سارسەنبى, 25 مامىر 2022
ماڭىزدى 7126 21 پىكىر 2 قاڭتار, 2022 ساعات 20:03

جاڭاوزەن نەگە كوتەرىلدى؟

بۇگىن الەۋمەتتىك جەلىدە جاڭاوزەن تۇرعىندارىنىڭ جاپپاي نارازىلىققا شىققانى ايتالاتىن ءارتۇرلى ۆيدەو جازبالار تاراۋدا. قازتاگ اگەنتتىگىنىڭ اقپاراتىنا سۇيەنسەك، جاڭاوزەن تۇرعىندارى گاز باعاسىنىڭ قىمباتتاۋىنا قارسىلىق ءبىلدىرىپ، بەيبىت ميتينگكە شىققان. ولار جەرگىلىكتى اكىمدىكتەن گاز باعاسىن ءتۇسىرۋدى تالاپ ەتۋدە.

2022 جىلدىڭ 1 قاڭتارىنان باستاپ كوگىلدىر وتىن باعاسى 120 تەڭگەگە دەيىن قىمباتتاعان. ماڭعىستاۋ وبلىسىنىڭ اكىمى نۇرلان نوعاەۆ پەن جاڭاوزەن اكىمى ماقسات يبراگيموۆقا ۇندەۋ جولداعان جەرگىلىكتى تۇرعىندار اكىمدىككە ءبىر عانا تالاپ قويعان. ول – گاز باعاسىن 60 تەڭگەگە دەيىن تومەندەتۋ!

ال ماڭعىستاۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى گاز باعاسىنىڭ كۇرت قىمباتتاۋىنا قاتىستى پىكىر ءبىلدىرىپتى.

«ءبىزدىڭ ءوڭىرىمىز سۇيىتىلعان گازدى كوپ تۇتىنۋشى وڭىرلەردىڭ ءبىرى. ءبىزدىڭ ايلىق تۇتىنۋ كورسەتكىشىمىز – 18 مىڭ توننا گاز.  گاز باعاسىنىڭ قىمباتتاۋىنىڭ ءبىر سەبەبى – كوپتەگەن تاۋارلاردىڭ ەلەكتروندى بيرجاعا شىعۋى. وزدەرىڭىز بىلەتىندەي، ءبىزدىڭ «قازاق گاز وڭدەۋ زاۋىتىنىڭ» قۇرىلعىلارى ەسكىرگەن. ول دا باعانىڭ وسۋىنە ءبىر سەبەپ. ءبىز زاۋىتقا ينۆەستيتسيا  تارتۋىمىز كەرەك. سول سەكىلدى، جاڭاوزەندە زاۋىت قۇرىلىسىن باستاۋ دا جوسپارىمىزدا بار.

ەكىنشى فاكتور – ءبىز گازدىڭ قوسىمشا قورىن (زاپاس) اتىراۋ وبلىسىنان الامىز. قازىر گازدىڭ ورتاشا باعاسى 95-100 تەڭگە»، - دەپتى باسقارما باسشىسى بەردىبەك قارتباەۆ.

ونىڭ ايتۋىنشا، رەسپۋبليكا بويىنشا گازدىڭ ورتاشا باعاسى 110 تەڭگەنى قۇراپ وتىر. ول ءوز سوزىندە اتىراۋ وبلىسى مەن ورال قالاسىن مىسال ەتكەن. اتىراۋ وبلىسىندا گاز باعاسى 115 تەڭگە بولسا، ورالدا 120 تەڭگەدەن ساتىلىپ جاتقانىن ايتىپتى.

ال ونان كەيىنگى شىققان رەسمي اقپارات بويىنشا، قازىر ماڭعىستاۋ وبلىسى اكىمدىگى اۆتوكولىك يەلەرىنە ءتۇسىندىرۋ جۇمىستارىن باستاپ كەتىپتى.

«ساعات 11:00 شاماسىندا جاڭاوزەن قالاسىنىڭ احاج عيماراتى الدىنا اۆتوكولىك يەلەرى جينالىپ، گاز باعاسىن ارزانداتۋدى تالاپ ەتتى. جينالعاندارمەن قالا اكىمىنىڭ مىندەتىن اتقارۋشى عالىم بايجانوۆ، اكىمنىڭ ورىنباسارى جاڭاباي ايماعامبەتوۆ ج جانە قۇقىق قورعاۋ ورگاندارىنىڭ  وكىلدەرى ءتۇسىندىرۋ جۇمىستارىن جۇرگىزدى. ولارعا گاز باعاسى بويىنشا ءىستىڭ ءمان-جايىن جانە «بەيبىت جيىندار وتكىزۋ تۋرالى» قر  زاڭىن ءتۇسىندىردى»، - دەلىنگەن حابارلامادا.

قالا اكىمدىگى نارازىلىققا جينالعان جۇرتقا ءوز تالاپتارىن جازباشا تۇردە بايانداۋدى ۇسىنعان.

ماڭعىستاۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسى بەردىبەك قارتباەۆ: «60 تەڭگە مولشەرىندەگى بۇرىنعى باعا ەندى بولمايدى. ويتكەنى قازىر بيرجاداعى گاز باعاسى – تاسىمالداۋ مەن كاسىپكەردىڭ شىعىندارىن ەسەپكە الماعاندا، ليترىنە 70-85 تەڭگە. اكىمدىك گاز باعاسىن رەتتەمەيدى. ويتكەنى بۇل تاۋار باسەكلەستىك نارىققا جاتادى»، - دەپتى.

اشىق اقپارات كوزدەرىنە سەنسەك، قازاقستان گاز قورى بويىنشا الەمدە 15-ورىندى يەمدەنەدى. ال گاز يگەرۋ جانە ءوندىرۋ بويىنشا 19-ورىندا. بۇل دەگەنىمىز قاي تۇرعىدان الىپ قاراساق تا، قازاقستان گازعا قاتىستى كورسەتكىشتەر بويىنشا ۇزدىك جيىرمالىقتا دەگەن ءسوز. الايدا گاز باعاسى وعان قاراماستان ەسەلەپ كوتەرىلىپ جاتىر.

قازاقستاندى قىمباتشىلىق قىسىپ تۇر. ازىق-تۇلىك، ءدارى-دارمەك، قۇرىلىس ماتەريالدارى مەن باسپانا، جانارماي مەن گاز باعاسى توقتاۋسىز وسۋدە. پرەزيدەنت جولداۋدا ينفلياتسيانى ءتۇسىرۋ تۋرالى تاپسىرما بەرسە دە، ايتارلىقتاي وزگەرىس جوق. 2020 جىلى باعانى تۇراقتاندىرۋ ءۇشىن 30 ملرد تەڭگە بولىنسە، 2021 جىلى 50 ملرد تەڭگە بولىنگەن. وسىنىڭ ءوزى جاعدايدىڭ قانشالىقتى قيىنداعانىن كورسەتىپ تۇر.

تاقىرىپقا تۇزدىق: ماڭعىستاۋ وبلىسىنىڭ اكىمى نۇرلان نوعاەۆ 2016 جىلى اتىراۋ وبلىسىنىڭ اكىمى قىزمەتىن اتقارعان ەدى. سول جىلى جەر داۋىنا بايلانىستى الاڭعا جينالعان حالىققا «ەشكىمدى قۋدالامايدى»، دەپ ۋادە بەرگەنىنە قاراماستان، تالعات ايان مەن ماكس بوقاەۆ سىندى بەلسەندىلەر سوتتالعان بولاتىن. بيىل 7 قىركۇيەكتەن باستاپ نۇرلان نوعاەۆ ماڭعىستاۋ وڭىرىنە اكىم بولىپ قايتا تاعايىندالدى. جۇتتان ابدەن زارداپ شەككەن ايماق حالقىنىڭ تالابىنا قۇلاق ءتۇرىپ، «حالىق ۇنىنە قۇلاق اساتىن مەملەكەتكە» حالىقتىڭ ءۇنىن جەتكىزەالا ما دەگەن كوكەيدە سۇراق تۇر...

نۇرگەلدى ابدىعانيۇلى

Abai.kz

21 پىكىر