Almaty CPS-كە»  جەردى بەرگەن كەزدە كوورديناتسيالىق كەڭەستەن وتكىزبەگەن، قارالماعان. ول تۋرالى اكىمدىكتىڭ ءوزى ءتيىستى قۇجاتتارىن بەرگەن. ودان بولەك، ينۆەستيتسيالىق جوبا ءۇشىن جەر بەرۋدىڭ ءتيىستى ەرەجەسى كەرەك. ونداي ەرەجە دايىن، بىراق زاڭمەن قابىلدانباعان، رەسپۋبليكالىق دەڭگەيدە. دەمەك، اكىمدىكتەر ينۆەست جوبا ءۇشىن جەر بەرۋگە قۇقىعى جوق.  بىراق، الماتى قالاسى اكىمدىگى جەر كودەكسىنىڭ 48 بابى بويىنشا، ينۆەت جوبا ءۇشىن جەر بەرىپ وتىر. بۇل قازاقستان بويىنشا ءبىرىنشى جاعداي. ونىڭ ءوزى ۇلكەن داۋ تۋلدىرىپ وتىر.

سوتتاعى بىلىقتار تۋرالى دا ايتۋ كەرەك.  سوتتار ءىستىڭ ارتىندا اكىمدىك تۇرعانىن بىلسە، سول ساتەن باستاپ سوت تورەلىگى اياقتالادى. اكىمدىك ءجۇز جەردەن جەر كودەكسىنىڭ باپتارىن ورەسكەل بۇزسا دا،  ءتىپتى وتىرىك زاڭمەن جەر بەرگەن كۇننىڭ وزىندە ەكىنشى تاراپ اكىمدىك نەمەسە اكىمدىك باسقارمالارى بولسا، سوتتار تورەلىگى جۇرمەي قالادى. مۇمكىن سولتۇستىك قازاقستان، اتىراۋ، ماڭعىستاۋ جاقتاردا سوتتار تاۋەلسىز شىعار. بىراق، الماتى قالاسىندا سوتتار اكىمدىككە تاۋەلدى. سوتتار دالەلدەمەلەردى قابىلداماي، ءىستى بارىنشا قىسقارتۋعا نەمەسە اكىمدىك پايداسىنا شەشىم شىعارۋعا تىرىسادى. مەن ۇكىمەتتىك جەر كوميسسياسىنىڭ مۇشەسى، تاۋەلسىز ساراپشى، زاڭگەر رەتىندە الماتى سوتتارىنداعى بىلىقتى باسقاشا تۇسىندىرە المايمىن.

ءبىز ساۋساقتان سورىپ العان سوزدەردى ەمەس، ناقتى دالەلدەردى ۇسىنىپ وتىرمىز. جەر كودەكسىنىڭ 37, 43, 65 باپتارى بۇزىلىپ وتىر. ونىڭ بۇزىلعانىن سۋديالار ءبىلىپ وتىر. اتالعان باپتاردىڭ بۇزىلعانىن اكىمىكتىڭ جەر قاتىناستارى باسقارماسىنىڭ وكىلدەرى سوت بارىسىندا دا، سوتتان تىس «اتامەكەن» پالاتاسىندا دا وزدەرى مويىنداپ وتىر. بىراق، پروكۋراتۋرا قوزعالمايدى، سىبايلاس جەمقورلىقا قارسى دەپارتامەنتتىڭ الماتىداعى وكىلدەرى قوزعالمايدى. وسىنى پايدالانىپ، ولار ءجۇز جەردەن مويىنداعاننىڭ وزىندە ەش ناتيجە شىقپاي وتىر. قاۋلىنىڭ كۇشى جويىلمايدى. سوت ءتيىستى قاۋلىنىڭ كۇشىن جويمايدى.

ءبىز بۇل جەردە بوستان-بوس شىرىلداپ وتىرعان جوقپىز. ءبىز 300-گە تارتا شاعىن كاسىپكەردىڭ مۇڭىن جوقتاپ وتىرمىز. ولار سالىق تولەپ وتىر. دامىعان ەلدەردە شاعىن جانە ورتا بيزنەس ەكونوميكانىڭ نەگىزى. بىراق، قازاقستاندا ەمەس! شاعىن جانە ورتا بيزنەستى قولداۋشى كۇش – مەملەكەت بوۋلى ءتيىس. بۇل «تكم» ىسىندە ءبىز مەملەكەتتىڭ بار ەكەنىن سەزىپ وتىرعان جوقپىز!

«Abai.kz» بۇل – ەركىن اقپارات الاڭى. وي جارىستىرىپ، پىكىر تالاستىرۋ وقىرمان قاۋىمنىڭ ەنشىسىندە. ماتەريالدا ەسىمدەرى اتالعان تۇلعالار پىكىر بىلدىرۋگە نيەتتى بولسا، الداعى ۋاقىتتا ولاردىڭ دا پىكىرىن جاريالايمىز...

Abai.kz