قازاقستان پرەزيدەنتى قاسىم-جومارت توقاەۆ ۆلاديمير پۋتينمەن كەزدەسۋدە كرەملدىڭ ۋكرايناداعى سوعىسقا قاتىستى ۇستانىمىنا اشىق تۇردە كۇمان كەلتىردى.

قازاقستان پرەزيدەنتى قاسىم-جومارت توقاەۆ رەسەي ديكتاتورى ۆلاديمير پۋتينمەن حاتتامالىق كەزدەسۋ بارىسىندا كۇتپەگەن جەردەن رەسەيدىڭ ۋكرايناعا قارسى سوعىسى تاقىرىبىن قوزعاپ، ماسكەۋدىڭ ۇستانىمىنا قايشى كەلەتىن بىرنەشە مالىمدەمە جاسادى.

توقاەۆ ءوز سوزىندە قازاقستان بۇل سوعىستىڭ تۇپكى ءمانىن تۇسىنبەيتىنىن ايتىپ، اڭگىمە قانداي دا ءبىر «ازاماتتىق سوعىس» تۋرالى ەمەس، ءدال مەملەكەتتەر اراسىنداعى قاقتىعىس جايىندا بولىپ وتىرعانىن باسا ايتتى.

بەلگىلى بولعانداي، كرەمل 2014 جىلدان بەرى بارلىق كەلىسسوز الاڭدارىندا ۋكرايناداعى وقيعالاردى «ازاماتتىق سوعىس» دەپ سەندىرۋگە تىرىسىپ كەلگەن ەدى.

سونىمەن قاتار توقاەۆ ۋكراينا توڭىرەگىندەگى جاعداي استانا ءۇشىن سەبەپتەرى الدەقايدا تۇسىنىكتى بولىپ كورىنەتىن باسقا حالىقارالىق جانجالداردان وزگەشە ەكەنىن اتاپ ءوتتى. مىسال رەتىندە ول ازەربايجان مەن ارمەنيا اراسىنداعى كوپجىلدىق تەكەتىرەستى كەلتىرىپ، بۇل قاقتىعىستىڭ سەبەپتەرى ايقىنىراق ءارى تاريحي تامىردا جاتقانىن ايتتى.

«ال مۇندا (ۋكرايناداعى سوعىس تۋرالى) مۇنى ءتۇسىنۋ وتە قيىن»، — دەدى قازاقستان پرەزيدەنتى.

وسىلايشا توقاەۆ استانانىڭ ۋكرايناداعى سوعىسقا قاتىستى كرەملدىڭ كوزقاراسىن بولىسپەيتىنىن كوپشىلىك الدىندا اشىق ءبىلدىردى.

قازاقستان كوشباسشىسىنىڭ بۇل سوزدەرىنە ءپۋتيننىڭ رەاكتسياسى دا نازار اۋدارتادى: ول بۇل ۋاقىتتا كوزىن تومەن جىبەرىپ، اياعىن تىنىمسىز قوزعالتىپ وتىردى.

بۇدان ءارى قازاقستان پرەزيدەنتى اسكەري ارەكەتتەردى توقتاتىپ (سوعىستى دامىلداتىپ), «ستامبۋل فورمۋلاسى 2.0» فورماتىنا ورالۋدى ۇسىندى. ونىڭ ايتۋىنشا، كەزىندە سول ۇدەرىس اياسىندا «ايتارلىقتاي ناتيجەلەرگە قول جەتكىزىلگەن ەدى».

توقاەۆ بۇل تاقىرىپتاعى ءسوزىن اياقتاعان سوڭ، پۋتين كوپ سوزگە بارمادى. ول تەك قازاقستان پرەزيدەنتىن «ۋكراينا باعىتىنا قاتىستى ەگجەي-تەگجەيلى مالىمەتتەردەن» حاباردار ەتۋگە نيەتتى ەكەنىن ايتۋمەن عانا شەكتەلدى.

وسى تۋرالى پىكىرىڭىزدى Abai.kz اقپاراتتىق پورتالىنىڭ Telegram-داعى پاراقشاسىنا جازىڭىز...

Abai.kz