ول مەنى قاتتى تاڭ قالدىرعان اقىن ەدى. ولەڭىن ورىسشا جازاتىن. 2002 جىلدار شاماسى بولسا كەرەك. پوەزيا كەشتەرىنە مۇلدە ادام جينالمايتىن زامان.

بىردە مەن ونىڭ پوەزيا كەشىنە باردىم.

ونىڭ ەسىمى – ارون اتابەك ەدى.

اح، ناس پوكينۋل ەتوت تەنگري،

ي ۆ سەردتسە نە ۆوشەل اللاح،

ي پراۆيات نامي تولكو دەنگي،

ي پراۆيات نامي تولكو ستراح،-دەگەن ولەڭ جولدارى ەسىمدە قالىپتى.

اروننىڭ قاسىندا ەلىكتىڭ لاعىنداي بولىپ جارى جاينا جۇرەتىن. ول نازىكتىكتىڭ سيمۆولى ەدى. اقىن جارىن ەرەكشە سۇيەتىن.

سول ارون ەڭگەزەردەي باتىر تۇلعاسىمەن ساحناعا كوتەرىلدى.

ساحنادا 7-8 ءار ءتۇرلى ادەمى قىزدار مەن كەلىنشەكتەر وتىردى. سويتسەك ولار اقىننىڭ مۋزالارى ەكەن. ارون ءار قىزدى ورنىنان تۇرعىزىپ وعان ارناعان ولەڭدەرىن وقىدى.

قازاق اقىندارى ولەڭ ارناماعان قىز جوق شىعار. بىراق مۋزالارىن ساحناعا شىعارىپ، ءار قايسىسىنا قوشامەت كورسەتىپ، ولەڭىن حالىقتىڭ الدىندا وقىپ بەرگەن اقىندى ءبىرىنشى رەت كورۋىم.

سول جىلدارى مەنىڭ دە ەڭ العاشقى پوەزيا كەشىم عالىمدار ۇيىندە ءوتتى.

مەن كەشىمە ارون اتابەكتى شاقىردىم.

ول كەزدە ۇيالى تەلەفون ەندى پايدا بولعان. جانە حالىق اراسىندا مۇلدە تاراماعان كەز. 100-گە جۋىق شاقىرتۋ قاعازىن تولتىرىپ، سونىڭ تەك جيىرما شاقتىسىن عانا اياقپەن ءجۇرىپ تاراتقانىم ەسىمدە.

شاڭىراق وقيعاسى ءالى بولماعان. بىراق سول كەزدىڭ وزىندە ارونعا ساياسي ديسسيدەنت رەتىندە قارايتىن.

مەن ونىڭ ۇيىنە شاقىرتۋ قاعازىن الىپ بارعاندا اروننىڭ ءوزى قارسى الدى.

ونىڭ جۇمساقتىعى مەن مەيىرىمدىلىگىندە شەك جوق ەدى. قازاقشا سويلەيتىن. كەشىڭە مىندەتتى تۇردە بارامىن، تاناكوز. جانە ولەڭدەرىڭدى ورىسشاعا اۋدارىپ اپارامىن،-دەدى.

زالعا ادام جينالمايتىن سول ءبىر جىلدارى تۇڭعىش رەت عالىمدار ءۇيى لىق تولدى. عالىمدار ءۇيىنىڭ جىلدار بويى شاڭ باسىپ اشىلماي تۇرعان بالكونى اشىلىپ، بالكون دا ادامعا لىق تولدى.

كەشىمە حالىق كوپ كەلەدى دەپ ەشقاشان كۇتپەپ ەدىم. كەشتە قازىرگى اتاقتى ماتەماتيك اسقار جۇمادىلداەۆ اعامىز ورىن بولماعادىقتان تۇرەگەپ تۇرىپ كورگەنى ەسىمدە قالدى.

سول كەشتە ارون ولەڭ وقىدى. حالىقتىڭ كوپتىگىنەن تولقىپ، ارقاسى قوزىپ ساحنادان تۇسكىسى كەلمەگەنىن كوردىم.

كەيىن وسى ارون اتابەك اۋدارعان ەكى ولەڭ «دەبيۋتتەر دوستاستىعى» اتتى حالىقارالىق پوەزيا فەستيۆالىندە جەڭىسكە جەتتى. سىيلىقتى رەسەي پرەزيدەنتى د. مەدۆەدەۆ تابىستاۋى كەرەك بولعان. بىراق ءدال سول كۇنى رەسەي مەن گرۋزيا اراسىندا سوعىس باستالىپ، سىيلىقتى ماعان تاجىكستان پرەزيدەنتى ەمومولي راحمونوۆ تابىستادى.

ول ماعان قايتا ءتىرىلىپ كەلگەن ماحامبەت سياقتى ەلەستەيتىن. ءوزى دە سول ماحامبەتتىڭ ولەڭدەرىن ورىسشاعا اۋدارۋمەن اينالىستى.

تالانتتى، ەستەت، دجەنتەلمەن.

ەشقاشان ەكى سويلەۋدى بىلمەيتىن الاشوردالىق ۇستانىمنىڭ سوڭعى تۇياعى.

«ءتىرى تۇرسام قازاققا قىزمەت قىلماي قويمايمىن»-دەگەن ءاليحان قاعيداتىن ىسپەن جالعاستىرۋشى.

قازاقتىڭ ارى مەن ۇياتى.

قازاق باتىرىنىڭ ەڭ وسال تۇسى، جاندى جەرى – وتباسى. ول سول اياۋلى وتباسىن دا ۇلت جولىندا قۇربان قىلدى.

سەنى ەشكىم سىندىرا المادى. سۇيەگىڭدى ۇگىتتى، ميىڭدى شاشتى، ءتىلىڭدى قيدالادى، باۋىرىڭدى ەزدى. سۋ بەرمەي دە سىنادى. جالعىزدىقپەن دە سىنادى. قاراڭعىلىقپەن دە سىنادى. ناداندىقتىڭ وزبىر تۇرىمەن دە سىنادى.

حالقىڭ سەنى تانىمادى. بىراق سەن سول حالىقتىڭ جولىندا ءولدىڭ.

سەن راسىندا دا «ارىڭنىڭ تۇتقىنىسىڭ!». ار جولىندا مەرت بولدىڭ.

يىلمەگەن باسپەن، بۇگىلمەگەن تىزەمەن، مايىرىلماعان جۇزبەن، سىنباعان رۋحپەن، وتتى جۇتىپ، شوق بۇركىگەن، تاستى شايناپ، قۇم تۇكىرگەن ماڭعاز قالپىڭدا كوككە قاسقايىپ قاراپ تۇرىپ كەتە باردىڭ!

سەنىڭ باعاڭدى ءبىز بەرمەيمىز.

سەنىڭ باعاڭدى بۇگىنگىلەر بەرمەيدى.

سەنىڭ باعاڭدى تاريح بەرەدى.

سەنىڭ بۇگىن ولگەن كۇنىڭ، ارون! بىراق سەن تىرىدەن دە ءتىرىسىڭ!

راسىندا دا، ءتاڭىر ءبىزدى تاستاپ كەتكەن.

ال اللا جۇرەگىمىزگە ەنبەدى. ءدال ءوزىڭ ايتقانداي...

اقشا مەن ۇرەيدىڭ قۇشاعىندا ەندى قانشا عاسىر ءومىر سۇرەمىز؟

ءولدىڭ ماماي قور بولدىڭ!

اردا ارىسىم-اي!

كىمگە باسىمىزدى سۇيەپ جىلايمىز؟

تاناكوز تولقىنقىزى

Abai.kz